Yashua 22

mashriqee qabeelon ko ghar vaapas jaanay kee ijaazat

¹phir yashooa nay roobin, jad aur manassee kay aadhay qabeelay kay mardon ko apnay paas bula kar ²kaha, “jo bhee hukm rabb kay khaadim moosa nay aap ko diya tha usay aap nay poora kiya. aur aap nay meree har baat maanee hai. ³aap nay kaafee arsay say aaj tak apnay bhaaiyon ko tark naheen kiya balki bilkul vahee kuchh kiya hai jo rabb kee marzee thee. ⁴ab rabb aap kay khuda nay aap kay bhaaiyon ko mauooda mulk day diya hai, aur vah salaamatee kay saath us men rah rahay hain. is liyay ab vaqt a gaya hai ki aap apnay ghar vaapas chalay jaaen, us mulk men jo rabb kay khaadim moosa nay aap ko darya-ay-yardan kay paar day diya hai. ⁵lekin khabardaar, ehatiyaat say un hidaayaat par chaltay rahen jo rabb kay khaadim moosa nay aap ko day deen. rabb apnay khuda say piyaar karen, us kee tamaam raahon par chalen, us kay ahkaam maanen, us kay saath liptay rahen, aur pooray dil-o-jaan say us kee khidmat karen.” ⁶yah kah kar yashooa nay unhen barkat day kar rukhsat kar diya, aur vah apnay ghar chalay gaay.

⁷manassee kay aadhay qabeelay ko moosa say mulk-ay-basan men zameen mil gaee thee. doosray hissay ko yashooa say zameen mil gaee thee, yaanee darya-ay-yardan kay maghrib men jahaan baaqee qabeelay aabaad huay thay. manassee kay mardon ko rukhsat kartay vaqt yashooa nay unhen barkat day kar ⁸kaha, “aap badee daulat kay saath apnay ghar laut rahay hain. aap ko baday revad, sona, chaandee, loha aur bahut say kapday mil gaay hain. jab aap apnay ghar pahunchengay to maal-ay-ghaneemat un kay saath taqseem karen jo ghar men rah gaay hain.”

⁹phir roobin, jad aur manassee kay aadhay qabeelay kay mard baaqee israaeeliyon ko saila men chhod kar mulk-ay-jiliaad kee taraf ravaana huay jo darya-ay-yardan kay mashriq men hai. vahaan un kay apnay ilaaqay thay jin men un kay qabeelay rabb kay us hukm kay mutaabiq aabaad huay thay jo us nay moosa kee maarifat diya tha.

mashriqee qabeelay qurbaangaah bana letay hain

¹⁰yah mard chaltay chaltay darya-ay-yardan kay maghrib men ek jagah pahunchay jis ka naam galeelot tha. vahaan yaanee mulk-ay-kan’aan men hee unhon nay ek badee aur shaandaar qurbaangaah banaaee. ¹¹israaeeliyon ko khabar dee gaee, “roobin, jad aur manassee kay aadhay qabeelay nay kan’aan kee sarhadd par galeelot men qurbaangaah bana lee hai. yah qurbaangaah darya-ay-yardan kay maghrib men yaanee hamaaray hee ilaaqay men hai!”

¹²tab israaeel kee pooree jamaaat mashriqee qabeelon say ladnay kay liyay saila men jama huee. ¹³lekin pahelay unhon nay ileeazar imaam kay betay feenhaas ko mulk-ay-jiliaad ko bheja jahaan roobin, jad aur manassee ka aadha qabeela aabaad thay. ¹⁴us kay saath 10 aadmee yaanee har maghribee qabeelay ka ek numaainda tha. har ek apnay aabaaee gharaanay aur kumbay ka sarbaraah tha. ¹⁵jiliaad men pahunch kar unhon nay mashriqee qabeelon say baat kee. ¹⁶“rabb kee pooree jamaaat aap say poochhtee hai ki aap israaeel kay khuda say bevafa kyoon ho gaay hain? aap nay rabb say apna munh pher kar yah qurbaangaah kyoon banaaee hai? is say aap nay rabb say sarkashee kee hai. ¹⁷kya yah kaafee naheen tha ki ham say faghoor kay but kee pooja karnay ka gunaah sarzad hua? ham to aaj tak pooray taur par us gunaah say paak-saaf naheen huay go us vaqt rabb kee jamaaat ko vaba kee soorat men saza mil gaee thee. ¹⁸to phir aap kya kar rahay hain? aap dubaara rabb say apna munh pher kar door ho rahay hain. dekhen, agar aap aaj rabb say sarkashee karen to kal vah israaeel kee pooree jamaaat kay saath naaraaz hoga. ¹⁹agar aap samajhtay hain ki aap ka mulk naapaak hai aur aap is liyay us men rabb kee khidmat naheen kar saktay to hamaaray paas rabb kay mulk men aaen jahaan rabb kee sukoonatgaah hai, aur hamaaree zameenon men shareek ho jaaen. lekin rabb say ya ham say sarkashee mat karna. rabb hamaaray khuda kee qurbaangaah kay ilaava apnay liyay koee aur qurbaangaah na banaaen! ²⁰kya israaeel kee pooree jamaaat par allaah ka ghazab naazil na hua jab akan bin zaarah nay maal-ay-ghaneemat men say kuchh choree kiya jo rabb kay liyay makhsoos tha? us kay gunaah kee saza sirf us tak hee mahdood na rahee balki aur bhee halaak huay.”

²¹roobin, jad aur manassee kay aadhay qabeelay kay mardon nay israaeelee kumbon kay sarbaraahon ko javaab diya, ²²“rabb qaadir-ay-mutlaq khuda, haan rabb qaadir-ay-mutlaq khuda haqeeqat jaanta hai, aur israaeel bhee yah baat jaan lay! na ham sarkash huay hain, na rabb say bevafa. agar ham jhoot bolen to aaj hee hamen maar daalen! ²³ham nay yah qurbaangaah is liyay naheen banaaee ki rabb say door ho jaaen. ham us par koee bhee qurbaanee chadhaana naheen chaahatay, na bhasm honay vaalee qurbaaniyaan, na ghalla kee nazren aur na hee salaamatee kee qurbaaniyaan. agar ham jhoot bolen to rabb khud hamaaree adaalat karay. ²⁴haqeeqat men ham nay yah qurbaangaah is liyay taameer kee ki ham dartay hain ki mustaqbil men kisee din aap kee aulaad hamaaree aulaad say kahay, ‘aap ka rabb israaeel kay khuda kay saath kya vaasta hai? ²⁵aakhir rabb nay hamaaray aur aap kay darmiyaan darya-ay-yardan kee sarhadd muqarrar kee hai. chunaanchay aap ko rabb kee ibaadat karnay ka koee haq naheen!’ aisa karnay say aap kee aulaad hamaaree aulaad ko rabb kee khidmat karnay say rokegee. ²⁶yahee vajah hai ki ham nay yah qurbaangaah banaaee, bhasm honay vaalee qurbaaniyaan ya zabah kee koee aur qurbaanee chadhaanay kay liyay naheen ²⁷balki aap ko aur aanay vaalee naslon ko is baat kee yaad dilaanay kay liyay ki hamen bhee rabb kay khaimay men bhasm honay vaalee qurbaaniyaan, zabah kee qurbaaniyaan aur salaamatee kee qurbaaniyaan chadhaanay ka haq hai. yah qurbaangaah hamaaray aur aap kay darmiyaan gavaah rahegee. ab aap kee aulaad kabhee bhee hamaaree aulaad say naheen kah sakegee, ‘aap ko rabb kee jamaaat kay huqooq haasil naheen.’ ²⁸aur agar vah kisee vaqt yah baat karay to hamaaree aulaad kah sakegee, ‘yah qurbaangaah dekhen jo rabb kee qurbaangaah kee hoo-ba-hoo naqal hai. hamaaray baapdaada nay isay banaaya tha, lekin is liyay naheen ki ham is par bhasm honay vaalee qurbaaniyaan aur zabah kee qurbaaniyaan chadhaaen balki aap ko aur hamen gavaahee denay kay liyay ki hamen mil kar rabb kee ibaadat karnay ka haq hai.’ ²⁹haalaat kabhee bhee yahaan tak na pahunchen ki ham rabb say sarkashee karkay apna munh us say pher len. naheen, ham nay yah qurbaangaah bhasm honay vaalee qurbaaniyaan, ghalla kee nazren aur zabah kee qurbaaniyaan chadhaanay kay liyay naheen banaaee. ham sirf rabb apnay khuda kee sukoonatgaah kay saamnay kee qurbaangaah par hee apnee qurbaaniyaan pesh karna chaahatay hain.”

³⁰jab feenhaas aur israaeelee jamaaat kay kumbon kay sarbaraahon nay jiliaad men roobin, jad aur manassee kay aadhay qabeelay kee yah baaten suneen to vah mutmain huay. ³¹feenhaas nay un say kaha, “ab ham jaantay hain ki rabb aainda bhee hamaaray darmiyaan rahega, kyoonki aap us say bevafa naheen huay hain. aap nay israaeeliyon ko rabb kee saza say bacha liya hai.”

³²is kay baad feenhaas aur baaqee israaeelee sardaar roobin, jad aur manassee kay aadhay qabeelay ko mulk-ay-jiliaad men chhod kar mulk-ay-kan’aan men laut aaay. vahaan unhon nay sab kuchh bataaya jo hua tha. ³³baaqee israaeeliyon ko yah baat pasand aaee, aur vah allaah kee tamjeed karkay roobin aur jad say jang karnay aur un ka ilaaqa tabaah karnay kay iraaday say baaz aaay. ³⁴roobin aur jad kay qabeelon nay naee qurbaangaah ka naam gavaah rakha, kyoonki unhon nay kaha, “yah qurbaangaah hamaaray aur doosray qabeelon kay darmiyaan gavaah hai ki rabb hamaara bhee khuda hai.”