Yashua 14
kan’aan kee taqseem
1israaeel kay baaqee saadhay nau qabeelon ko darya-ay-yardan kay maghrib men yaanee mulk-ay-kan’aan men zameen mil gaee. is kay liyay ileeazar imaam, yashooa bin noon aur qabeelon kay aabaaee gharaanon kay sarbaraahon ne 2qur’a daal kar muqarrar kiya ki har qabeelay ko kaun kaun sa ilaaqa mil jaaay. yoon vaisa hee hua jis tarah rabb nay moosa ko hukm diya tha. 3-4 moosa adhaaee qabeelon ko un kee mauroosee zameen darya-ay-yardan kay mashriq men day chuka tha, kyoonki yoosuf kee aulaad kay do qabeelay manassee aur ifraaeem vujood men aaay thay. lekin laaviyon ko un kay darmiyaan zameen na mil gaee. israaeeliyon nay laaviyon ko zameen na dee balki unhen sirf rihaaish kay liyay shaher aur revdon kay liyay charaagaahen deen. 5yoon unhon nay zameen ko un hee hidaayaat kay mutaabiq taqseem kiya jo rabb nay moosa ko dee theen.
kaalib habroon paanay kee guzaarish karta hai
6jiljaal men yahoodaah kay qabeelay kay mard yashooa kay paas aaay. yafunna qanizzee ka beta kaalib bhee un kay saath tha. us nay yashooa say kaha, “aap ko yaad hai ki rabb nay mard-ay-khuda moosa say aap kay aur meray baaray men kya kuchh kaha jab ham qaadis-barneea men thay. 7main 40 saal ka tha jab rabb kay khaadim moosa nay mujhay mulk-ay-kan’aan ka jaaiza lenay kay liyay qaadis-barneea say bhej diya. jab vaapas aaya to main nay moosa ko diyaanatdaaree say sab kuchh bataaya jo dekha tha. 8afsos ki jo bhaaee meray saath gaay thay unhon nay logon ko daraaya. lekin main rabb apnay khuda ka vafaadaar raha. 9us din moosa nay qasam kha kar mujh say vaada kiya, ‘jis zameen par teray paaon chalay hain vah hamesha tak teree aur teree aulaad kee viraasat men rahegee. kyoonki too rabb meray khuda ka vafaadaar raha hai.’ 10aur ab aisa hee hua hai jis tarah rabb nay vaada kiya tha. us nay mujhay ab tak zinda rahenay diya hai. rabb ko moosa say yah baat kiay 45 saal guzar gaay hain. us saaray arsay men ham registaan men ghoomtay phirtay rahay hain. aaj main 85 saal ka hoon, 11aur ab tak utna hee taaqatvar hoon jitna ki us vaqt tha jab main jaasoos tha. ab tak meree baahar nikalnay aur jang karnay kee vahee quvvat qaaim hai. 12ab mujhay vah pahaadee ilaaqa day den jis ka vaada rabb nay us din mujh say kiya tha. aap nay khud suna hai ki anaaqee vahaan baday qil’aaband shaheron men bastay hain. lekin shaayad rabb meray saath ho aur main unhen nikaal doon jis tarah us nay farmaaya hai.”
13tab yashooa nay kaalib bin yafunna ko barkat day kar usay viraasat men habroon day diya. 14-15 pahelay habroon qiryat-arba yaanee arba ka shaher kahelaata tha. arba anaaqiyon ka sab say bada aadmee tha. aaj tak yah shaher kaalib kee aulaad kee milkiyat rahee hai. vajah yah hai ki kaalib rabb israaeel kay khuda ka vafaadaar raha. phir jang khatm huee, aur mulk men amn-o-amaan qaaim ho gaya.