Yashua 13
kan’aan kay baaqee ilaaqon par qabza karnay ka hukm
1jab yashooa boodha tha to rabb nay us say kaha, “too bahut boodha ho chuka hai, lekin abhee kaafee kuchh baaqee rah gaya hai jis par qabza karnay kee zaroorat hai. 2-3 is men filistiyon kay tamaam ilaaqay un kay shaahee shaheron ghazza, ashdood, asqaloon, jaat aur aqroon samet shaamil hain aur isee tarah jasoor ka ilaaqa jis kee junoobee sarhadd vaadee-ay-saihoor hai jo misr kay mashriq men hai aur jis kee shimaalee sarhadd aqroon hai. usay bhee mulk-ay-kan’aan ka hissa qaraar diya jaata hai. avviyon ka ilaaqa bhee 4jo junoob men hai ab tak israaeel kay qabzay men naheen aaya. yahee baat shimaal par bhee saadiq aatee hai. saidaaniyon kay shaher m’aara say lay kar afeeq shaher aur amoriyon kee sarhadd tak sab kuchh ab tak israaeel kee hukoomat say baahar hai. 5is kay ilaava jabliyon ka mulk aur mashriq men poora lubnaan harmoon pahaad kay daaman men baal-jad say lay kar labo-hamaat tak baaqee rah gaya hai. 6is men un saidaaniyon ka tamaam ilaaqa bhee shaamil hai jo lubnaan kay pahaadon aur misrafaat-maaim kay darmiyaan kay pahaadee ilaaqay men aabaad hain. israaeeliyon kay badhtay badhtay main khud hee in logon ko un kay saamnay say nikaal doonga. lekin laazim hai ki too qur’a daal kar yah poora mulk meray hukm kay mutaabiq israaeeliyon men taqseem karay. 7usay nau baaqee qabeelon aur manassee kay aadhay qabeelay ko viraasat men day day.”
yardan kay mashriq men mulk kee taqseem
8rabb ka khaadim moosa roobin, jad aur manassee kay baaqee aadhay qabeelay ko darya-ay-yardan ka mashriqee ilaaqa day chuka tha. 9-10 yoon hasbon kay amoree baadshaah seehon kay tamaam shaher un kay qabzay men a gaay thay yaanee junoobee vaadee-ay-arnon kay kinaaray par shaher aroeer aur usee vaadee kay beech kay shaher say lay kar shimaal men ammoniyon kee sarhadd tak. deebon aur meedba kay darmiyaan ka maidaan-ay-murtafa bhee is men shaamil thaa 11aur isee tarah jiliaad, jasooriyon aur maakaatiyon ka ilaaqa, harmoon ka pahaadee ilaaqa aur salka shaher tak basan ka saara ilaaqa bhee.
12pahelay yah saara ilaaqa basan kay baadshaah oj kay qabzay men tha jis kee hukoomat kay markaz astaaraat aur idraee thay. rafaaiyon kay deo qabeelay say sirf oj baaqee rah gaya tha. moosa kee raahanumaaee kay tahet israaeeliyon nay us ilaaqay par fatah pa kar tamaam baashindon ko nikaal diya tha. 13sirf jasooree aur maakaatee baaqee rah gaay thay, aur yah aaj tak israaeeliyon kay darmiyaan rahetay hain.
14sirf laavee kay qabeelay ko koee zameen na milee, kyoonki un ka mauroosee hissa jalnay vaalee vah qurbaaniyaan hain jo rabb israaeel kay khuda kay liyay chadhaaee jaatee hain. rabb nay yahee kuchh moosa ko bataaya tha.
roobin ka qabaailee ilaaqaa
15moosa nay roobin kay qabeelay ko us kay kumbon kay mutaabiq zail ka ilaaqa diya. 16vaadee-ay-arnon kay kinaaray par shaher aroeer aur usee vaadee kay beech kay shaher say lay kar meedbaa 17aur hasbon tak. vahaan kay maidaan-ay-murtafa par vaaqay tamaam shaher bhee roobin kay sapurd kiay gaay yaanee deebon, baamaat-baal, bait-baal-maoon, 18yahez, qadeemaat, mifaat, 19qiryataaim, sibmaah, zirat-us-saher jo baheera-ay-murdaar kay mashriq men vaaqay pahaadee ilaaqay men hai, 20bait-faghoor, pisga kay pahaadee silsilay par maujood aabaadiyaan aur bait-yaseemot. 21maidaan-ay-murtafa kay tamaam shaher roobin kay qabeelay ko diay gaay yaanee amoriyon kay baadshaah seehon kee pooree baadshaahee jis ka daar-ul-hakoomat hasbon shaher tha. moosa nay seehon ko maar daala tha aur us kay saath paanch midiyaanee raeeson ko bhee jinhen seehon nay apnay mulk men muqarrar kiya tha. in raeeson kay naam ivee, raqam, soor, hoor aur raba thay. 22jin logon ko us vaqt maara gaya un men say bal’aam bin baor bhee tha jo ghaibdaan tha. 23roobin kay qabeelay kee maghribee sarhadd darya-ay-yardan thee. yahee shaher aur aabaadiyaan roobin kay qabeelay ko us kay kumbon kay mutaabiq dee gaeen, aur vah us kee meeraas thahereen.
jad kay qabeelay ka ilaaqaa
24moosa nay jad kay qabeelay ko us kay kumbon kay mutaabiq zail ka ilaaqa diya. 25yaazer ka ilaaqa, jiliaad kay tamaam shaher, ammoniyon ka aadha hissa rabba kay qareeb shaher aroeer tak 26-27 aur hasbon kay baadshaah seehon kee baadshaahee ka baaqee shimaalee hissa yaanee hasbon, raamat-ul-misfaah aur batooneem kay darmiyaan ka ilaaqa aur mahenaaim aur dabeer kay darmiyaan ka ilaaqa. is kay ilaava jad ko vaadee-ay-yardan ka vah mashriqee hissa bhee mil gaya jo bait-haaram, bait-nimra, sukkaat aur safon par mushtamil tha. yoon us kee shimaalee sarhadd kinnarat yaanee galeel kee jheel ka junoobee kinaara tha. 28yahee shaher aur aabaadiyaan jad kay qabeelay ko us kay kumbon kay mutaabiq dee gaeen, aur vah us kee meeraas thahereen.
manassee kay mashriqee hissay ka ilaaqaa
29jo ilaaqa moosa nay manassee kay aadhay hissay ko us kay kumbon kay mutaabiq diya thaa 30vah mahenaaim say lay kar shimaal men oj baadshaah kee tamaam baadshaahee par mushtamil tha. us men mulk-ay-basan aur vah 60 aabaadiyaan shaamil theen jin par yaaeer nay fatah paaee thee. 31jiliaad ka aadha hissa oj kee hukoomat kay do maraakiz astaaraat aur idraee samet makeer bin manassee kee aulaad ko us kay kumbon kay mutaabiq diya gaya. 32moosa nay in mauroosee zameenon kee taqseem us vaqt kee thee jab vah darya-ay-yardan kay mashriq men moaab kay maidaanee ilaaqay men yareehoo shaher kay muqaabil tha.
33lekin laavee ko moosa say koee mauroosee zameen naheen milee thee, kyoonki rabb israaeel ka khuda un ka mauroosee hissa hai jis tarah us nay un say vaada kiya tha.