Yoohanna 5

bait-ul-muqaddas kay hauz par shifaa

¹kuchh der kay baad eesa kisee yahoodee eed kay mauqay par yarooshalam gaya. ²shaher men ek hauz tha jis ka naam araamee zabaan men bait-hasda tha. us kay paanch baday baraamday thay aur vah shaher kay us darvaazay kay qareeb tha jis ka naam ‘bhedon ka darvaaza’ hai. ³in baraamdon men beshumaar maazoor log paday rahetay thay. yah andhay, langday aur maflooj paanee kay hilnay kay intizaar men rahetay thay. ⁴[kyoonki gaahay-ba-gaahay rabb ka farishta utar kar paanee ko hila deta tha. jo bhee us vaqt us men pahelay daakhil ho jaata usay shifa mil jaatee thee khwaah us kee beemaaree koee bhee kyoon na hotee.] ⁵mareezon men say ek aadmee 38 saal say maazoor tha. ⁶jab eesa nay usay vahaan pada dekha aur usay maaloom hua ki yah itnee der say is haalat men hai to us nay poochha, “kya too tandurust hona chaahata hai?”

⁷us nay javaab diya, “khudaavand, yah mushkil hai. mera koee saathee naheen jo mujhay utha kar paanee men jab usay hilaaya jaata hai lay jaaay. is liyay meray vahaan pahunchnay men itnee der lag jaatee hai ki koee aur mujh say pahelay paanee men utar jaata hai.”

⁸eesa nay kaha, “uth, apna bistar utha kar chal phir!” ⁹vah aadmee fauran bahaal ho gaya. us nay apna bistar uthaaya aur chalnay phirnay laga.

yah vaaqia sabat kay din hua. ¹⁰is liyay yahoodiyon nay shifaayaab aadmee ko bataaya, “aaj sabat ka din hai. aaj bistar uthaana mana hai.”

¹¹lekin us nay javaab diya, “jis aadmee nay mujhay shifa dee us nay mujhay bataaya, ‘apna bistar utha kar chal phir’.”

¹²unhon nay savaal kiya, “vah kaun hai jis nay tujhay yah kuchh bataaya?” ¹³lekin shifaayaab aadmee ko maaloom na tha, kyoonki eesa hujoom kay sabab say chupkay say vahaan say chala gaya tha.

¹⁴baad men eesa usay bait-ul-muqaddas men mila. us nay kaha, “ab too bahaal ho gaya hai. phir gunaah na karna, aisa na ho ki tera haal pahelay say bhee badtar ho jaaay.”

¹⁵us aadmee nay usay chhod kar yahoodiyon ko ittila dee, “eesa nay mujhay shifa dee.” ¹⁶is par yahoodee us ko sataanay lagay, kyoonki us nay us aadmee ko sabat kay din bahaal kiya tha. ¹⁷lekin eesa nay unhen javaab diya, “mera baap aaj tak kaam karta aaya hai, aur main bhee aisa karta hoon.”

¹⁸yah sun kar yahoodee usay qatl karnay kee mazeed koshish karnay lagay, kyoonki us nay na sirf sabat kay din ko mansookh qaraar diya tha balki allaah ko apna baap kah kar apnay aap ko allaah kay baraabar thaheraaya tha.

farzand ka ikhtiyaar

¹⁹eesa nay unhen javaab diya, “main tum ko sachch bataata hoon ki farzand apnee marzee say kuchh naheen kar sakta. vah sirf vah kuchh karta hai jo vah baap ko kartay dekhta hai. jo kuchh baap karta hai vahee farzand bhee karta hai, ²⁰kyoonki baap farzand ko piyaar karta aur usay sab kuchh dikhaata hai jo vah khud karta hai. haan, vah farzand ko in say bhee azeem kaam dikhaaega. phir tum aur bhee ziyaada hairatzada hogay. ²¹kyoonki jis tarah baap murdon ko zinda karta hai usee tarah farzand bhee jinhen chaahata hai zinda kar deta hai. ²²aur baap kisee kee bhee adaalat naheen karta balki us nay adaalat ka poora intizaam farzand kay sapurd kar diya hai ²³taaki sab usee tarah farzand kee izzat karen jis tarah vah baap kee izzat kartay hain. jo farzand kee izzat naheen karta vah baap kee bhee izzat naheen karta jis nay usay bheja hai.

²⁴main tum ko sachch bataata hoon, jo bhee meree baat sun kar us par eemaan laata hai jis nay mujhay bheja hai abdee zindagee us kee hai. usay mujrim naheen thaheraaya jaaega balki vah maut kee girift say nikal kar zindagee men daakhil ho gaya hai. ²⁵main tum ko sachch bataata hoon ki ek vaqt aanay vaala hai balki a chuka hai jab murday allaah kay farzand kee aavaaz sunengay. aur jitnay sunengay vah zinda ho jaaengay. ²⁶kyoonki jis tarah baap zindagee ka mamba hai usee tarah us nay apnay farzand ko zindagee ka mamba bana diya hai. ²⁷saath saath us nay usay adaalat karnay ka ikhtiyaar bhee day diya hai, kyoonki vah ibn-ay-aadam hai. ²⁸yah sun kar taajjub na karo kyoonki ek vaqt a raha hai jab tamaam murday us kee aavaaz sun kar ²⁹qabron men say nikal aaengay. jinhon nay nek kaam kiya vah jee uth kar zindagee paaengay jabki jinhon nay bura kaam kiya vah jee to uthengay lekin un kee adaalat kee jaaegee.

eesa kay gavaah

³⁰main apnee marzee say kuchh naheen kar sakta balki jo kuchh baap say sunta hoon us kay mutaabiq adaalat karta hoon. aur meree adaalat raast hai kyoonki main apnee marzee karnay kee koshish naheen karta balki usee kee jis nay mujhay bheja hai.

³¹agar main khud apnay baaray men gavaahee deta to meree gavaahee motbar na hotee. ³²lekin ek aur hai jo meray baaray men gavaahee day raha hai aur main jaanta hoon ki meray baaray men us kee gavaahee sachchee aur motbar hai. ³³tum nay pata karnay kay liyay apnay logon ko yaheya kay paas bheja hai aur us nay haqeeqat kee tasdeeq kee hai. ³⁴beshak mujhay kisee insaanee gavaah kee zaroorat naheen hai, lekin main yah is liyay bata raha hoon taaki tum ko najaat mil jaaay. ³⁵yaheya ek jalta hua charaagh tha jo raushnee deta tha, aur kuchh der kay liyay tum nay us kee raushnee men khushee manaana pasand kiya. ³⁶lekin meray paas ek aur gavaah hai jo yaheya kee nisbat ziyaada ahem hai yaanee vah kaam jo baap nay mujhay mukammal karnay kay liyay day diya. yahee kaam jo main kar raha hoon meray baaray men gavaahee deta hai ki baap nay mujhay bheja hai. ³⁷is kay ilaava baap nay khud jis nay mujhay bheja hai meray baaray men gavaahee dee hai. afsos, tum nay kabhee us kee aavaaz naheen sunee, na us kee shakl-o-soorat dekhee, ³⁸aur us ka kalaam tumhaaray andar naheen raheta, kyoonki tum us par eemaan naheen rakhtay jisay us nay bheja hai. ³⁹tum apnay saheefon men dhoondtay rahetay ho kyoonki samajhtay ho ki un say tumhen abdee zindagee haasil hai. lekin yahee meray baaray men gavaahee detay hain! ⁴⁰to bhee tum zindagee paanay kay liyay meray paas aana naheen chaahatay.

⁴¹main insaanon say izzat naheen chaahata, ⁴²lekin main tum ko jaanta hoon ki tum men allaah kee muhabbat naheen. ⁴³agarchi main apnay baap kay naam men aaya hoon to bhee tum mujhay qabool naheen kartay. is kay muqaablay men agar koee apnay naam men aaega to tum usay qabool karogay. ⁴⁴koee ajab naheen ki tum eemaan naheen la saktay. kyoonki tum ek doosray say izzat chaahatay ho jabki tum vah izzat paanay kee koshish hee naheen kartay jo vaahid khuda say miltee hai. ⁴⁵lekin yah na samjho ki main baap kay saamnay tum par ilzaam lagaaoonga. ek aur hai jo tum par ilzaam laga raha hai yaanee moosa, jis say tum ummeed rakhtay ho. ⁴⁶agar tum vaaqaee moosa par eemaan rakhtay to zaroor mujh par bhee eemaan rakhtay, kyoonki us nay meray hee baaray men likha. ⁴⁷lekin choonki tum vah kuchh naheen maantay jo us nay likha hai to meree baaten kyoonkar maan saktay ho!”