Yashua 1

rabb yashooa ko raahanumaaee kee zimmaadaaree saumpta hai

¹rabb kay khaadim moosa kee maut kay baad rabb moosa kay madadgaar yashooa bin noon say hamkalaam hua. us nay kaha, ²“mera khaadim moosa faut ho gaya hai. ab uth, is pooree qaum kay saath darya-ay-yardan ko paar karkay us mulk men daakhil ho ja jo main israaeeliyon ko denay ko hoon. ³jis zameen par bhee too apna paaon rakhega usay main moosa kay saath kiay gaay vaaday kay mutaabiq tujhay doonga. ⁴tumhaaray mulk kee sarhadden yah hongee : junoob men najab ka registaan, shimaal men lubnaan, mashriq men darya-ay-furaat aur maghrib men baheera-ay-room. hittee qaum ka poora ilaaqa is men shaamil hoga. ⁵teray jeetay jee koee tera saamna naheen kar sakega. jis tarah main moosa kay saath tha, usee tarah teray saath bhee hoonga. main tujhay kabhee naheen chhodoonga, na tujhay tark karoonga.

⁶mazboot aur diler ho, kyoonki too hee is qaum ko meeraas men vah mulk dega jis ka main nay un kay baapdaada say qasam kha kar vaada kiya tha. ⁷lekin khabardaar, mazboot aur bahut diler ho. ehatiyaat say us pooree shareeat par amal kar jo meray khaadim moosa nay tujhay dee hai. us say na daaeen aur na baaeen taraf hatna. phir jahaan kaheen bhee too jaaay kaamyaab hoga. ⁸jo baaten is shareeat kee kitaab men likhee hain vah teray munh say na haten. din raat un par ghaur karta rah taaki too ehatiyaat say is kee har baat par amal kar sakay. phir too har kaam men kaamyaab aur khushhaal hoga.

⁹main phir kaheta hoon ki mazboot aur diler ho. na ghabra aur na hausla haar, kyoonki jahaan bhee too jaaega vahaan rabb tera khuda teray saath rahega.”

mulk men daakhil honay kee tayyaariyaan

¹⁰phir yashooa qaum kay nigahbaanon say mukhaatib hua, ¹¹“khaimaagaah men har jagah ja kar logon ko ittila den ki safar kay liyay khaanay ka band-o-bast kar len. kyoonki teen din kay baad aap darya-ay-yardan ko paar karkay us mulk par qabza karengay jo rabb aap ka khuda aap ko virsay men day raha hai.”

¹²phir yashooa roobin, jad aur manassee kay aadhay qabeelay say mukhaatib hua, ¹³“yah baat yaad rakhen jo rabb kay khaadim moosa nay aap say kahee thee, ‘rabb tumhaara khuda tum ko darya-ay-yardan kay mashriqee kinaaray par ka yah ilaaqa deta hai taaki tum yahaan amn-o-amaan kay saath rah sako.’ ¹⁴ab jab ham darya-ay-yardan ko paar kar rahay hain to aap kay baal-bachchay aur maveshee yaheen rah saktay hain. lekin laazim hai ki aap kay tamaam jang karnay kay qaabil mard musallah ho kar apnay bhaaiyon kay aagay aagay darya ko paar karen. aap ko us vaqt tak apnay bhaaiyon kee madad karna hai ¹⁵jab tak rabb unhen vah aaraam na day jo aap ko haasil hai aur vah us mulk par qabza na kar len jo rabb aap ka khuda unhen day raha hai. is kay baad hee aap ko apnay us ilaaqay men vaapas ja kar aabaad honay kee ijaazat hogee jo rabb kay khaadim moosa nay aap ko darya-ay-yardan kay mashriqee kinaaray par diya tha.”

¹⁶unhon nay javaab men yashooa say kaha, “jo bhee hukm aap nay hamen diya hai vah ham maanengay aur jahaan bhee hamen bhejengay vahaan jaaengay. ¹⁷jis tarah ham moosa kee har baat maantay thay usee tarah aap kee bhee har baat maanengay. lekin rabb aap ka khuda usee tarah aap kay saath ho jis tarah vah moosa kay saath tha. ¹⁸jo bhee aap kay hukm kee khilaafvarzee karkay aap kee vah tamaam baaten na maanay jo aap faramaaengay usay saza-ay-maut dee jaaay. lekin mazboot aur diler hon!”