Yoohanna 9
andhay kee shifaa
1chaltay chaltay eesa nay ek aadmee ko dekha jo paidaaish ka andha tha. 2us kay shaagirdon nay us say poochha, “ustaad, yah aadmee andha kyoon paida hua? kya is ka koee gunaah hai ya is kay vaalidain ka?”
3eesa nay javaab diya, “na is ka koee gunaah hai aur na is kay vaalidain ka. yah is liyay hua ki is kee zindagee men allaah ka kaam zaahir ho jaaay. 4abhee din hai. laazim hai ki ham jitnee der tak din hai us ka kaam kartay rahen jis nay mujhay bheja hai. kyoonki raat aanay vaalee hai, us vaqt koee kaam naheen kar sakega. 5lekin jitnee der tak main duniya men hoon utnee der tak main duniya ka noor hoon.”
6yah kah kar us nay zameen par thook kar mittee saanee aur us kee aankhon par laga dee. 7us nay us say kaha, “ja, shilokh kay hauz men naha lay.” (shilokh ka matlab ‘bheja hua’ hai.) andhay nay ja kar naha liya. jab vaapas aaya to vah dekh sakta tha.
8us kay hamsaay aur vah jinhon nay pahelay usay bheek maangtay dekha tha poochhnay lagay, “kya yah vahee naheen jo baitha bheek maanga karta tha?”
9baaz nay kaha, “haan, vahee hai.”
auron nay inkaar kiya, “naheen, yah sirf us ka hamshakl hai.”
lekin aadmee nay khud israar kiya, “main vahee hoon.”
10unhon nay us say savaal kiya, “teree aankhen kis tarah bahaal hueen?”
11us nay javaab diya, “vah aadmee jo eesa kahelaata hai us nay mittee saan kar meree aankhon par laga dee. phir us nay mujhay kaha, ‘shilokh kay hauz par ja aur naha lay.’ main vahaan gaya aur nahaatay hee meree aankhen bahaal ho gaeen.”
12unhon nay poochha, “vah kahaan hai?”
us nay javaab diya, “mujhay naheen maaloom.”
fareesee shifa kee tafteesh kartay hain
13tab vah shifaayaab andhay ko fareesiyon kay paas lay gaay. 14jis din eesa nay mittee saan kar us kee aankhon ko bahaal kiya tha vah sabat ka din tha. 15is liyay fareesiyon nay bhee us say poochhgichh kee ki usay kis tarah basaarat mil gaee. aadmee nay javaab diya, “us nay meree aankhon par mittee laga dee, phir main nay naha liya aur ab dekh sakta hoon.”
16fareesiyon men say baaz nay kaha, “yah shakhs allaah kee taraf say naheen hai, kyoonki sabat kay din kaam karta hai.”
doosron nay etiraaz kiya, “gunaahgaar is qism kay ilaahee nishaan kis tarah dikha sakta hai?” yoon un men phoot pad gaee.
17phir vah dubaara us aadmee say mukhaatib huay jo pahelay andha tha, “too khud is kay baaray men kya kaheta hai? us nay to teree hee aankhon ko bahaal kiya hai.”
us nay javaab diya, “vah nabee hai.”
18yahoodiyon ko yaqeen naheen a raha tha ki vah vaaqaee andha tha aur phir bahaal ho gaya hai. is liyay unhon nay us kay vaalidain ko bulaaya. 19unhon nay un say poochha, “kya yah tumhaara beta hai, vahee jis kay baaray men tum kahetay ho ki vah andha paida hua tha? ab yah kis tarah dekh sakta hai?”
20us kay vaalidain nay javaab diya, “ham jaantay hain ki yah hamaara beta hai aur ki yah paida hotay vaqt andha tha. 21lekin hamen maaloom naheen ki ab yah kis tarah dekh sakta hai ya ki kis nay is kee aankhon ko bahaal kiya hai. is say khud pata karen, yah baaligh hai. yah khud apnay baaray men bata sakta hai.” 22us kay vaalidain nay yah is liyay kaha ki vah yahoodiyon say dartay thay. kyoonki vah faisla kar chukay thay ki jo bhee eesa ko maseeh qaraar day usay yahoodee jamaaat say nikaal diya jaaay. 23yahee vajah thee ki us kay vaalidain nay kaha tha, “yah baaligh hai, is say khud poochh len.”
24ek baar phir unhon nay shifaayaab andhay ko bulaaya, “allaah ko jalaal day, ham to jaantay hain ki yah aadmee gunaahgaar hai.”
25aadmee nay javaab diya, “mujhay kya pata hai ki vah gunaahgaar hai ya naheen, lekin ek baat main jaanta hoon, pahelay main andha tha, aur ab main dekh sakta hoon!”
26phir unhon nay us say savaal kiya, “us nay teray saath kya kiya? us nay kis tarah teree aankhon ko bahaal kar diya?”
27us nay javaab diya, “main pahelay bhee aap ko bata chuka hoon aur aap nay suna naheen. kya aap bhee us kay shaagird banna chaahatay hain?”
28is par unhon nay usay bura-bhala kaha, “too hee us ka shaagird hai, ham to moosa kay shaagird hain. 29ham to jaantay hain ki allaah nay moosa say baat kee hai, lekin is kay baaray men ham yah bhee naheen jaantay ki vah kahaan say aaya hai.”
30aadmee nay javaab diya, “ajeeb baat hai, us nay meree aankhon ko shifa dee hai aur phir bhee aap naheen jaantay ki vah kahaan say hai. 31ham jaantay hain ki allaah gunaahgaaron kee naheen sunta. vah to us kee sunta hai jo us ka khauf maanta aur us kee marzee kay mutaabiq chalta hai. 32ibtida hee say yah baat sunnay men naheen aaee ki kisee nay paidaaishee andhay kee aankhon ko bahaal kar diya ho. 33agar yah aadmee allaah kee taraf say na hota to kuchh na kar sakta.”
34javaab men unhon nay usay bataaya, “too jo gunaah’aalooda haalat men paida hua hai kya too hamaara ustaad banna chaahata hai?” yah kah kar unhon nay usay jamaaat men say nikaal diya.
ruhaanee andhaapan
35jab eesa ko pata chala ki usay nikaal diya gaya hai to vah us ko mila aur poochha, “kya too ibn-ay-aadam par eemaan rakhta hai?”
36us nay kaha, “khudaavand, vah kaun hai? mujhay bataaen taaki main us par eemaan laaoon.”
37eesa nay javaab diya, “too nay usay dekh liya hai balki vah tujh say baat kar raha hai.”
38us nay kaha, “khudaavand, main eemaan rakhta hoon” aur usay sijda kiya.
39eesa nay kaha, “main adaalat karnay kay liyay is duniya men aaya hoon, is liyay ki andhay dekhen aur dekhnay vaalay andhay ho jaaen.”
40kuchh fareesee jo saath khaday thay yah kuchh sun kar poochhnay lagay, “achchha, ham bhee andhay hain?”
41eesa nay un say kaha, “agar tum andhay hotay to tum qusoorvaar na thahertay. lekin ab choonki tum daava kartay ho ki ham dekh saktay hain is liyay tumhaara gunaah qaaim raheta hai.