Yoohanna 7
eesa aur us kay bhaaee
1is kay baad eesa nay galeel kay ilaaqay men idhar udhar safar kiya. vah yahoodiya men phirna naheen chaahata tha kyoonki vahaan kay yahoodee usay qatl karnay ka mauqa dhoond rahay thay. 2lekin jab yahoodee eed banaam jhompadiyon kee eed qareeb aaee 3to us kay bhaaiyon nay us say kaha, “yah jagah chhod kar yahoodiya chala ja taaki teray pairokaar bhee vah mojizay dekh len jo too karta hai. 4jo shakhs chaahata hai ki avaam usay jaanay vah posheedgee men kaam naheen karta. agar too is qism ka mojizaana kaam karta hai to apnay aap ko duniya par zaahir kar.” 5(asal men eesa kay bhaaee bhee us par eemaan naheen rakhtay thay.)
6eesa nay unhen bataaya, “abhee vah vaqt naheen aaya jo meray liyay mauzoon hai. lekin tum ja saktay ho, tumhaaray liyay har vaqt mauzoon hai. 7duniya tum say dushmanee naheen rakh saktee. lekin mujh say vah dushmanee rakhtee hai, kyoonki main us kay baaray men yah gavaahee deta hoon ki us kay kaam buray hain. 8tum khud eed par jaao. main naheen jaaoonga, kyoonki abhee vah vaqt naheen aaya jo meray liyay mauzoon hai.” 9yah kah kar vah galeel men thahera raha.
eesa jhompadiyon kee eed par
10lekin baad men, jab us kay bhaaee eed par ja chukay thay to vah bhee gaya, agarchi alaaniya naheen balki khufiya taur par. 11yahoodee eed kay mauqay par usay talaash kar rahay thay. vah poochhtay rahay, “vah aadmee kahaan hai?”
12hujoom men say kaee log eesa kay baaray men budbuda rahay thay. baaz nay kaha, “vah achchha banda hai.” lekin doosron nay etiraaz kiya, “naheen, vah avaam ko bahekaata hai.” 13lekin kisee nay bhee us kay baaray men khul kar baat na kee, kyoonki vah yahoodiyon say dartay thay.
14eed ka aadha hissa guzar chuka tha jab eesa bait-ul-muqaddas men ja kar taaleem denay laga. 15usay sun kar yahoodee hairatzada huay aur kaha, “yah aadmee kis tarah itna ilm rakhta hai haalaanki is nay kaheen say bhee taaleem haasil naheen kee!”
16eesa nay javaab diya, “jo taaleem main deta hoon vah meree apnee naheen balki us kee hai jis nay mujhay bheja. 17jo us kee marzee pooree karnay kay liyay tayyaar hai vah jaan lega ki meree taaleem allaah kee taraf say hai ya ki meree apnee taraf say. 18jo apnee taraf say bolta hai vah apnee hee izzat chaahata hai. lekin jo apnay bhejnay vaalay kee izzat-o-jalaal badhaanay kee koshish karta hai vah sachcha hai aur us men naaraastee naheen hai. 19kya moosa nay tum ko shareeat naheen dee? to phir tum mujhay qatl karnay kee koshish kyoon kar rahay ho?”
20hujoom nay javaab diya, “tum kisee badruh kee girift men ho. kaun tumhen qatl karnay kee koshish kar raha hai?”
21eesa nay un say kaha, “main nay sabat kay din ek hee mojiza kiya aur tum sab hairatzada huay. 22lekin tum bhee sabat kay din kaam kartay ho. tum us din apnay bachchon ka khatna karvaatay ho. aur yah rasm moosa kee shareeat kay mutaabiq hee hai, agarchi yah moosa say naheen balki hamaaray baapdaada ibraaheem, ishaaq aur yaaqoob say shuroo huee. 23kyoonki shareeat kay mutaabiq laazim hai ki bachchay ka khatna aathven din karvaaya jaaay, aur agar yah din sabat ho to tum phir bhee apnay bachchay ka khatna karvaatay ho taaki shareeat kee khilaafvarzee na ho jaaay. to phir tum mujh say kyoon naaraaz ho ki main nay sabat kay din ek aadmee kay pooray jism ko shifa dee? 24zaahiree soorat kee bina par faisla na karo balki baatinee haalat pahechaan kar munsifaana faisla karo.”
kya eesa hee maseeh hai?
25us vaqt yarooshalam kay kuchh rahenay vaalay kahenay lagay, “kya yah vah aadmee naheen hai jisay log qatl karnay kee koshish kar rahay hain? 26taaham vah yahaan khul kar baat kar raha hai aur koee bhee usay roknay kee koshish naheen kar raha. kya hamaaray raahanumaaon nay haqeeqat men jaan liya hai ki yah maseeh hai? 27lekin jab maseeh aaega to kisee ko bhee maaloom naheen hoga ki vah kahaan say hai. yah aadmee farq hai. ham to jaantay hain ki yah kahaan say hai.”
28eesa bait-ul-muqaddas men taaleem day raha tha. ab vah pukaar utha, “tum mujhay jaantay ho aur yah bhee jaantay ho ki main kahaan say hoon. lekin main apnee taraf say naheen aaya. jis nay mujhay bheja hai vah sachcha hai aur usay tum naheen jaantay. 29lekin main usay jaanta hoon, kyoonki main us kee taraf say hoon aur us nay mujhay bheja hai.”
30tab unhon nay usay giriftaar karnay kee koshish kee. lekin koee bhee us ko haath na laga saka, kyoonki abhee us ka vaqt naheen aaya tha. 31to bhee hujoom kay kaee log us par eemaan laaay, kyoonki unhon nay kaha, “jab maseeh aaega to kya vah is aadmee say ziyaada ilaahee nishaan dikhaaega?”
paheredaar usay giriftaar karnay aatay hain
32fareesiyon nay dekha ki hujoom men is qism kee baaten dheemee dheemee aavaaz kay saath phail rahee hain. chunaanchay unhon nay raahanuma imaamon kay saath mil kar bait-ul-muqaddas kay paheredaar eesa ko giriftaar karnay kay liyay bhejay. 33lekin eesa nay kaha, “main sirf thodee der aur tumhaaray saath rahoonga, phir main us kay paas vaapas chala jaaoonga jis nay mujhay bheja hai. 34us vaqt tum mujhay dhoondogay, magar naheen paaogay, kyoonki jahaan main hoon vahaan tum naheen a saktay.”
35yahoodee aapas men kahenay lagay, “yah kahaan jaana chaahata hai jahaan ham usay naheen pa sakengay? kya vah bairoon-ay-mulk jaana chaahata hai, vahaan jahaan hamaaray log yoonaaniyon men bikhree haalat men rahetay hain? kya vah yoonaaniyon ko taaleem dena chaahata hai? 36matlab kya hai jab vah kaheta hai, ‘tum mujhay dhoondogay magar naheen paaogay’ aur ‘jahaan main hoon vahaan tum naheen a saktay’.”
zindagee kay paanee kee naheren
37eed kay aakhiree din jo sab say ahem hai eesa khada hua aur oonchee aavaaz say pukaar utha, “jo piyaasa ho vah meray paas aaay, 38aur jo mujh par eemaan laaay vah piay. kalaam-ay-muqaddas kay mutaabiq ‘us kay andar say zindagee kay paanee kee naheren bah nikalengee’.” 39(‘zindagee kay paanee’ say vah rooh-ul-quds kee taraf ishaara kar raha tha jo un ko haasil hota hai jo eesa par eemaan laatay hain. lekin vah us vaqt tak naazil naheen hua tha, kyoonki eesa ab tak apnay jalaal ko na pahuncha tha.)
sunnay vaalon men naaittifaaqee
40eesa kee yah baaten sun kar hujoom kay kuchh logon nay kaha, “yah aadmee vaaqaee vah nabee hai jis kay intizaar men ham hain.”
41doosron nay kaha, “yah maseeh hai.”
lekin baaz nay etiraaz kiya, “maseeh galeel say kis tarah a sakta hai! 42paak kalaam to bayaan karta hai ki maseeh daaood kay khaandaan aur bait-lahem say aaega, us gaaon say jahaan daaood baadshaah paida hua.” 43yoon eesa kee vajah say logon men phoot pad gaee. 44kuchh to usay giriftaar karna chaahatay thay, lekin koee bhee us ko haath na laga saka.
yahoodee raahanuma eesa par eemaan naheen rakhte
45itnay men bait-ul-muqaddas kay paheredaar raahanuma imaamon aur fareesiyon kay paas vaapas aaay. vah eesa ko lay kar naheen aaay thay, is liyay raahanumaaon nay poochha, “tum usay kyoon naheen laaay?”
46paheredaaron nay javaab diya, “kisee nay kabhee is aadmee kee tarah baat naheen kee.”
47fareesiyon nay tanzan kaha, “kya tum ko bhee baheka diya gaya hai? 48kya raahanumaaon ya fareesiyon men koee hai jo us par eemaan laaya ho? koee bhee naheen! 49lekin shareeat say naavaaqif yah hujoom laantee hai!”
50in raahanumaaon men neekudemus bhee shaamil tha jo kuchh der pahelay eesa kay paas gaya tha. ab vah bol utha, 51“kya hamaaree shareeat kisee par yoon faisla denay kee ijaazat detee hai? naheen, laazim hai ki usay pahelay adaalat men pesh kiya jaaay taaki maaloom ho jaaay ki us say kya kuchh sarzad hua hai.”
52doosron nay etiraaz kiya, “kya tum bhee galeel kay rahenay vaalay ho? kalaam-ay-muqaddas men tafteesh karkay khud dekh lo ki galeel say koee nabee naheen aaega.” 53yah kah kar har ek apnay apnay ghar chala gaya.