Yoohanna 8
zinaakaar aurat par pahela patthar
1eesa khud zaitoon kay pahaad par chala gaya. 2aglay din pau phattay vaqt vah dubaara bait-ul-muqaddas men aaya. vahaan sab log us kay gird jama huay aur vah baith kar unhen taaleem denay laga. 3is dauraan shareeat kay ulma aur fareesee ek aurat ko lay kar aaay jisay zina kartay vaqt pakda gaya tha. usay beech men khada karke 4unhon nay eesa say kaha, “ustaad, is aurat ko zina kartay vaqt pakda gaya hai. 5moosa nay shareeat men hamen hukm diya hai ki aisay logon ko sangasaar karna hai. aap kya kahetay hain?” 6is savaal say vah usay phansaana chaahatay thay taaki us par ilzaam lagaanay ka koee bahaana un kay haath a jaaay. lekin eesa jhuk gaya aur apnee unglee say zameen par likhnay laga.
7jab vah us say javaab ka taqaaza kartay rahay to vah khada ho kar un say mukhaatib hua, “tum men say jis nay kabhee gunaah naheen kiya, vah pahela patthar maaray.” 8phir vah dubaara jhuk kar zameen par likhnay laga. 9yah javaab sun kar ilzaam lagaanay vaalay yakay baad deegray vahaan say khisak gaay, pahelay buzurg, phir baaqee sab. aakhirkaar eesa aur darmiyaan men khadee vah aurat akelay rah gaay. 10phir us nay khaday ho kar kaha, “ai aurat, vah sab kahaan gaay? kya kisee nay tujh par fatwa naheen lagaaya?”
11aurat nay javaab diya, “naheen khudaavand.”
eesa nay kaha, “main bhee tujh par fatwa naheen lagaata. ja, aainda gunaah na karna.”
eesa duniya ka noor hai
12phir eesa dubaara logon say mukhaatib hua, “duniya ka noor main hoon. jo meree pairvee karay vah taareekee men naheen chalega, kyoonki usay zindagee ka noor haasil hoga.”
13fareesiyon nay etiraaz kiya, “aap to apnay baaray men gavaahee day rahay hain. aisee gavaahee motbar naheen hotee.”
14eesa nay javaab diya, “agarchi main apnay baaray men hee gavaahee day raha hoon to bhee vah motbar hai. kyoonki main jaanta hoon ki main kahaan say aaya hoon aur kahaan ko ja raha hoon. lekin tum ko to maaloom naheen ki main kahaan say aaya hoon aur kahaan ja raha hoon. 15tum insaanee soch kay mutaabiq logon ka faisla kartay ho, lekin main kisee ka bhee faisla naheen karta. 16aur agar faisla karoon bhee to mera faisla durust hai, kyoonki main akela naheen hoon. baap jis nay mujhay bheja hai meray saath hai. 17tumhaaree shareeat men likha hai ki do aadmiyon kee gavaahee motbar hai. 18main khud apnay baaray men gavaahee deta hoon jabki doosra gavaah baap hai jis nay mujhay bheja.”
19unhon nay poochha, “aap ka baap kahaan hai?” eesa nay javaab diya, “tum na mujhay jaantay ho, na meray baap ko. agar tum mujhay jaantay to phir meray baap ko bhee jaantay.”
20eesa nay yah baaten us vaqt keen jab vah us jagah kay qareeb taaleem day raha tha jahaan log apna hadiya daaltay thay. lekin kisee nay usay giriftaar na kiya kyoonki abhee us ka vaqt naheen aaya tha.
jahaan main ja raha hoon tum vahaan naheen ja sakte
21ek aur baar eesa un say mukhaatib hua, “main ja raha hoon aur tum mujhay dhoond dhoond kar apnay gunaahon men mar jaaogay. jahaan main ja raha hoon vahaan tum naheen pahunch saktay.”
22yahoodiyon nay poochha, “kya vah khudkushee karna chaahata hai? kya vah isee vajah say kaheta hai, ‘jahaan main ja raha hoon vahaan tum naheen pahunch saktay’?”
23eesa nay apnee baat jaaree rakhee, “tum neechay say ho jabki main oopar say hoon. tum is duniya kay ho jabki main is duniya ka naheen hoon. 24main tum ko bata chuka hoon ki tum apnay gunaahon men mar jaaogay. kyoonki agar tum eemaan naheen laatay ki main vahee hoon to tum yaqeenan apnay gunaahon men mar jaaogay.”
25unhon nay savaal kiya, “aap kaun hain?”
eesa nay javaab diya, “main vahee hoon jo main shuroo say hee bataata aaya hoon. 26main tumhaaray baaray men bahut kuchh kah sakta hoon. bahut see aisee baaten hain jin kee bina par main tum ko mujrim thahera sakta hoon. lekin jis nay mujhay bheja hai vahee sachcha aur motbar hai aur main duniya ko sirf vah kuchh sunaata hoon jo main nay us say suna hai.”
27sunnay vaalay na samjhay ki eesa baap ka zikr kar raha hai. 28chunaanchay us nay kaha, “jab tum ibn-ay-aadam ko oonchay par chadhaaogay tab hee tum jaan logay ki main vahee hoon, ki main apnee taraf say kuchh naheen karta balki sirf vahee sunaata hoon jo baap nay mujhay sikhaaya hai. 29aur jis nay mujhay bheja hai vah meray saath hai. us nay mujhay akela naheen chhoda, kyoonki main har vaqt vahee kuchh karta hoon jo usay pasand aata hai.”
30yah baaten sun kar bahut say log us par eemaan laaay.
sachchaaee tum ko aazaad karegee
31jo yahoodee us ka yaqeen kartay thay eesa ab un say hamkalaam hua, “agar tum meree taaleem kay taabay rahogay tab hee tum meray sachchay shaagird hogay. 32phir tum sachchaaee ko jaan logay aur sachchaaee tum ko aazaad kar degee.”
33unhon nay etiraaz kiya, “ham to ibraaheem kee aulaad hain, ham kabhee bhee kisee kay ghulaam naheen rahay. phir aap kis tarah kah saktay hain ki ham aazaad ho jaaengay?”
34eesa nay javaab diya, “main tum ko sachch bataata hoon ki jo bhee gunaah karta hai vah gunaah ka ghulaam hai. 35ghulaam to aarizee taur par ghar men raheta hai, lekin maalik ka beta hamesha tak. 36is liyay agar farzand tum ko aazaad karay to tum haqeeqatan aazaad hogay. 37mujhay maaloom hai ki tum ibraaheem kee aulaad ho. lekin tum mujhay qatl karnay kay darpai ho, kyoonki tumhaaray andar meray paighaam kay liyay gunjaaish naheen hai. 38main tum ko vahee kuchh bataata hoon jo main nay baap kay haan dekha hai, jabki tum vahee kuchh sunaatay ho jo tum nay apnay baap say suna hai.”
39unhon nay kaha, “hamaara baap ibraaheem hai.” eesa nay javaab diya, “agar tum ibraaheem kee aulaad hotay to tum us kay namoonay par chaltay. 40is kay bajaay tum mujhay qatl karnay kee talaash men ho, is liyay ki main nay tum ko vahee sachchaaee sunaaee hai jo main nay allaah kay huzoor sunee hai. ibraaheem nay kabhee bhee is qism ka kaam na kiya. 41naheen, tum apnay baap ka kaam kar rahay ho.”
unhon nay etiraaz kiya, “ham haraamzaaday naheen hain. allaah hee hamaara vaahid baap hai.”
42eesa nay un say kaha, “agar allaah tumhaara baap hota to tum mujh say muhabbat rakhtay, kyoonki main allaah men say nikal aaya hoon. main apnee taraf say naheen aaya balki usee nay mujhay bheja hai. 43tum meree zabaan kyoon naheen samajhtay? is liyay ki tum meree baat sun naheen saktay. 44tum apnay baap iblees say ho aur apnay baap kee khwaahishon par amal karnay kay khwaahaan rahetay ho. vah shuroo hee say qaatil hai aur sachchaaee par qaaim na raha, kyoonki us men sachchaaee hai naheen. jab vah jhoot bolta hai to yah fitree baat hai, kyoonki vah jhoot bolnay vaala aur jhoot ka baap hai. 45lekin main sachchee baaten sunaata hoon aur yahee vajah hai ki tum ko mujh par yaqeen naheen aata. 46kya tum men say koee saabit kar sakta hai ki mujh say koee gunaah sarzad hua hai? main to tum ko haqeeqat bata raha hoon. phir tum ko mujh par yaqeen kyoon naheen aata? 47jo allaah say hai vah allaah kee baaten sunta hai. tum yah is liyay naheen suntay ki tum allaah say naheen ho.”
eesa aur ibraaheem
48yahoodiyon nay javaab diya, “kya ham nay theek naheen kaha ki tum saamree ho aur kisee badruh kay qabzay men ho?”
49eesa nay kaha, “main badruh kay qabzay men naheen hoon balki apnay baap kee izzat karta hoon jabki tum meree beizzatee kartay ho. 50main khud apnee izzat ka khwaahaan naheen hoon. lekin ek hai jo meree izzat aur jalaal ka khayaal rakhta aur insaaf karta hai. 51main tum ko sachch bataata hoon ki jo bhee meray kalaam par amal karta rahay vah maut ko kabhee naheen dekhega.”
52yah sun kar logon nay kaha, “ab hamen pata chal gaya hai ki tum kisee badruh kay qabzay men ho. ibraaheem aur nabee sab intiqaal kar gaay jabki tum daava kartay ho, ‘jo bhee meray kalaam par amal karta rahay vah maut ka maza kabhee naheen chakhega.’ 53kya tum hamaaray baap ibraaheem say baday ho? vah mar gaya, aur nabee bhee mar gaay. tum apnay aap ko kya samajhtay ho?”
54eesa nay javaab diya, “agar men apnee izzat aur jalaal badhaata to mera jalaal baatil hota. lekin mera baap hee meree izzat-o-jalaal badhaata hai, vahee jis kay baaray men tum daava kartay ho ki ‘vah hamaara khuda hai.’ 55lekin haqeeqat men tum nay usay naheen jaana jabki main usay jaanta hoon. agar main kaheta ki main usay naheen jaanta to main tumhaaree tarah jhoota hota. lekin main usay jaanta aur us kay kalaam par amal karta hoon. 56tumhaaray baap ibraaheem nay khushee manaaee jab usay maaloom hua ki vah meree aamad ka din dekhega, aur vah usay dekh kar masroor hua.”
57yahoodiyon nay etiraaz kiya, “tumhaaree umr to abhee pachaas saal bhee naheen, to phir tum kis tarah kah saktay ho ki tum nay ibraaheem ko dekha hai?”
58eesa nay un say kaha, “main tum ko sachch bataata hoon, ibraaheem kee paidaaish say peshtar ‘main hoon’.”
59is par log usay sangasaar karnay kay liyay patthar uthaanay lagay. lekin eesa ghaaib ho kar bait-ul-muqaddas say nikal gaya.