Yashua 21

laaviyon kay shaher aur charaagaahen

¹phir laavee kay qabeelay kay aabaaee gharaanon kay sarbaraah ileeazar imaam, yashooa bin noon aur israaeel kay baaqee qabeelon kay aabaaee gharaanon kay sarbaraahon kay paas aae ²jo us vaqt saila men jama thay. laaviyon nay kaha, “rabb nay moosa kee maarifat hukm diya tha ki hamen basnay kay liyay shaher aur revdon ko charaanay kay liyay charaagaahen dee jaaen.” ³chunaanchay israaeeliyon nay rabb kee yah baat maan kar apnay ilaaqon men say shaher aur charaagaahen alag karkay laaviyon ko day deen.

⁴qur’a daala gaya to laavee kay gharaanay qihaat ko us kay kumbon kay mutaabiq pahela hissa mil gaya. pahelay haaroon kay kumbay ko yahoodaah, shamaaoon aur binyameen kay qabeelon kay 13 shaher diay gaay. ⁵baaqee qihaatiyon ko daan, ifraaeem aur maghribee manassee kay qabeelon kay 10 shaher mil gaay.

⁶jairson kay gharaanay ko ishkaar, aashar, naftaalee aur manassee kay qabeelon kay 13 shaher diay gaay. yah manassee ka vah ilaaqa tha jo darya-ay-yardan kay mashriq men mulk-ay-basan men tha.

⁷miraaree kay gharaanay ko us kay kumbon kay mutaabiq roobin, jad aur zabooloon kay qabeelon kay 12 shaher mil gaay.

⁸yoon israaeeliyon nay qur’a daal kar laaviyon ko mazkoora shaher aur un kay gird-o-navaah kee charaagaahen day deen. vaisa hee hua jaisa rabb nay moosa kee maarifat hukm diya tha.

qihaat kay gharaanay kay shaher

^9-10 qur’a daaltay vaqt laavee kay gharaanay qihaat men say haaroon kay kumbay ko pahela hissa mil gaya. usay yahoodaah aur shamaaoon kay qabeelon kay yah shaher diay gaay : ¹¹pahela shaher anaaqiyon kay baap ka shaher qiryat-arba tha jo yahoodaah kay pahaadee ilaaqay men hai aur jis ka maujooda naam habroon hai. us kee charaagaahen bhee dee gaeen, ¹²lekin habroon kay ird-gird kee aabaadiyaan aur khet kaalib bin yafunna kee milkiyat rahay. ¹³haaroon kay kumbay ka yah shaher panaah ka shaher bhee tha jis men har vah shakhs panaah lay sakta tha jis say koee ghairiraadee taur par halaak hua tha. is kay ilaava haaroon kay kumbay ko libna, ¹⁴yatteer, istimooa, ¹⁵hauloon, dabeer, ¹⁶ain, yootta aur bait-shams kay shaher bhee mil gaay. usay yahoodaah aur shamaaoon kay qabeelon kay kul 9 shaher un kee charaagaahon samet mil gaay. ^17-18 in kay ilaava binyameen kay qabeelay kay chaar shaher us kee milkiyat men aaay yaanee jibaoon, jiba, antot aur almon. ¹⁹gharaz haaroon kay kumbay ko 13 shaher un kee charaagaahon samet mil gaay. ²⁰laavee kay qabeelay kay gharaanay qihaat kay baaqee kumbon ko qur’a daaltay vaqt ifraaeem kay qabeelay kay shaher mil gaay. ²¹in men ifraaeem kay pahaadee ilaaqay ka shaher sikam shaamil tha jis men har vah shakhs panaah lay sakta tha jis say koee ghairiraadee taur par halaak hua tha, phir jazar, ²²qibzaim aur bait-hauroon. in chaar shaheron kee charaagaahen bhee mil gaeen. ^23-24 daan kay qabeelay nay bhee unhen chaar shaher un kee charaagaahon samet diay yaanee iltaqih, jibbatoon, ayyaalon aur jaat-rimmon. ²⁵manassee kay maghribee hissay say unhen do shaher taanak aur jaat-rimmon un kee charaagaahon samet mil gaay. ²⁶gharaz qihaat kay baaqee kumbon ko kul 10 shaher un kee charaagaahon samet milay.

jairson kay gharaanay kay shaher

²⁷laavee kay qabeelay kay gharaanay jairson ko manassee kay mashriqee hissay kay do shaher un kee charaagaahon samet diay gaay : mulk-ay-basan men jaulaan jis men har vah shakhs panaah lay sakta tha jis say koee ghairiraadee taur par halaak hua tha, aur baistaraah. ^28-29 ishkaar kay qabeelay nay usay chaar shaher un kee charaagaahon samet diay : qisiyon, daabrat, yarmoot aur ain-janneem. ^30-31 isee tarah usay aashar kay qabeelay kay bhee chaar shaher un kee charaagaahon samet diay gaay : misaal, abdon, khilqat aur rahob. ³²naftaalee kay qabeelay nay teen shaher un kee charaagaahon samet diay : galeel ka qaadis jis men har vah shakhs panaah lay sakta tha jis say koee ghairiraadee taur par halaak hua tha, phir hammaat-dor aur qartaan. ³³gharaz jairson kay gharaanay ko 13 shaher un kee charaagaahon samet mil gaay.

miraaree kay gharaanay kay shaher

^34-35 ab rah gaya laavee kay qabeelay ka gharaana miraaree. usay zabooloon kay qabeelay kay chaar shaher un kee charaagaahon samet mil gaay : yuqniaam, qarta, dimna aur nahelaal. ^36-37 isee tarah usay roobin kay qabeelay kay bhee chaar shaher un kee charaagaahon samet mil gaay : basar, yahez, qadeemaat aur mifaat. ^38-39 jad kay qabeelay nay usay chaar shaher un kee charaagaahon samet diay : mulk-ay-jiliaad ka raamaat jis men har vah shakhs panaah lay sakta tha jis say koee ghairiraadee taur par halaak hua tha, phir mahenaaim, hasbon aur yaazer. ⁴⁰gharaz miraaree kay gharaanay ko kul 12 shaher un kee charaagaahon samet mil gaay.

⁴¹israaeel kay mukhtalif ilaaqon men jo laaviyon kay shaher un kee charaagaahon samet thay un kee kul taadaad 48 thee. ⁴²har shaher kay ird-gird charaagaahen theen.

allaah nay apna vaada poora kiyaa

⁴³yoon rabb nay israaeeliyon ko vah poora mulk day diya jis ka vaada us nay un kay baapdaada say qasam kha kar kiya tha. vah us par qabza karkay us men rahenay lagay. ⁴⁴aur rabb nay chaaron taraf amn-o-amaan muhayya kiya jis tarah us nay un kay baapdaada say qasam kha kar vaada kiya tha. usee kee madad say israaeelee tamaam dushmanon par ghaalib aaay thay. ⁴⁵jo achchhay vaaday rabb nay israaeel say kiay thay un men say ek bhee naamukammal na raha balki sab kay sab pooray ho gaay.