Yashua 20

panaah kay chhah shaher

¹rabb nay yashooa say kaha, ²“israaeeliyon ko hukm day ki un hidaayaat kay mutaabiq panaah kay shaher chun lo jinhen main tumhen moosa kee maarifat day chuka hoon. ³in shaheron men vah log faraar ho saktay hain jin say koee ittifaaqan yaanee ghairiraadee taur par halaak hua ho. yah unhen maray huay shakhs kay un rishtedaaron say panaah dengay jo badla lena chaahengay. ⁴laazim hai ki aisa shakhs panaah kay shaher kay paas pahunchnay par shaher kay darvaazay kay paas baithay buzurgon ko apna muaamala pesh karay. us kee baat sun kar buzurg usay apnay shaher men daakhil honay kee ijaazat den aur usay apnay darmiyaan rahenay kay liyay jagah day den. ⁵ab agar badla lenay vaala us kay peechhay pad kar vahaan pahunchay to buzurg mulzim ko us kay haath men na den, kyoonki yah maut ghairiraadee taur par aur nafrat rakhay baghair huee hai. ⁶vah us vaqt tak shaher men rahay jab tak maqaamee adaalat muaamalay ka faisla na kar day. agar adaalat usay begunaah qaraar day to vah us vaqt kay imaam-ay-aazam kee maut tak us shaher men rahay. is kay baad usay apnay us shaher aur ghar ko vaapas jaanay kee ijaazat hai jis say vah faraar ho kar aaya hai.”

⁷israaeeliyon nay panaah kay yah shaher chun liyay : naftaalee kay pahaadee ilaaqay men galeel ka qaadis, ifraaeem kay pahaadee ilaaqay men sikam aur yahoodaah kay pahaadee ilaaqay men qiryat-arba yaanee habroon. ⁸darya-ay-yardan kay mashriq men unhon nay basar ko chun liya jo yareehoo say kaafee door maidaan-ay-murtafa men hai aur roobin kay qabeelay kee milkiyat hai. mulk-ay-jiliaad men raamaat jo jad kay qabeelay ka hai aur basan men jaulaan jo manassee kay qabeelay ka hai chuna gaya.

⁹yah shaher tamaam israaeeliyon aur israaeel men rahenay vaalay ajnabiyon kay liyay muqarrar kiay gaay. jis say bhee ghairiraadee taur par koee halaak hua usay in men panaah lenay kee ijaazat thee. in men vah us vaqt tak badla lenay vaalon say mahfooz raheta tha jab tak maqaamee adaalat faisla naheen kar detee thee.