Yashua 19
shamaaoon ka ilaaqaa
1jab qur’a daala gaya to shamaaoon kay qabeelay aur us kay kumbon ko doosra hissa mil gaya. us kee zameen yahoodaah kay qabeelay kay ilaaqay kay darmiyaan thee. 2usay yah shaher mil gaay : bair-saba (saba), molaada, 3hasaar-sooaal, baala, azam, 4iltolad, batool, hurma, 5siqlaaj, bait-markabot, hasaar-soosa, 6bait-labaaot aur saaroohan. in shaheron kee taadaad 13 thee. har shaher kay gird-o-navaah kee aabaadiyaan us kay saath ginee jaatee theen. 7in kay ilaava yah chaar shaher bhee shamaaoon kay thay : ain, rimmon, itar aur asan. har shaher kay gird-o-navaah kee aabaadiyaan us kay saath ginee jaatee theen. 8in shaheron kay gird-o-navaah kee tamaam aabaadiyaan baalat-bair yaanee najab kay raama tak un kay saath ginee jaatee theen. yah thee shamaaoon aur us kay kumbon kee milkiyat. 9yah jagahen is liyay yahoodaah kay qabeelay kay ilaaqay say lee gaeen ki yahoodaah ka ilaaqa us kay liyay bahut ziyaada tha. yahee vajah hai ki shamaaoon ka ilaaqa yahoodaah kay beech men hai.
zabooloon ka ilaaqaa
10-12 jab qur’a daala gaya to zabooloon kay qabeelay aur us kay kumbon ko teesra hissa mil gaya. us kee junoobee sarhadd yuqniaam kee nadee say shuroo huee aur phir mashriq kee taraf dabaasat, mar’ala aur saareed say ho kar kislot-taboor kay ilaaqay tak pahunchee. is kay baad vah mud kar mashriqee sarhadd kay taur par daabrat kay paas aaee aur chadhtee chadhtee yafeea pahunchee. 13vahaan say vah mazeed mashriq kee taraf badhtee huee jaat-hifar, et-qaazeen aur rimmon say ho kar nea kay paas aaee. 14zabooloon kee shimaalee aur maghribee sarhadd hannaaton men say guzartee guzartee vaadee-ay-iftaah-el par khatm huee. 15baarah shaher un kay gird-o-navaah kee aabaadiyon samet zabooloon kee milkiyat men aaay jin men qattaat, nahelaal, simron, idaala aur bait-lahem shaamil thay. 16zabooloon kay qabeelay ko yahee kuchh us kay kumbon kay mutaabiq mil gaya.
ishkaar ka ilaaqaa
17jab qur’a daala gaya to ishkaar kay qabeelay aur us kay kumbon ko chautha hissa mil gaya. 18us ka ilaaqa yazrael say lay kar shimaal kee taraf phail gaya. yah shaher us men shaamil thay : kasoolot, shooneem, 19hafaaraim, shiyoon, anaakharat, 20rabbeet, qisiyon, ibaz, 21raimat, ain-janneem, ain-hadda aur bait-fassees. 22shimaal men yah sarhadd taboor pahaad say shuroo huee aur shakhsooma aur bait-shams say ho kar darya-ay-yardan tak utar aaee. 16 shaher un kay gird-o-navaah kee aabaadiyon samet ishkaar kee milkiyat men aaay. 23usay yah poora ilaaqa us kay kumbon kay mutaabiq mil gaya.
aashar ka ilaaqaa
24jab qur’a daala gaya to aashar kay qabeelay aur us kay kumbon ko paanchvaan hissa mil gaya. 25us kay ilaaqay men yah shaher shaamil thay : khilqat, halee, batan, akshaaf, 26alammalik, am’aad aur misaal. us kee sarhadd samundar kay saath saath chaltee huee karmil kay pahaadee silsilay kay daaman men say guzree aur utartee utartee saihoor-libnaat tak pahunchee. 27vahaan vah mashriq men bait-dajoon kee taraf mud kar zabooloon kay ilaaqay tak pahunchee aur us kee maghribee sarhadd kay saath chaltee chaltee shimaal men vaadee-ay-iftaah-el tak pahunchee. aagay badhtee huee vah bait-imaq aur naeeel say ho kar shimaal kee taraf mudee jahaan kaabool tha. 28phir vah ibroon, rahob, hammoon aur qaana say ho kar baday shaher saida tak pahunchee. 29is kay baad aashar kee sarhadd raama kee taraf mud kar faseeldaar shaher soor kay paas aaee. vahaan vah hoosa kee taraf mudee aur chaltee chaltee akzeeb kay qareeb samundar par khatm huee. 3022 shaher un kay gird-o-navaah kee aabaadiyon samet aashar kee milkiyat men aaay. in men umma, afeeq aur rahob shaamil thay. 31aashar ko us kay kumbon kay mutaabiq yahee kuchh mila.
naftaalee ka ilaaqaa
32jab qur’a daala gaya to naftaalee kay qabeelay aur us kay kumbon ko chhata hissa mil gaya. 33-34 junoob men us kee sarhadd darya-ay-yardan par laqqoom say shuroo huee aur maghrib kee taraf chaltee chaltee yabniel, adaamee-naqab, ailon-zaanneem aur halaf say ho kar aznoot-taboor tak pahunchee. vahaan say vah maghribee sarhadd kee haisiyat say huqqoq kay paas aaee. naftaalee kee junoobee sarhadd zabooloon kee shimaalee sarhadd aur maghrib men aashar kee mashriqee sarhadd thee. darya-ay-yardan aur yahoodaah [a] yahaan yahoodaah ka matlab mulk-ay-basan ho sakta hai jo manassee kay ilaaqay men tha lekin jis par yahoodaah kay qabeelay kay mard yaaeer nay fatah paaee thee. us kee mashriqee sarhadd thee. 35zail kay faseeldaar shaher naftaalee kee milkiyat men aaay : saddeem, sair, hammat, raqqat, kinnarat, 36adaama, raama, hasoor, 37qaadis, idraee, ain-hasoor, 38iroon, mijdal-el, hureem, bait-anaat aur bait-shams. aisay 19 shaher thay. har shaher kay gird-o-navaah kee aabaadiyaan bhee us kay saath ginee jaatee theen. 39naftaalee ko yahee kuchh us kay kumbon kay mutaabiq mila.
daan ka ilaaqaa
40jab qur’a daala gaya to daan kay qabeelay aur us kay kumbon ko saatvaan hissa mila. 41us kay ilaaqay men yah shaher shaamil thay : sur’a, istaal, eer-shams, 42shaalabbeen, ayyaalon, itla, 43ailon, timnat, aqroon, 44iltaqih, jibbatoon, baalaat, 45yahood, banee-baraq, jaat-rimmon, 46may-yarqoon aur raqqoon us ilaaqay samet jo yaafa kay muqaabil hai. 47afsos, daan ka qabeela apnay is ilaaqay par qabza karnay men kaamyaab na hua, is liyay us kay mardon nay lasham shaher par hamla karkay us par fatah paaee aur us kay baashindon ko talvaar say maar daala. phir vah khud vahaan aabaad huay. us vaqt lasham shaher ka naam daan men tabdeel hua. (daan un kay qabeelay ka baap tha.) 48lekin yashooa kay zamaanay men daan kay qabeelay ko us kay kumbon kay mutaabiq mazkoora tamaam shaher aur un kay gird-o-navaah kee aabaadiyaan mil gaeen.
yashooa ko bhee zameen miltee hai
49pooray mulk ko taqseem karnay kay baad israaeeliyon nay yashooa bin noon ko bhee apnay darmiyaan kuchh mauroosee zameen day dee. 50rabb kay hukm par unhon nay usay ifraaeem ka shaher timnat-sirah day diya. yashooa nay khud is kee darakhwaast kee thee. vahaan ja kar us nay shaher ko az sar-ay-nau taameer kiya aur us men aabaad hua.
51gharaz yah vah tamaam zameenen hain jo ileeazar imaam, yashooa bin noon aur qabeelon kay aabaaee gharaanon kay sarbaraahon nay saila men mulaaqaat kay khaimay kay darvaazay par qur’a daal kar taqseem kee theen. yoon taqseem karnay ka yah kaam mukammal hua.