Yashua 6

yareehoo kee tabaahee

¹un dinon men israaeeliyon kee vajah say yareehoo kay darvaazay band hee rahay. na koee baahar nikla, na koee andar gaya. ²rabb nay yashooa say kaha, “main nay yareehoo ko us kay baadshaah aur faujee afsaron samet teray haath men kar diya hai. ³jo israaeelee jang kay liyay teray saath nikalengay un kay saath shaher kee faseel kay saath saath chal kar ek chakkar lagaao aur phir khaimaagaah men vaapas a jaao. chhah din tak aisa hee karo. ⁴saat imaam ek ek narsinga uthaaay ahd kay sandooq kay aagay aagay chalen. phir saatven din shaher kay gird saat chakkar lagaao. saath saath imaam narsingay bajaatay rahen. ⁵jab vah narasingon ko bajaatay bajaatay lambee see phoonk maarengay to phir tamaam israaeelee baday zor say jang ka naara lagaaen. is par shaher kee faseel gir jaaegee aur teray log har jagah seedhay shaher men daakhil ho sakengay.”

⁶yashooa bin noon nay imaamon ko bula kar un say kaha, “rabb kay ahd ka sandooq utha kar meray saath chalen. aur saat imaam ek ek narsinga uthaaay sandooq kay aagay aagay chalen.” ⁷phir us nay baaqee logon say kaha, “aaen, shaher kee faseel kay saath saath chal kar ek chakkar lagaaen. musallah aadmee rabb kay sandooq kay aagay aagay chalen.”

⁸sab kuchh yashooa kee hidaayaat kay mutaabiq hua. saat imaam narsingay bajaatay huay rabb kay aagay aagay chalay jabki rabb kay ahd ka sandooq un kay peechhay peechhay tha. ⁹musallah aadmiyon men say kuchh bajaanay vaalay imaamon kay aagay aagay aur kuchh sandooq kay peechhay peechhay chalnay lagay. itnay men imaam narsingay bajaatay rahay. ¹⁰lekin yashooa nay baaqee logon ko hukm diya tha ki us din jang ka naara na lagaaen. us nay kaha, “jab tak main hukm na doon us vaqt tak ek lafz bhee na bolna. jab main ishaara doonga to phir hee khoob naara lagaana.” ¹¹isee tarah rabb kay sandooq nay shaher kee faseel kay saath saath chal kar chakkar lagaaya. phir logon nay khaimaagaah men laut kar vahaan raat guzaaree.

^12-13 aglay din yashooa subah-saveray utha, aur imaamon aur faujiyon nay doosree martaba shaher ka chakkar lagaaya. un kee vahee tarteeb thee. pahelay kuchh musallah aadmee, phir saat narsingay bajaanay vaalay imaam, phir rabb kay ahd ka sandooq uthaanay vaalay imaam aur aakhir men mazeed kuchh musallah aadmee thay. chakkar lagaanay kay dauraan imaam narsingay bajaatay rahay. ¹⁴is doosray din bhee vah shaher ka chakkar laga kar khaimaagaah men laut aaay. unhon nay chhah din tak aisa hee kiya.

¹⁵saatven din unhon nay subah-saveray uth kar shaher ka chakkar yoon lagaaya jaisay pahelay chhah dinon men, lekin is dafa unhon nay kul saat chakkar lagaaay. ¹⁶saatven chakkar par imaamon nay narasingon ko bajaatay huay lambee see phoonk maaree. tab yashooa nay logon say kaha, “jang ka naara lagaaen, kyoonki rabb nay aap ko yah shaher day diya hai. ¹⁷shaher ko aur jo kuchh us men hai tabaah karkay rabb kay liyay makhsoos karna hai. sirf raahab kasbee ko un logon samet bachaana hai jo us kay ghar men hain. kyoonki us nay hamaaray un jaasooson ko chhupa diya jin ko ham nay yahaan bheja tha. ¹⁸lekin allaah kay liyay makhsoos cheezon ko haath na lagaana, kyoonki agar aap un men say kuchh lay len to apnay aap ko tabaah karengay balki israaeelee khaimaagaah par bhee tabaahee aur aafat laaengay. ¹⁹jo kuchh bhee chaandee, sonay, peetal ya lohay say bana hai vah rabb kay liyay makhsoos hai. usay rabb kay khazaanay men daalna hai.”

²⁰jab imaamon nay lambee phoonk maaree to israaeeliyon nay jang kay zordaar naaray lagaaay. achaanak yareehoo kee faseel gir gaee, aur har shakhs apnee apnee jagah par seedha shaher men daakhil hua. yoon shaher israaeel kay qabzay men a gaya. ²¹jo kuchh bhee shaher men tha usay unhon nay talvaar say maar kar rabb kay liyay makhsoos kiya, khwaah mard ya aurat, javaan ya buzurg, gaay-bail, bhed-bakree ya gadha tha.

²²jin do aadmiyon nay mulk kee jaasoosee kee thee un say yashooa nay kaha, “ab apnee qasam ka vaada poora karen. kasbee kay ghar men ja kar usay aur us kay tamaam ghar vaalon ko nikaal laaen.” ²³chunaanchay yah javaan aadmee gaay aur raahab, us kay maan-baap, bhaaiyon aur baaqee rishtedaaron ko us kee milkiyat samet nikaal kar khaimaagaah say baahar kaheen basa diya. ²⁴phir unhon nay pooray shaher ko aur jo kuchh us men tha bhasm kar diya. lekin chaandee, sonay, peetal aur lohay ka tamaam maal unhon nay rabb kay ghar kay khazaanay men daal diya. ²⁵yashooa nay sirf raahab kasbee aur us kay ghar vaalon ko bachaaay rakha, kyoonki us nay un aadmiyon ko chhupa diya tha jinhen yashooa nay yareehoo bheja tha. raahab aaj tak israaeeliyon kay darmiyaan rahetee hai.

²⁶us vaqt yashooa nay qasam khaaee, “rabb kee laanat us par ho jo yareehoo ka shaher naay siray say taameer karnay kee koshish karay. shaher kee bunyaad rakhtay vaqt vah apnay pahelauthay say maheroom ho jaaega, aur us kay darvaazon ko khada kartay vaqt vah apnay sab say chhotay betay say haath dho baithega.”

²⁷yoon rabb yashooa kay saath tha, aur us kee shuharat pooray mulk men phail gaee.