Yashua 4
yaadgaar patthar
1jab pooree qaum nay darya-ay-yardan ko uboor kar liya to rabb yashooa say hamkalaam hua, 2“har qabeelay men say ek ek aadmee ko chun lay. 3phir in baarah aadmiyon ko hukm day ki jahaan imaam darya-ay-yardan kay darmiyaan khaday hain vahaan say baarah patthar utha kar unhen us jagah rakh do jahaan tum aaj raat thaherogay.”
4chunaanchay yashooa nay un baarah aadmiyon ko bulaaya jinhen us nay israaeel kay har qabeelay say chun liya thaa 5aur un say kaha, “rabb apnay khuda kay sandooq kay aagay aagay chal kar darya kay darmiyaan tak jaaen. aap men say har aadmee ek ek patthar utha kar apnay kandhay par rakhay aur baahar lay jaaay. kul baarah patthar hongay, israaeel kay har qabeelay kay liyay ek. 6yah patthar aap kay darmiyaan ek yaadgaar nishaan rahengay. aainda jab aap kay bachchay aap say poochhengay ki in pattharon ka kya matlab hai 7to unhen bataana, ‘yah hamen yaad dilaatay hain ki darya-ay-yardan ka bahaao ruk gaya jab rabb ka ahd ka sandooq us men say guzra.’ yah patthar abad tak israaeel ko yaad dilaatay rahengay ki yahaan kya kuchh hua tha.”
8israaeeliyon nay aisa hee kiya. unhon nay darya-ay-yardan kay beech men say apnay qabeelon kee taadaad kay mutaabiq baarah patthar uthaaay, bilkul usee tarah jis tarah rabb nay yashooa ko farmaaya tha. phir unhon nay yah patthar apnay saath lay kar us jagah rakh diay jahaan unhen raat kay liyay thaherna tha. 9saath saath yashooa nay us jagah bhee baarah patthar khaday kiay jahaan ahd ka sandooq uthaanay vaalay imaam darya-ay-yardan kay darmiyaan khaday thay. yah patthar aaj tak vahaan paday hain. 10sandooq ko uthaanay vaalay imaam darya kay darmiyaan khaday rahay jab tak logon nay tamaam ahkaam jo rabb nay yashooa ko diay thay pooray na kar liyay. yoon sab kuchh vaisa hee hua jaisa moosa nay yashooa ko farmaaya tha.
log jaldee jaldee darya men say guzray. 11jab sab doosray kinaaray par thay to imaam bhee rabb ka sandooq lay kar kinaaray par pahunchay aur dubaara qaum kay aagay aagay chalnay lagay. 12aur jis tarah moosa nay farmaaya tha, roobin, jad aur manassee kay aadhay qabeelay kay mard musallah ho kar baaqee israaeelee qabeelon say pahelay darya kay doosray kinaaray par pahunch gaay thay. 13taqreeban 40,000 musallah mard us vaqt rabb kay saamnay yareehoo kay maidaan men pahunch gaay taaki vahaan jang karen. 14us din rabb nay yashooa ko pooree israaeelee qaum kay saamnay sarfaraaz kiya. us kay jeetay jee log us ka yoon khauf maantay rahay jis tarah pahelay moosa ka.
15phir rabb nay yashooa say kaha, 16“ahd ka sandooq uthaanay vaalay imaamon ko darya men say nikalnay ka hukm day.” 17yashooa nay aisa hee kiyaa 18to joon hee imaam kinaaray par pahunch gaay paanee dubaara bah kar darya kay kinaaron say baahar aanay laga.
19israaeeliyon nay pahelay maheenay kay dasven din [a] yaanee aprail men. darya-ay-yardan ko uboor kiya. unhon nay apnay khaimay yareehoo kay mashriq men vaaqay jiljaal men khaday kiay. 20vahaan yashooa nay darya men say chunay huay baarah pattharon ko khada kiya. 21us nay israaeeliyon say kaha, “aainda jab aap kay bachchay apnay apnay baap say poochhengay ki in pattharon ka kya matlab hai 22to unhen bataana, ‘yah vah jagah hai jahaan israaeelee qaum nay khushk zameen par darya-ay-yardan ko paar kiya.’ 23kyoonki rabb aap kay khuda nay us vaqt tak aap kay aagay aagay darya ka paanee khushk kar diya jab tak aap vahaan say guzar na gaay, bilkul usee tarah jis tarah baher-ay-qulzum kay saath kiya tha jab ham us men say guzray. 24us nay yah kaam is liyay kiya taaki zameen kee tamaam qaumen allaah kee qudrat ko jaan len aur aap hamesha rabb apnay khuda ka khauf maanen.”