Yoohanna 6
eesa baday hujoom ko khaana khilaata hai
1is kay baad eesa nay galeel kee jheel ko paar kiya. (jheel ka doosra naam tibriyaas tha.) 2ek bada hujoom us kay peechhay lag gaya tha, kyoonki us nay ilaahee nishaan dikha kar mareezon ko shifa dee thee aur logon nay is ka mushaahada kiya tha. 3phir eesa pahaad par chadh kar apnay shaagirdon kay saath baith gaya. 4(yahoodee eed-ay-fasah qareeb a gaee thee.) 5vahaan baithay eesa nay apnee nazar uthaaee to dekha ki ek bada hujoom pahunch raha hai. us nay filippus say poochha, “ham kahaan say khaana khareeden taaki unhen khilaaen?” 6(yah us nay filippus ko aazmaanay kay liyay kaha. khud to vah jaanta tha ki kya karega.)
7filippus nay javaab diya, “agar har ek ko sirf thoda sa milay to bhee chaandee kay 200 sikkay kaafee naheen hongay.”
8phir shamaaoon patras ka bhaaee andriyaas bol utha, 9“yahaan ek ladka hai jis kay paas jau kee paanch rotiyaan aur do machhliyaan hain. magar itnay logon men yah kya hain!”
10eesa nay kaha, “logon ko bitha do.” us jagah bahut ghaas thee. chunaanchay sab baith gaay. (sirf mardon kee taadaad 5,000 thee.) 11eesa nay rotiyaan lay kar shukrguzaaree kee dua kee aur unhen baithay huay logon men taqseem karvaaya. yahee kuchh us nay machhliyon kay saath bhee kiya. aur sab nay jee bhar kar rotee khaaee. 12jab sab ser ho gaay to eesa nay shaagirdon ko bataaya, “ab bachay huay tukday jama karo taaki kuchh zaaay na ho jaaay.” 13jab unhon nay bacha hua khaana ikattha kiya to jau kee paanch rotiyon kay tukdon say baarah tokray bhar gaay.
14jab logon nay eesa ko yah ilaahee nishaan dikhaatay dekha to unhon nay kaha, “yaqeenan yah vahee nabee hai jisay duniya men aana tha.” 15eesa ko maaloom hua ki vah a kar usay zabardastee baadshaah banaana chaahatay hain, is liyay vah dubaara un say alag ho kar akela hee kisee pahaad par chadh gaya.
eesa paanee par chalta hai
16shaam ko shaagird jheel kay paas gae 17aur kashtee par savaar ho kar jheel kay paar shaher kafarnahoom kay liyay ravaana huay. andhera ho chuka tha aur eesa ab tak un kay paas vaapas naheen aaya tha. 18tez hava kay baais jheel men laheren uthnay lageen. 19kashtee ko khetay khetay shaagird chaar ya paanch kilomeetar ka safar tai kar chukay thay ki achaanak eesa nazar aaya. vah paanee par chalta hua kashtee kee taraf badh raha tha. shaagird dahshatzada ho gaay. 20lekin us nay un say kaha, “main hee hoon. khauf na karo.” 21vah usay kashtee men bithaanay par aamaada huay. aur kashtee usee lamhay us jagah pahunch gaee jahaan vah jaana chaahatay thay.
log eesa ko dhoondtay hain
22hujoom to jheel kay paar rah gaya tha. aglay din logon ko pata chala ki shaagird ek hee kashtee lay kar chalay gaay hain aur ki us vaqt eesa kashtee men naheen tha. 23phir kuchh kashtiyaan tibriyaas say us maqaam kay qareeb pahuncheen jahaan khudaavand eesa nay rotee kay liyay shukrguzaaree kee dua karkay usay logon ko khilaaya tha. 24jab logon nay dekha ki na eesa aur na us kay shaagird vahaan hain to vah kashtiyon par savaar ho kar eesa ko dhoondtay dhoondtay kafarnahoom pahunchay.
eesa zindagee kee rotee hai
25jab unhon nay usay jheel kay paar paaya to poochha, “ustaad, aap kis tarah yahaan pahunch gaay?”
26eesa nay javaab diya, “main tum ko sachch bataata hoon, tum mujhay is liyay naheen dhoond rahay ki ilaahee nishaan dekhay hain balki is liyay ki tum nay jee bhar kar rotee khaaee hai. 27aisee khuraak kay liyay jidd-o-jahd na karo jo gal sad jaatee hai, balki aisee kay liyay jo abdee zindagee tak qaaim rahetee hai aur jo ibn-ay-aadam tum ko dega, kyoonki khuda baap nay us par apnee tasdeeq kee muhar lagaaee hai.”
28is par unhon nay poochha, “hamen kya karna chaahiay taaki allaah ka matlooba kaam karen?”
29eesa nay javaab diya, “allaah ka kaam yah hai ki tum us par eemaan laao jisay us nay bheja hai.”
30unhon nay kaha, “to phir aap kya ilaahee nishaan dikhaaengay jisay dekh kar ham aap par eemaan laaen? aap kya kaam sar’anjaam dengay? 31hamaaray baapdaada nay to registaan men mann khaaya. chunaanchay kalaam-ay-muqaddas men likha hai ki moosa nay unhen aasmaan say rotee khilaaee.”
32eesa nay javaab diya, “main tum ko sachch bataata hoon ki khud moosa nay tum ko aasmaan say rotee naheen khilaaee balki meray baap nay. vahee tum ko aasmaan say haqeeqee rotee deta hai. 33kyoonki allaah kee rotee vah shakhs hai jo aasmaan par say utar kar duniya ko zindagee bakhshta hai.”
34unhon nay kaha, “khudaavand, hamen yah rotee har vaqt diya karen.”
35javaab men eesa nay kaha, “main hee zindagee kee rotee hoon. jo meray paas aaay usay phir kabhee bhook naheen lagegee. aur jo mujh par eemaan laaay usay phir kabhee piyaas naheen lagegee. 36lekin jis tarah main tum ko bata chuka hoon, tum nay mujhay dekha aur phir bhee eemaan naheen laaay. 37jitnay bhee baap nay mujhay diay hain vah meray paas aaengay aur jo bhee meray paas aaega usay main hargiz nikaal na doonga. 38kyoonki main apnee marzee pooree karnay kay liyay aasmaan say naheen utra balki us kee jis nay mujhay bheja hai. 39aur jis nay mujhay bheja us kee marzee yah hai ki jitnay bhee us nay mujhay diay hain un men say main ek ko bhee kho na doon balki sab ko qiyaamat kay din murdon men say phir zinda karoon. 40kyoonki meray baap kee marzee yahee hai ki jo bhee farzand ko dekh kar us par eemaan laaay usay abdee zindagee haasil ho. aisay shakhs ko main qiyaamat kay din murdon men say phir zinda karoonga.”
41yah sun kar yahoodee is liyay budbudaanay lagay ki us nay kaha tha, “main hee vah rotee hoon jo aasmaan par say utar aaee hai.” 42unhon nay etiraaz kiya, “kya yah eesa bin yoosuf naheen, jis kay baap aur maan say ham vaaqif hain? vah kyoonkar kah sakta hai ki ‘main aasmaan say utra hoon’?”
43eesa nay javaab men kaha, “aapas men mat budabudaao. 44sirf vah shakhs meray paas a sakta hai jisay baap jis nay mujhay bheja hai meray paas khainch laaya hai. aisay shakhs ko main qiyaamat kay din murdon men say phir zinda karoonga. 45nabiyon kay saheefon men likha hai, ‘sab allaah say taaleem paaengay.’ jo bhee allaah kee sun kar us say seekhta hai vah meray paas a jaata hai. 46is ka matlab yah naheen ki kisee nay kabhee baap ko dekha. sirf ek hee nay baap ko dekha hai, vahee jo allaah kee taraf say hai. 47main tum ko sachch bataata hoon ki jo eemaan rakhta hai usay abdee zindagee haasil hai. 48zindagee kee rotee main hoon. 49tumhaaray baapdaada registaan men mann khaatay rahay, to bhee vah mar gaay. 50lekin yahaan aasmaan say utarnay vaalee aisee rotee hai jisay kha kar insaan naheen marta. 51main hee zindagee kee vah rotee hoon jo aasmaan say utar aaee hai. jo is rotee say khaaay vah abad tak zinda rahega. aur yah rotee mera gosht hai jo main duniya ko zindagee muhayya karnay kee khaatir pesh karoonga.” 52yahoodee badee sargarmee say ek doosray say bahs karnay lagay, “yah aadmee hamen kis tarah apna gosht khila sakta hai?”
53eesa nay un say kaha, “main tum ko sachch bataata hoon ki sirf ibn-ay-aadam ka gosht khaanay aur us ka khoon peenay hee say tum men zindagee hogee. 54jo mera gosht khaaay aur mera khoon piay abdee zindagee us kee hai aur main usay qiyaamat kay din murdon men say phir zinda karoonga. 55kyoonki mera gosht haqeeqee khuraak aur mera khoon haqeeqee peenay kee cheez hai. 56jo mera gosht khaata aur mera khoon peeta hai vah mujh men qaaim raheta hai aur main us men. 57main us zinda baap kee vajah say zinda hoon jis nay mujhay bheja. isee tarah jo mujhay khaata hai vah meree hee vajah say zinda rahega. 58yahee vah rotee hai jo aasmaan say utree hai. tumhaaray baapdaada mann khaanay kay baavujood mar gaay, lekin jo yah rotee khaaega vah abad tak zinda rahega.”
59eesa nay yah baaten us vaqt keen jab vah kafarnahoom men yahoodee ibaadatkhaanay men taaleem day raha tha.
abdee zindagee kee baaten
60yah sun kar us kay bahut say shaagirdon nay kaha, “yah baaten naagvaar hain. kaun inhen sun sakta hai!”
61eesa ko maaloom tha ki meray shaagird meray baaray men budbuda rahay hain, is liyay us nay kaha, “kya tum ko in baaton say thes lagee hai? 62to phir tum kya sochogay jab ibn-ay-aadam ko oopar jaatay dekhogay jahaan vah pahelay tha? 63allaah ka rooh hee zinda karta hai jabki jismaanee taaqat ka koee faaida naheen hota. jo baaten main nay tum ko bataaee hain vah rooh aur zindagee hain. 64lekin tum men say kuchh hain jo eemaan naheen rakhtay.” (eesa to shuroo say hee jaanta tha ki kaun kaun eemaan naheen rakhtay aur kaun mujhay dushman kay havaalay karega.) 65phir us nay kaha, “is liyay main nay tum ko bataaya ki sirf vah shakhs meray paas a sakta hai jisay baap kee taraf say yah taufeeq milay.”
66us vaqt say us kay bahut say shaagird ultay paaon phir gaay aur aainda ko us kay saath na chalay. 67tab eesa nay baarah shaagirdon say poochha, “kya tum bhee chalay jaana chaahatay ho?”
68shamaaoon patras nay javaab diya, “khudaavand, ham kis kay paas jaaen? abdee zindagee kee baaten to aap hee kay paas hain. 69aur ham nay eemaan la kar jaan liya hai ki aap allaah kay quddoos hain.”
70javaab men eesa nay kaha, “kya main nay tum baarah ko naheen chuna? to bhee tum men say ek shakhs shaitaan hai.” 71(vah shamaaoon iskariyotee kay betay yahoodaah kee taraf ishaara kar raha tha jo baarah shaagirdon men say ek tha aur jis nay baad men usay dushman kay havaalay kar diya.