Yashua 3
israaeelee darya-ay-yardan ko uboor kartay hain
1subah-saveray uth kar yashooa aur tamaam israaeelee shitteem say ravaana huay. jab vah darya-ay-yardan pahunchay to usay uboor na kiya balki raat kay liyay kinaaray par ruk gaay. 2vah teen din vahaan rahay. phir nigahbaanon nay khaimaagaah men say guzar kar 3logon ko hukm diya, “jab aap dekhen ki laavee kay qabeelay kay imaam rabb aap kay khuda kay ahd ka sandooq uthaaay huay hain to apnay apnay maqaam say ravaana ho kar us kay peechhay ho len. 4phir aap ko pata chalega ki kahaan jaana hai, kyoonki aap pahelay kabhee vahaan naheen gaay. lekin sandooq kay taqreeban ek kilomeetar peechhay rahen aur ziyaada qareeb na jaaen.”
5yashooa nay logon ko bataaya, “apnay aap ko makhsoos-o-muqaddas karen, kyoonki kal rabb aap kay darmiyaan hairat’angez kaam karega.”
6aglay din yashooa nay imaamon say kaha, “ahd ka sandooq utha kar logon kay aagay aagay darya ko paar karen.” chunaanchay imaam sandooq ko utha kar aagay aagay chal diay. 7aur rabb nay yashooa say farmaaya, “main tujhay tamaam israaeeliyon kay saamnay sarfaraaz kar doonga, aur aaj hee main yah kaam shuroo karoonga taaki vah jaan len ki jis tarah main moosa kay saath tha usee tarah teray saath bhee hoon. 8ahd ka sandooq uthaanay vaalay imaamon ko bata dena, ‘jab aap darya-ay-yardan kay kinaaray pahunchengay to vahaan paanee men ruk jaaen’.”
9yashooa nay israaeeliyon say kaha, “meray paas aaen aur rabb apnay khuda kay farmaan sun len. 10aaj aap jaan lengay ki zinda khuda aap kay darmiyaan hai aur ki vah yaqeenan aap kay aagay aagay ja kar doosree qaumon ko nikaal dega, khwaah vah kan’aanee, hittee, hivvee, farizzee, jirjaasee, amoree ya yaboosee hon. 11yah yoon zaahir hoga ki ahd ka yah sandooq jo tamaam duniya kay maalik ka hai aap kay aagay aagay darya-ay-yardan men jaaega. 12ab aisa karen ki har qabeelay men say ek ek aadmee ko chun len taaki baarah afraad jama ho jaaen. 13phir imaam tamaam duniya kay maalik rabb kay ahd ka sandooq utha kar darya men jaaengay. aur joon hee vah apnay paaon paanee men rakhengay to paanee ka bahaao ruk jaaega aur aanay vaala paanee dher ban kar khada rahega.”
14chunaanchay israaeelee apnay khaimon ko samet kar ravaana huay, aur ahd ka sandooq uthaanay vaalay imaam un kay aagay aagay chal diay. 15fasal kee kataaee ka mausam tha, aur darya ka paanee kinaaron say baahar a gaya tha. lekin joon hee sandooq ko uthaanay vaalay imaamon nay darya kay kinaaray pahunch kar paanee men qadam rakhaa 16to aanay vaalay paanee ka bahaao ruk gaya. vah un say door ek shaher kay qareeb dher ban gaya jis ka naam aadam tha aur jo zartaan kay nazdeek hai. jo paanee doosree yaanee baheera-ay-murdaar kee taraf bah raha tha vah pooree tarah utar gaya. tab israaeeliyon nay yareehoo shaher kay muqaabil darya ko paar kiya. 17rabb ka ahd ka sandooq uthaanay vaalay imaam darya-ay-yardan kay beech men khushk zameen par khaday rahay jabki baaqee log khushk zameen par say guzar gaay. imaam us vaqt tak vahaan khaday rahay jab tak tamaam israaeeliyon nay khushk zameen par chal kar darya ko paar na kar liya.