Yashua 24

allaah aur israaeel kay darmiyaan ahd kee tajdeed

¹phir yashooa nay israaeel kay tamaam qabeelon ko sikam shaher men jama kiya. us nay israaeel kay buzurgon, sardaaron, qaaziyon aur nigahbaanon ko bulaaya, aur vah mil kar allaah kay huzoor haazir huay. ²phir yashooa israaeelee qaum say mukhaatib hua. “rabb israaeel ka khuda farmaata hai, ‘qadeem zamaanay men tumhaaray baapdaada darya-ay-furaat kay paar bastay aur deegar maaboodon kee pooja kartay thay. ibraaheem aur nahoor ka baap taarah bhee vahaan aabaad tha. ³lekin main tumhaaray baap ibraaheem ko vahaan say lay kar yahaan laaya aur usay pooray mulk-ay-kan’aan men say guzarnay diya. main nay usay bahut aulaad dee. main nay usay ishaaq diyaa ⁴aur ishaaq ko yaaqoob aur esau. esau ko main nay pahaadee ilaaqa saeer ata kiya, lekin yaaqoob apnay beton kay saath misr chala gaya.

⁵baad men main nay moosa aur haaroon ko misr bhej diya aur mulk par badee museebaten naazil karkay tumhen vahaan say nikaal laaya. ⁶chaltay chaltay tumhaaray baapdaada baher-ay-qulzum pahunch gaay. lekin misree apnay rathon aur ghudasavaaron say un ka taaqqub karnay lagay. ⁷tumhaaray baapdaada nay madad kay liyay rabb ko pukaara, aur main nay un kay aur misriyon kay darmiyaan andhera paida kiya. main samundar un par chadha laaya, aur vah us men gharq ho gaay. tumhaaray baapdaada nay apnee hee aankhon say dekha ki main nay misriyon kay saath kya kuchh kiya.

tum baday arsay tak registaan men ghoomtay phiray. ⁸aakhirkaar main nay tumhen un amoriyon kay mulk men pahunchaaya jo darya-ay-yardan kay mashriq men aabaad thay. go unhon nay tum say jang kee, lekin main nay unhen tumhaaray haath men kar diya. tumhaaray aagay aagay chal kar main nay unhen nest-o-naabood kar diya, is liyay tum un kay mulk par qabza kar sakay. ⁹moaab kay baadshaah balaq bin safor nay bhee israaeel kay saath jang chhedee. is maqsad kay tahet us nay bal’aam bin baor ko bulaaya taaki vah tum par laanat bhejay. ¹⁰lekin main bal’aam kee baat maannay kay liyay tayyaar naheen tha balki vah tumhen barkat denay par majboor hua. yoon main nay tumhen us kay haath say mahfooz rakha.

¹¹phir tum darya-ay-yardan ko paar karkay yareehoo kay paas pahunch gaay. is shaher kay baashinday aur amoree, farizzee, kan’aanee, hittee, jirjaasee, hivvee aur yaboosee tumhaaray khilaaf ladtay rahay, lekin main nay unhen tumhaaray qabzay men kar diya. ¹²main nay tumhaaray aagay zamboor bhej diay jinhon nay amoriyon kay do baadshaahon ko mulk say nikaal diya.

yah sab kuchh tumhaaree apnee talvaar aur kamaan say naheen hua balki meray hee haath say. ¹³main nay tumhen beej bonay kay liyay zameen dee jisay tayyaar karnay kay liyay tumhen mehanat na karnee padee. main nay tumhen shaher diay jo tumhen taameer karnay na paday. un men rah kar tum angoor aur zaitoon kay aisay baaghon ka phal khaatay ho jo tum nay naheen lagaaay thay’.”

¹⁴yashooa nay baat jaaree rakhtay huay kaha, “chunaanchay rabb ka khauf maanen aur pooree vafaadaaree kay saath us kee khidmat karen. un buton ko nikaal phainken jin kee pooja aap kay baapdaada darya-ay-furaat kay paar aur misr men kartay rahay. ab rabb hee kee khidmat karen! ¹⁵lekin agar rabb kee khidmat karna aap ko bura lagay to aaj hee faisla karen ki kis kee khidmat karengay, un devtaaon kee jin kee pooja aap kay baapdaada nay darya-ay-furaat kay paar kee ya amoriyon kay devtaaon kee jin kay mulk men aap rah rahay hain. lekin jahaan tak mera aur meray khaandaan ka taalluq hai ham rabb hee kee khidmat karengay.”

¹⁶avaam nay javaab diya, “aisa kabhee na ho ki ham rabb ko tark karkay deegar maaboodon kee pooja karen. ¹⁷rabb hamaara khuda hee hamaaray baapdaada ko misr kee ghulaamee say nikaal laaya aur hamaaree aankhon kay saamnay aisay azeem nishaan pesh kiay. jab hamen bahut qaumon men say guzarna pada to usee nay har vaqt hamaaree hifaazat kee. ¹⁸aur rabb hee nay hamaaray aagay aagay chal kar is mulk men aabaad amoriyon aur baaqee qaumon ko nikaal diya. ham bhee usee kee khidmat karengay, kyoonki vahee hamaara khuda hai!”

¹⁹yah sun kar yashooa nay kaha, “aap rabb kee khidmat kar hee naheen saktay, kyoonki vah quddoos aur ghayoor khuda hai. vah aap kee sarkashee aur gunaahon ko muaaf naheen karega. ²⁰beshak vah aap par meharbaanee karta raha hai, lekin agar aap rabb ko tark karkay ajnabee maaboodon kee pooja karen to vah aap kay khilaaf ho kar aap par balaaen laaega aur aap ko nest-o-naabood kar dega.”

²¹lekin israaeeliyon nay israar kiya, “jee naheen, ham rabb kee khidmat karengay!” ²²phir yashooa nay kaha, “aap khud is kay gavaah hain ki aap nay rabb kee khidmat karnay ka faisla kar liya hai.” unhon nay javaab diya, “jee haan, ham is kay gavaah hain!” ²³yashooa nay kaha, “to phir apnay darmiyaan maujood buton ko tabaah kar den aur apnay dilon ko rabb israaeel kay khuda kay taabay rakhen.” ²⁴avaam nay yashooa say kaha, “ham rabb apnay khuda kee khidmat karengay aur usee kee sunengay.”

²⁵us din yashooa nay israaeeliyon kay liyay rabb say ahd baandha. vahaan sikam men us nay unhen ahkaam aur qavaaid day kar ²⁶allaah kee shareeat kee kitaab men darj kiay. phir us nay ek bada patthar lay kar usay us baloot kay saay men khada kiya jo rabb kay maqdis kay paas tha. ²⁷us nay tamaam logon say kaha, “is patthar ko dekhen! yah gavaah hai, kyoonki is nay sab kuchh sun liya hai jo rabb nay hamen bata diya hai. agar aap kabhee allaah ka inkaar karen to yah tumhaaray khilaaf gavaahee dega.”

²⁸phir yashooa nay israaeeliyon ko faarigh kar diya, aur har ek apnay apnay qabaailee ilaaqay men chala gaya.

yashooa aur ileeazar ka intiqaal

²⁹kuchh der kay baad rabb ka khaadim yashooa bin noon faut hua. us kee umr 110 saal thee. ³⁰usay us kee mauroosee zameen men dafnaaya gaya, yaanee timnat-sirah men jo ifraaeem kay pahaadee ilaaqay men jaas pahaad kay shimaal men hai.

³¹jab tak yashooa aur vah buzurg zinda rahay jinhon nay apnee aankhon say sab kuchh dekha tha jo rabb nay israaeel kay liyay kiya tha us vaqt tak israaeel rabb ka vafaadaar raha.

³²misr ko chhodtay vaqt israaeelee yoosuf kee haddiyaan apnay saath laaay thay. ab unhon nay unhen sikam shaher kee us zameen men dafan kar diya jo yaaqoob nay sikam kay baap hamor kee aulaad say chaandee kay sau sikkon kay badlay khareed lee thee. yah zameen yoosuf kee aulaad kee viraasat men a gaee thee.

³³ileeazar bin haaroon bhee faut hua. usay jibia men dafnaaya gaya. ifraaeem kay pahaadee ilaaqay ka yah shaher us kay betay feenhaas ko diya gaya tha.