Yashua 10

amoriyon kee shikast

1yarooshalam kay baadshaah adoonee-sidq ko khabar milee ki yashooa nay aee par yoon qabza karkay usay mukammal taur par tabaah kar diya hai jis tarah us nay yareehoo aur us kay baadshaah kay saath bhee kiya tha. usay yah ittila bhee dee gaee ki jibaoon kay baashinday israaeeliyon kay saath sulah ka muaahada karkay un kay darmiyaan rah rahay hain. 2yah sun kar vah aur us kee qaum nihaayat dar gaay, kyoonki jibaoon bada shaher tha. vah ahemiyat kay lihaaz say un shaheron kay baraabar tha jin kay baadshaah thay, balki vah aee shaher say bhee bada tha, aur us kay tamaam mard behtareen faujee thay.

3chunaanchay yarooshalam kay baadshaah adoonee-sidq nay apnay qaasid habroon kay baadshaah hoohaam, yarmoot kay baadshaah peeraam, lakees kay baadshaah yafeea aur ijloon kay baadshaah dabeer kay paas bhej diay. 4paighaam yah tha, “aaen aur jibaoon par hamla karnay men meree madad karen, kyoonki us nay yashooa aur israaeeliyon kay saath sulah ka muaahada kar liya hai.” 5yarooshalam, habroon, yarmoot, lakees aur ijloon kay yah paanch amoree baadshaah muttahid huay. vah apnay tamaam faujiyon ko lay kar chal paday aur jibaoon ka muhaasara karkay us say jang karnay lagay.

6us vaqt yashooa nay apnay khaimay jiljaal men lagaaay thay. jibaoon kay logon nay usay paighaam bhej diya, “apnay khaadimon ko tark na karen. jaldee say hamaaray paas a kar hamen bachaaen! hamaaree madad keejiay, kyoonki pahaadee ilaaqay kay tamaam amoree baadshaah hamaaray khilaaf muttahid ho gaay hain.”

7yah sun kar yashooa apnee pooree fauj kay saath jiljaal say nikla aur jibaoon kay liyay ravaana hua. us kay behtareen faujee bhee sab us kay saath thay. 8rabb nay yashooa say kaha, “un say mat darna, kyoonki main unhen teray haath men kar chuka hoon. un men say ek bhee tera muqaabla naheen karnay paaega.” 9aur yashooa nay jiljaal say saaree raat safar kartay kartay achaanak dushman par hamla kiya. 10us vaqt rabb nay israaeeliyon kay dekhtay dekhtay dushman men abtaree paida kar dee, aur unhon nay jibaoon kay qareeb dushman ko zabardast shikast dee. israaeelee bait-hauroon tak pahunchaanay vaalay raastay par amoriyon ka taaqqub kartay kartay unhen azeeqa aur maqqeda tak maut kay ghaat utaartay gaay. 11aur jab amoree is raastay par azeeqa kee taraf bhaag rahay thay to rabb nay aasmaan say un par baday baday olay barsaaay jinhon nay israaeeliyon kee nisbat ziyaada dushmanon ko halaak kar diya.

12us din jab rabb nay amoriyon ko israaeel kay haath men kar diya to yashooa nay israaeeliyon kee maujoodgee men rabb say kaha,

“ai sooraj, jibaoon kay oopar ruk ja!
ai chaand, vaadee-ay-ayyaalon par thaher ja!”

13tab sooraj ruk gaya, aur chaand nay aagay harkat na kee. jab tak ki israaeel nay apnay dushmanon say poora badla na lay liya us vaqt tak vah rukay rahay. is baat ka zikr yaashar kee kitaab men kiya gaya hai. sooraj aasmaan kay beech men ruk gaya aur taqreeban ek pooray din kay dauraan ghuroob na hua. 14yah din munfarid tha. rabb nay insaan kee is tarah kee dua na kabhee is say pahelay, na kabhee is kay baad sunee. kyoonki rabb khud israaeel kay liyay lad raha tha. 15is kay baad yashooa pooray israaeel samet jiljaal kee khaimaagaah men laut aaya.

paanch amoree baadshaahon kee giriftaaree

16lekin paanchon amoree baadshaah faraar ho kar maqqeda kay ek ghaar men chhup gaay thay. 17yashooa ko ittila dee gaee 18to us nay kaha, “kuchh baday baday patthar ludhka kar ghaar ka munh band karna, aur kuchh aadmee us kee paheraadaaree karen. 19lekin baaqee log na ruken balki dushmanon ka taaqqub karkay peechhay say unhen maartay jaaen. unhen dubaara apnay shaheron men daakhil honay ka mauqa mat dena, kyoonki rabb aap kay khuda nay unhen aap kay haath men kar diya hai.” 20chunaanchay yashooa aur baaqee israaeelee unhen halaak kartay rahay, aur kam hee apnay shaheron kee faseel men daakhil ho sakay. 21is kay baad pooree fauj saheeh-salaamat yashooa kay paas maqqeda kee lashkargaah men vaapas pahunch gaee.

ab say kisee men bhee israaeeliyon ko dhamkee denay kee jur’at na rahee.

22phir yashooa nay kaha, “ghaar kay munh ko khol kar yah paanch baadshaah meray paas nikaal laaen.” 23log ghaar ko khol kar yarooshalam, habroon, yarmoot, lakees aur ijloon kay baadshaahon ko yashooa kay paas nikaal laaay. 24yashooa nay israaeel kay mardon ko bula kar apnay saath khaday faujee afsaron say kaha, “idhar a kar apnay pairon ko baadshaahon kee gardanon par rakh den.” afsaron nay aisa hee kiya. 25phir yashooa nay un say kaha, “na daren aur na hausla haaren. mazboot aur diler hon. rabb yahee kuchh un tamaam dushmanon kay saath karega jin say aap ladengay.” 26yah kah kar us nay baadshaahon ko halaak karkay un kee laashen paanch darakhton say latka deen. vahaan vah shaam tak latkee raheen. 27jab sooraj doobnay laga to logon nay yashooa kay hukm par laashen utaar kar us ghaar men phaink deen jis men baadshaah chhup gaay thay. phir unhon nay ghaar kay munh ko baday baday pattharon say band kar diya. yah patthar aaj tak vahaan paday huay hain.

mazeed amoree shaheron par qabzaa

28us din maqqeda yashooa kay qabzay men a gaya. us nay pooray shaher ko talvaar say rabb kay liyay makhsoos karkay tabaah kar diya. baadshaah samet sab halaak huay aur ek bhee na bacha. shaher kay baadshaah kay saath us nay vah sulook kiya jo us nay yareehoo kay baadshaah kay saath kiya tha.

29phir yashooa nay tamaam israaeeliyon kay saath vahaan say aagay nikal kar libna par hamla kiya. 30rabb nay us shaher aur us kay baadshaah ko bhee israaeel kay haath men kar diya. yashooa nay talvaar say shaher kay tamaam baashindon ko halaak kiya, aur ek bhee na bacha. baadshaah kay saath us nay vahee sulook kiya jo us nay yareehoo kay baadshaah kay saath kiya tha.

31is kay baad us nay tamaam israaeeliyon kay saath libna say aagay badh kar lakees ka muhaasara kiya. jab us nay us par hamla kiyaa 32to rabb nay yah shaher us kay baadshaah samet israaeel kay haath men kar diya. doosray din vah yashooa kay qabzay men a gaya. shaher kay saaray baashindon ko us nay talvaar say halaak kiya, jis tarah ki us nay libna kay saath bhee kiya tha. 33saath saath yashooa nay jazar kay baadshaah hooram aur us kay logon ko bhee shikast dee jo lakees kee madad karnay kay liyay aaay thay. un men say ek bhee na bacha.

34phir yashooa nay tamaam israaeeliyon kay saath lakees say aagay badh kar ijloon ka muhaasara kar liya. usee din unhon nay us par hamla karke 35us par qabza kar liya. jis tarah lakees kay saath hua usee tarah ijloon kay saath bhee kiya gaya yaanee shaher kay tamaam baashinday talvaar say halaak huay.

36is kay baad yashooa nay tamaam israaeeliyon kay saath ijloon say aagay badh kar habroon par hamla kiya. 37shaher par qabza karkay unhon nay baadshaah, ird-gird kee aabaadiyaan aur baashinday sab kay sab tah-ay-tegh kar diay. koee na bacha. ijloon kee tarah unhon nay usay pooray taur par tamaam baashindon samet rabb kay liyay makhsoos karkay tabaah kar diya.

38phir yashooa tamaam israaeeliyon kay saath mud kar dabeer kee taraf badh gaya. us par hamla karke 39us nay shaher, us kay baadshaah aur ird-gird kee aabaadiyon par qabza kar liya. sab ko nest kar diya gaya, ek bhee na bacha. yoon dabeer kay saath vah kuchh hua jo pahelay habroon aur libna us kay baadshaah samet hua tha.

40is tarah yashooa nay junoobee kan’aan kay tamaam baadshaahon ko shikast day kar un kay pooray mulk par qabza kar liya yaanee mulk kay pahaadee ilaaqay par, junoob kay dasht-ay-najab par, maghrib kay nishebee pahaadee ilaaqay par aur vaadee-ay-yardan kay maghrib men vaaqay pahaadee dhalaanon par. us nay kisee ko bhee bachnay na diya balki har jaandaar ko rabb kay liyay makhsoos karkay halaak kar diya. yah sab kuchh vaisa hee hua jaisa rabb israaeel kay khuda nay hukm diya tha.

41yashooa nay unhen qaadis-barneea say lay kar ghazza tak aur jushan kay pooray ilaaqay say lay kar jibaoon tak shikast dee. 42in tamaam baadshaahon aur un kay mamaalik par yashooa nay ek hee vaqt fatah paaee, kyoonki israaeel ka khuda israaeel kay liyay lada.

43is kay baad yashooa tamaam israaeeliyon kay saath jiljaal kee khaimaagaah men laut aaya.