Yashua 11

shimaalee ittihaadiyon par fatah

¹jab hasoor kay baadshaah yaabeen ko in vaaqiaat kee khabar milee to us nay madoon kay baadshaah yoobaab aur simron aur akshaaf kay baadshaahon ko paighaam bhejay. ²is kay ilaava us nay un baadshaahon ko paighaam bhejay jo shimaal men thay yaanee shimaalee pahaadee ilaaqay men, vaadee-ay-yardan kay us hissay men jo kinnarat yaanee galeel kay junoob men hai, maghrib kay nishebee pahaadee ilaaqay men, maghrib men vaaqay naafat-dor men ³aur kan’aan kay mashriq aur maghrib men. yaabeen nay amoriyon, hittiyon, farizziyon, pahaadee ilaaqay kay yaboosiyon aur harmoon pahaad kay daaman men vaaqay mulk-ay-misfaah kay hivviyon ko bhee paighaam bhejay.

⁴chunaanchay yah apnee tamaam faujon ko lay kar jang kay liyay niklay. un kay aadmee samundar kay saahil kee ret kee maanind beshumaar thay. un kay paas mut’addid ghoday aur rath bhee thay. ⁵in tamaam baadshaahon nay israaeel say ladnay kay liyay muttahid ho kar apnay khaimay maroom kay chashmay par laga diay.

⁶rabb nay yashooa say kaha, “un say mat darna, kyoonki kal isee vaqt tak main nay un sab ko halaak karkay israaeel kay havaalay kar diya hoga. tujhay un kay ghodon kee konchon ko kaatna aur un kay rathon ko jala dena hai.” ⁷chunaanchay yashooa apnay tamaam faujiyon ko lay kar maroom kay chashmay par aaya aur achaanak dushman par hamla kiya. ⁸aur rabb nay dushmanon ko israaeeliyon kay havaalay kar diya. israaeeliyon nay unhen shikast dee aur un ka taaqqub kartay kartay shimaal men baday shaher saida aur misrafaat-maaim tak ja pahunchay. isee tarah unhon nay mashriq men vaadee-ay-misfaah tak bhee un ka taaqqub kiya. aakhir men ek bhee na bacha. ⁹rabb kee hidaayat kay mutaabiq yashooa nay dushman kay ghodon kee konchon ko katva kar us kay rathon ko jala diya.

shimaalee kan’aan par qabzaa

¹⁰phir yashooa vaapas aaya aur hasoor ko apnay qabzay men lay liya. hasoor un tamaam baadashaahaton ka sadar maqaam tha jinhen unhon nay shikast dee thee. israaeeliyon nay shaher kay baadshaah ko maar diyaa ¹¹aur shaher kay har jaandaar ko allaah kay havaalay karkay halaak kar diya. ek bhee na bacha. phir yashooa nay shaher ko jala diya.

¹²isee tarah yashooa nay un baaqee baadshaahon kay shaheron par bhee qabza kar liya jo israaeel kay khilaaf muttahid ho gaay thay. har shaher ko us nay rabb kay khaadim moosa kay hukm kay mutaabiq tabaah kar diya. baadshaahon samet sab kuchh nest kar diya gaya. ¹³lekin yashooa nay sirf hasoor ko jalaaya. pahaadiyon par kay baaqee shaheron ko us nay rahenay diya. ¹⁴loot ka jo bhee maal jaanvaron samet un men paaya gaya usay israaeeliyon nay apnay paas rakh liya. lekin tamaam baashindon ko unhon nay maar daala aur ek bhee na bachnay diya. ¹⁵kyoonki rabb nay apnay khaadim moosa ko yahee hukm diya tha, aur yashooa nay sab kuchh vaisay hee kiya jaisay rabb nay moosa ko hukm diya tha.

¹⁶yoon yashooa nay pooray kan’aan par qabza kar liya. is men pahaadee ilaaqa, poora dasht-ay-najab, jushan ka poora ilaaqa, maghrib ka nishebee pahaadee ilaaqa, vaadee-ay-yardan aur israaeel kay pahaad un kay daaman kee pahaadiyon samet shaamil thay. ¹⁷ab yashooa kee pahunch junoob men saeer kee taraf badhnay vaalay pahaad khalaq say lay kar lubnaan kay maidaanee ilaaqay kay shaher baal-jad tak thee jo harmoon pahaad kay daaman men tha. yashooa nay in ilaaqon kay tamaam baadshaahon ko pakad kar maar daala. ¹⁸lekin in baadshaahon say jang karnay men bahut vaqt laga, ¹⁹kyoonki jibaoon men rahenay vaalay hivviyon kay ilaava kisee bhee shaher nay israaeeliyon say sulah na kee. is liyay israaeel ko un sab par jang karkay hee qabza karna pada. ²⁰rabb hee nay unhen akadnay diya tha taaki vah israaeel say jang karen aur un par rahem na kiya jaaay balki unhen pooray taur par rabb kay havaalay karkay halaak kiya jaaay. laazim tha ki unhen yoon nest-o-naabood kiya jaaay jis tarah rabb nay moosa ko hukm diya tha.

²¹us vaqt yashooa nay un tamaam anaaqiyon ko halaak kar diya jo habroon, dabeer, anaab aur un tamaam jagahon men rahetay thay jo yahoodaah aur israaeel kay pahaadee ilaaqay men theen. us nay un sab ko un kay shaheron samet allaah kay havaalay karkay tabaah kar diya. ²²israaeel kay pooray ilaaqay men anaaqiyon men say ek bhee na bacha. sirf ghazza, jaat aur ashdood men kuchh zinda rahay.

²³gharaz yashooa nay pooray mulk par yoon qabza kiya jis tarah rabb nay moosa ko bataaya tha. phir us nay usay qabeelon men taqseem karkay israaeel ko meeraas men day diya. jang khatm huee, aur mulk men amn-o-amaan qaaim ho gaya.