Yashua 5
1yah khabar darya-ay-yardan kay maghrib men aabaad tamaam amoree baadshaahon aur saahilee ilaaqay men aabaad tamaam kan’aanee baadshaahon tak pahunch gaee ki rabb nay israaeeliyon kay saamnay darya ko us vaqt tak khushk kar diya jab tak sab nay paar na kar liya tha. tab un kee himmat toot gaee aur un men israaeeliyon ka saamna karnay kee jur’at na rahee.
jiljaal men khatnaa
2us vaqt rabb nay yashooa say kaha, “patthar kee chhuriyaan bana kar pahelay kee tarah israaeeliyon ka khatna karva day.” 3chunaanchay yashooa nay patthar kee chhuriyaan bana kar ek jagah par israaeeliyon ka khatna karvaaya jis ka naam baad men ‘khatna pahaad’ rakha gaya. 4baat yah thee ki jo mard misr say nikaltay vaqt jang karnay kay qaabil thay vah registaan men chaltay chaltay mar chukay thay. 5misr say ravaana honay vaalay in tamaam mardon ka khatna hua tha, lekin jitnay ladkon kee paidaaish registaan men huee thee un ka khatna naheen hua tha. 6choonki israaeelee rabb kay taabay naheen rahay thay is liyay us nay qasam khaaee thee ki vah us mulk ko naheen dekhengay jis men doodh aur shahed kee kasrat hai aur jis ka vaada us nay qasam kha kar un kay baapdaada say kiya tha. nateejay men israaeelee fauran mulk men daakhil na ho sakay balki unhen us vaqt tak registaan men phirna pada jab tak vah tamaam mard mar na gaay jo misr say nikaltay vaqt jang karnay kay qaabil thay. 7un kee jagah rabb nay un kay beton ko khada kiya tha. yashooa nay un hee ka khatna karvaaya. un ka khatna is liyay hua ki registaan men safar kay dauraan un ka khatna naheen kiya gaya tha.
8pooree qaum kay mardon ka khatna honay kay baad vah us vaqt tak khaimaagaah men rahay jab tak un kay zakhm theek naheen ho gaay thay. 9aur rabb nay yashooa say kaha, “aaj main nay misr kee rusvaaee tum say door kar dee hai.” [a] lafzee tarjuma : ludhka kar door kar dee hai. is liyay us jagah ka naam aaj tak jiljaal yaanee ludhkaana raha hai.
10jab israaeelee yareehoo kay maidaanee ilaaqay men vaaqay jiljaal men khaimaazan thay to unhon nay fasah kee eed bhee manaaee. maheenay ka chaudhvaan din tha, 11aur aglay hee din vah pahelee dafa us mulk kee paidaavaar men say bekhameeree rotee aur anaaj kay bhunay huay daanay khaanay lagay. 12us kay baad kay din mann ka silsila khatm hua aur israaeeliyon kay liyay yah sahoolat na rahee. us saal vah kan’aan kee paidaavaar say khaanay lagay.
farishtay say yashooa kee mulaaqaat
13ek din yashooa yareehoo shaher kay qareeb tha. achaanak ek aadmee us kay saamnay khada nazar aaya jis kay haath men nangee talvaar thee. yashooa nay us kay paas ja kar poochha, “kya aap hamaaray saath ya hamaaray dushmanon kay saath hain?”
14aadmee nay kaha, “naheen, main rabb kay lashkar ka sardaar hoon aur abhee abhee teray paas pahuncha hoon.”
yah sun kar yashooa nay gir kar usay sijda kiya aur poochha, “meray aaqa apnay khaadim ko kya farmaana chaahatay hain?”
15rabb kay lashkar kay sardaar nay javaab men kaha, “apnay jootay utaar day, kyoonki jis jagah par too khada hai vah muqaddas hai.” yashooa nay aisa hee kiya.