Yashua 17

manassee ka ilaaqaa

¹yoosuf kay pahelauthay manassee kee aulaad ko do ilaaqay mil gaay. darya-ay-yardan kay mashriq men makeer kay gharaanay ko jiliaad aur basan diay gaay. makeer manassee ka pahelautha aur jiliaad ka baap tha, aur us kee aulaad maahir faujee thee. ²ab qur’a daalnay say darya-ay-yardan kay maghrib men vah ilaaqa muqarrar kiya gaya jahaan manassee kay baaqee beton kee aulaad ko aabaad hona tha. in kay chhah kumbay thay jin kay naam abeeazar, khalaq, asreeel, sikam, hifar aur sameeda thay.

³silaafihaad bin hifar bin jiliaad bin makeer bin manassee kay betay naheen thay balki sirf betiyaan. un kay naam mahelaah, nooaah, hujlaah, milkaah aur tirza thay. ⁴yah khavaateen ileeazar imaam, yashooa bin noon aur qaum kay buzurgon kay paas aaeen aur kahenay lageen, “rabb nay moosa ko hukm diya tha ki vah hamen bhee qabaailee ilaaqay ka koee hissa day.” yashooa nay rabb ka hukm maan kar na sirf manassee kee nareena aulaad ko zameen dee balki unhen bhee. ⁵nateejay men manassee kay qabeelay ko darya-ay-yardan kay maghrib men zameen kay das hissay mil gaay aur mashriq men jiliaad aur basan. ⁶maghrib men na sirf manassee kee nareena aulaad kay khaandaanon ko zameen milee balki betiyon kay khaandaanon ko bhee. is kay bar’aks mashriq men jiliaad kee zameen sirf nareena aulaad men taqseem kee gaee.

⁷manassee kay qabeelay kay ilaaqay kee sarhadd aashar say shuroo huee aur sikam kay mashriq men vaaqay mikmataah say ho kar junoob kee taraf chaltee huee ain-taffooah kee aabaadee tak pahunchee. ⁸taffooah kay gird-o-navaah kee zameen ifraaeem kee milkiyat thee, lekin manassee kee sarhadd par kay yah shaher manassee kee apnee milkiyat thay. ⁹vahaan say sarhadd qaana nadee kay junoobee kinaaray tak utree. phir nadee kay saath chaltee chaltee vah samundar par khatm huee. nadee kay junoobee kinaaray par kuchh shaher ifraaeem kee milkiyat thay agarchi vah manassee kay ilaaqay men thay. ¹⁰lekin majmooee taur par manassee ka qabaailee ilaaqa qaana nadee kay shimaal men tha aur ifraaeem ka ilaaqa us kay junoob men. donon qabeelon ka ilaaqa maghrib men samundar par khatm hua. manassee kay ilaaqay kay shimaal men aashar ka qabaailee ilaaqa tha aur mashriq men ishkaar ka.

¹¹aashar aur ishkaar kay ilaaqon kay darj-ay-zail shaher manassee kee milkiyat thay : bait-shaan, ibleeaam, dor yaanee naafat-dor, ain-dor, taanak aur majiddo un kay gird-o-navaah kee aabaadiyon samet. ¹²lekin manassee ka qabeela vahaan kay kan’aaniyon ko nikaal na saka balki vah vahaan bastay rahay. ¹³baad men bhee jab israaeel kee taaqat badh gaee to kan’aaniyon ko nikaala na gaya balki unhen begaar men kaam karna pada.

ifraaeem aur manassee mazeed zameen ka taqaaza kartay hain

¹⁴yoosuf kay qabeelay ifraaeem aur manassee darya-ay-yardan kay maghrib men zameen paanay kay baad yashooa kay paas aaay aur kahenay lagay, “aap nay hamaaray liyay qur’a daal kar zameen ka sirf ek hissa kyoon muqarrar kiya? ham to bahut ziyaada log hain, kyoonki rabb nay hamen barkat day kar badee qaum banaaya hai.”

¹⁵yashooa nay javaab diya, “agar aap itnay ziyaada hain aur aap kay liyay ifraaeem ka pahaadee ilaaqa kaafee naheen hai to phir farizziyon aur rafaaiyon kay pahaadee jangalon men jaaen aur unhen kaat kar kaasht kay qaabil bana len.”

¹⁶yoosuf kay qabeelon nay kaha, “pahaadee ilaaqa hamaaray liyay kaafee naheen hai, aur maidaanee ilaaqay men aabaad kan’aaniyon kay paas lohay kay rath hain, un kay paas bhee jo vaadee-ay-yazrael men hain aur un kay paas bhee jo bait-shaan aur us kay gird-o-navaah kee aabaadiyon men rahetay hain.”

¹⁷lekin yashooa nay javaab men kaha, “aap itnee badee aur taaqatvar qaum hain ki aap ka ilaaqa ek hee hissay par mahdood naheen rahegaa ¹⁸balki jangal ka pahaadee ilaaqa bhee aap kee milkiyat men aaega. us kay jangalon ko kaat kar kaasht kay qaabil bana len to yah tamaam ilaaqa aap hee ka hoga. aap baaqee ilaaqay par bhee qabza karkay kan’aaniyon ko nikaal dengay agarchi vah taaqatvar hain aur un kay paas lohay kay rath hain.”