Yashua 2

yareehoo shaher men israaeelee jaasoos

¹phir yashooa nay chupkay say do jaasooson ko shitteem say bhej diya jahaan israaeelee khaimaagaah thee. us nay un say kaha, “ja kar mulk ka jaaiza len, khaaskar yareehoo shaher ka.” vah ravaana huay aur chaltay chaltay ek kasbee kay ghar pahunchay jis ka naam raahab tha. vahaan vah raat kay liyay thaher gaay. ²lekin yareehoo kay baadshaah ko ittila milee ki aaj shaam ko kuchh israaeelee mard yahaan pahunch gaay hain jo mulk kee jaasoosee karna chaahatay hain. ³yah sun kar baadshaah nay raahab ko khabar bhejee, “un aadmiyon ko nikaal do jo tumhaaray paas a kar thaheray huay hain, kyoonki yah pooray mulk kee jaasoosee karnay kay liyay aaay hain.”

⁴lekin raahab nay donon aadmiyon ko chhupa rakha tha. us nay kaha, “jee, yah aadmee meray paas aaay to thay lekin mujhay maaloom naheen tha ki kahaan say aaay hain. ⁵jab din dhalnay laga aur shaher kay darvaazon ko band karnay ka vaqt a gaya to vah chalay gaay. mujhay maaloom naheen ki kis taraf gaay. ab jaldee karkay un ka peechha karen. ain mumkin hai ki aap unhen pakad len.” ⁶haqeeqat men raahab nay unhen chhat par lay ja kar vahaan par paday san kay danthalon kay neechay chhupa diya tha. ⁷raahab kee baat sun kar baadshaah kay aadmee vahaan say chalay gaay aur shaher say nikal kar jaasooson kay taaqqub men us raastay par chalnay lagay jo darya-ay-yardan kay un kam-gaheray maqaamon tak lay jaata hai jahaan usay paidal uboor kiya ja sakta tha. aur joon hee yah aadmee niklay, shaher ka darvaaza un kay peechhay band kar diya gaya.

⁸jaasooson kay so jaanay say pahelay raahab nay chhat par a kar ⁹un say kaha, “main jaantee hoon ki rabb nay yah mulk aap ko day diya hai. aap kay baaray men sun kar ham par dahshat chha gaee hai, aur mulk kay tamaam baashinday himmat haar gaay hain. ¹⁰kyoonki hamen khabar milee hai ki aap kay misr say nikaltay vaqt rabb nay baher-ay-qulzum ka paanee kis tarah aap kay aagay khushk kar diya. yah bhee hamaaray sunnay men aaya hai ki aap nay darya-ay-yardan kay mashriq men rahenay vaalay do baadshaahon seehon aur oj kay saath kya kuchh kiya, ki aap nay unhen pooree tarah tabaah kar diya. ¹¹yah sun kar hamaaree himmat toot gaee. aap kay saamnay ham sab hausla haar gaay hain, kyoonki rabb aap ka khuda aasmaan-o-zameen ka khuda hai. ¹²ab rabb kee qasam kha kar mujh say vaada karen ki aap usee tarah meray khaandaan par meharbaanee karengay jis tarah ki main nay aap par kee hai. aur zamaanat kay taur par mujhay koee nishaan den ¹³ki aap meray maan-baap, meray bahen-bhaaiyon aur un kay ghar vaalon ko zinda chhod kar hamen maut say bachaaay rakhengay.”

¹⁴aadmiyon nay kaha, “ham apnee jaanon ko zamaanat kay taur par pesh kartay hain ki aap mahfooz rahengay. agar aap kisee ko hamaaray baaray men ittila na den to ham aap say zaroor meharbaanee aur vafaadaaree say pesh aaengay jab rabb hamen yah mulk ata faramaaega.”

¹⁵tab raahab nay shaher say nikalnay men un kee madad kee. choonki us ka ghar shaher kee chaardeevaaree say mulhiq tha is liyay aadmee khidkee say nikal kar rassay kay zareeay baahar kee zameen par utar aaay. ¹⁶utarnay say pahelay raahab nay unhen hidaayat kee, “pahaadee ilaaqay kee taraf chalay jaaen. jo aap ka taaqqub kar rahay hain vah vahaan aap ko dhoond naheen sakengay. teen din tak yaanee jab tak vah vaapas na a jaaen vahaan chhupay rahena. is kay baad jahaan jaanay ka iraada hai chalay jaana.”

¹⁷aadmiyon nay us say kaha, “jo qasam aap nay hamen khilaaee hai ham zaroor us kay paaband rahengay. lekin shart yah hai ¹⁸ki aap hamaaray is mulk men aatay vaqt qirmizee rang ka yah rassa us khidkee kay saamnay baandh den jis men say aap nay hamen utarnay diya hai. yah bhee laazim hai ki us vaqt aap kay maan-baap, bhaaee-bahenen aur tamaam ghar vaalay aap kay ghar men hon. ¹⁹agar koee aap kay ghar men say niklay aur maar diya jaaay to yah hamaara qusoor naheen hoga, ham zimmaadaar naheen thaherengay. lekin agar kisee ko haath lagaaya jaaay jo aap kay ghar kay andar ho to ham hee us kee maut kay zimmaadaar thaherengay. ²⁰aur kisee ko hamaaray muaamalay kay baaray men ittila na dena, varna ham us qasam say aazaad hain jo aap nay hamen khilaaee.”

²¹raahab nay javaab diya, “theek hai, aisa hee ho.” phir us nay unhen rukhsat kiya aur vah ravaana huay. aur raahab nay apnee khidkee kay saath mazkoora rassa baandh diya.

²²jaasoos chaltay chaltay pahaadee ilaaqay men a gaay. vahaan vah teen din rahay. itnay men un ka taaqqub karnay vaalay pooray raastay ka khoj laga kar khaalee haath lautay. ²³phir donon jaasooson nay pahaadee ilaaqay say utar kar darya-ay-yardan ko paar kiya aur yashooa bin noon kay paas a kar sab kuchh bayaan kiya jo un kay saath hua tha. ²⁴unhon nay kaha, “yaqeenan rabb nay hamen poora mulk day diya hai. hamaaray baaray men sun kar mulk kay tamaam baashindon par dahshat taaree ho gaee hai.”