Yashua 18

baaqee saat qabeelon ko zameen miltee hai

¹kan’aan par ghaalib aanay kay baad israaeel kee pooree jamaaat saila shaher men jama huee. vahaan unhon nay mulaaqaat ka khaima khada kiya.

²ab tak saat qabeelon ko zameen naheen milee thee. ³yashooa nay israaeeliyon ko samjha kar kaha, “aap kitnee der tak sust rahengay? aap kab tak us mulk par qabza naheen karengay jo rabb aap kay baapdaada kay khuda nay aap ko day diya hai? ⁴ab har qabeelay kay teen teen aadmiyon ko chun len. unhen main mulk ka daura karnay kay liyay bhej doonga taaki vah tamaam qabaailee ilaaqon kee faherist tayyaar karen. is kay baad vah meray paas vaapas a kar ⁵mulk ko saat ilaaqon men taqseem karen. lekin dhyaan rakhen ki junoob men yahoodaah ka ilaaqa aur shimaal men ifraaeem aur manassee ka ilaaqa hai. un kee sarhadden mat chhedna! ⁶vah aadmee likh len ki saat naay qabaailee ilaaqon kee sarhadden kahaan kahaan tak hain aur phir in kee faheristen pesh karen. phir main rabb aap kay khuda kay huzoor muqaddas qur’a daal kar har ek kee zameen muqarrar karoonga. ⁷yaad rahay ki laaviyon ko koee ilaaqa naheen milna hai. un ka hissa yah hai ki vah rabb kay imaam hain. aur jad, roobin aur manassee kay aadhay qabeelay ko bhee mazeed kuchh naheen milna hai, kyoonki unhen rabb kay khaadim moosa say darya-ay-yardan kay mashriq men un ka hissa mil chuka hai.”

⁸tab vah aadmee ravaana honay kay liyay tayyaar huay jinhen mulk ka daura karnay kay liyay chuna gaya tha. yashooa nay unhen hukm diya, “pooray mulk men say guzar kar tamaam shaheron kee faherist banaaen. jab faherist mukammal ho jaaay to usay meray paas lay aaen. phir main saila men rabb kay huzoor aap kay liyay qur’a daal doonga.” ⁹aadmee chalay gaay aur pooray mulk men say guzar kar tamaam shaheron kee faherist bana lee. unhon nay mulk ko saat hisson men taqseem karkay tamaam tafseelaat kitaab men darj keen aur yah kitaab saila kee khaimaagaah men yashooa ko day dee. ¹⁰phir yashooa nay rabb kay huzoor qur’a daal kar yah ilaaqay baaqee saat qabeelon aur un kay kumbon men taqseem kar diay.

binyameen ka ilaaqaa

¹¹jab qur’a daala gaya to binyameen kay qabeelay aur us kay kumbon ko pahela hissa mil gaya. us kee zameen yahoodaah aur yoosuf kay qabeelon kay darmiyaan thee. ¹²us kee shimaalee sarhadd darya-ay-yardan say shuroo huee aur yareehoo kay shimaal men pahaadee dhalaan par chadh kar pahaadee ilaaqay men say maghrib kee taraf guzree. bait-aavan kay biyaabaan ko pahunchnay par ¹³vah looz yaanee bait-el kee taraf badh kar shaher kay junoob men pahaadee dhalaan par chaltee chaltee aagay nikal gaee. vahaan say vah ataaraat-addaar aur us pahaadee tak pahunchee jo nishebee bait-hauroon kay junoob men hai. ¹⁴phir vah junoob kee taraf mud kar maghribee sarhadd kay taur par qiryat-baal yaanee qiryat-yaareem kay paas aaee jo yahoodaah kay qabeelay kee milkiyat thee. ¹⁵binyameen kee junoobee sarhadd qiryat-yaareem kay maghribee kinaaray say shuroo ho kar niftooh chashma tak pahunchee. ¹⁶phir vah us pahaad kay daaman par utar aaee jo vaadee-ay-bin-hinnoom kay maghrib men aur maidaan-ay-rafaaeem kay shimaal men vaaqay hai. is kay baad sarhadd yaboosiyon kay shaher kay junoob men say guzree aur yoon vaadee-ay-hinnoom ko paar karkay ain-raajil kay paas aaee. ¹⁷phir vah shimaal kee taraf mud kar ain-shams kay paas say guzree aur darra-ay-adummeem kay muqaabil shaher jaleelot tak pahunch kar roobin kay betay bohan kay patthar kay paas utar aaee. ¹⁸vahaan say vah us dhalaan kay shimaalee rukh par say guzree jo vaadee-ay-yardan kay maghribee kinaaray par hai. phir vah vaadee men utar kar ¹⁹bait-hujlaah kee shimaalee pahaadee dhalaan say guzree aur baheera-ay-murdaar kay shimaalee kinaaray par khatm huee, vahaan jahaan darya-ay-yardan us men baheta hai. yah thee binyameen kee junoobee sarhadd. ²⁰us kee mashriqee sarhadd darya-ay-yardan thee. yahee vah ilaaqa tha jo binyameen kay qabeelay ko us kay kumbon kay mutaabiq diya gaya.

²¹zail kay shaher is ilaaqay men shaamil thay : yareehoo, bait-hujlaah, imaq-qasees, ²²bait-araaba, samraim, bait-el, ²³avveem, faara, ufra, ²⁴kafar-ul-ammonee, ufnee aur jiba. yah kul 12 shaher thay. har shaher kay gird-o-navaah kee aabaadiyaan us kay saath ginee jaatee theen. ²⁵in kay ilaava yah shaher bhee thay : jibaoon, raama, bairot, ²⁶misfaah, kafeera, mauza, ²⁷raqam, irfael, taraala, ²⁸zila, alif, yaboosiyon ka shaher yarooshalam, jibia aur qiryat-yaareem. in shaheron kee taadaad 14 thee. har shaher kay gird-o-navaah kee aabaadiyaan us kay saath ginee jaatee theen. yah tamaam shaher binyameen aur us kay kumbon kee milkiyat thay.