Yoohanna 21
eesa jheel par shaagirdon par zaahir hota hai
1is kay baad eesa ek baar phir apnay shaagirdon par zaahir hua jab vah tibriyaas yaanee galeel kee jheel par thay. yah yoon hua. 2kuchh shaagird shamaaoon patras kay saath jama thay, toma jo judvaan kahelaata tha, natan-el jo galeel kay qaana say tha, zabdee kay do betay aur mazeed do shaagird.
3shamaaoon patras nay kaha, “main machhlee pakadnay ja raha hoon.”
doosron nay kaha, “ham bhee saath jaaengay.” chunaanchay vah nikal kar kashtee par savaar huay. lekin us pooree raat ek bhee machhlee haath na aaee. 4subah-saveray eesa jheel kay kinaaray par a khada hua. lekin shaagirdon ko maaloom naheen tha ki vah eesa hee hai. 5us nay un say poochha, “bachcho, kya tumhen khaanay kay liyay kuchh mil gaya?”
unhon nay javaab diya, “naheen.”
6us nay kaha, “apna jaal kashtee kay daaen haath daalo, phir tum ko kuchh milega.” unhon nay aisa kiya to machhliyon kee itnee badee taadaad thee ki vah jaal kashtee tak na la sakay.
7is par khudaavand kay piyaaray shaagird nay patras say kaha, “yah to khudaavand hai.” yah suntay hee ki khudaavand hai shamaaoon patras apnee chaadar odh kar paanee men kood pada (us nay chaadar ko kaam karnay kay liyay utaar liya tha.) 8doosray shaagird kashtee par savaar us kay peechhay aaay. vah kinaaray say ziyaada door naheen thay, taqreeban sau meetar kay faasilay par thay. is liyay vah machhliyon say bharay jaal ko paanee men khainch khainch kar khushkee tak laaay. 9jab vah kashtee say utray to dekha ki lakdee kay koilon kee aag par machhliyaan bhunee ja rahee hain aur saath rotee bhee hai. 10eesa nay un say kaha, “un machhliyon men say kuchh lay aao jo tum nay abhee pakdee hain.”
11shamaaoon patras kashtee par gaya aur jaal ko khushkee par ghaseet laaya. yah jaal 153 badee machhliyon say bhara hua tha, to bhee vah na phata. 12eesa nay un say kaha, “aao, naashta kar lo.” kisee bhee shaagird nay savaal karnay kee jur’at na kee ki “aap kaun hain?” kyoonki vah to jaantay thay ki yah khudaavand hee hai. 13phir eesa aaya aur rotee lay kar unhen dee aur isee tarah machhlee bhee unhen khilaaee.
14eesa kay jee uthnay kay baad yah teesree baar thee ki vah apnay shaagirdon par zaahir hua.
eesa ka patras say savaal
15naashtay kay baad eesa shamaaoon patras say mukhaatib hua, “yoohanna kay betay shamaaoon, kya too in kee nisbat mujh say ziyaada muhabbat karta hai?”
us nay javaab diya, “jee khudaavand, aap to jaantay hain ki main aap ko piyaar karta hoon.”
eesa bola, “phir meray lelon ko chara.” 16tab eesa nay ek aur martaba poochha, “shamaaoon yoohanna kay betay, kya too mujh say muhabbat karta hai?”
us nay javaab diya, “jee khudaavand, aap to jaantay hain ki main aap ko piyaar karta hoon.”
eesa bola, “phir meree bhedon kee gallaabaanee kar.” 17teesree baar eesa nay us say poochha, “shamaaoon yoohanna kay betay, kya too mujhay piyaar karta hai?”
teesree dafa yah savaal sunnay say patras ko bada dukh hua. us nay kaha, “khudaavand, aap ko sab kuchh maaloom hai. aap to jaantay hain ki main aap ko piyaar karta hoon.”
eesa nay us say kaha, “meree bhedon ko chara.
18main tujhay sachch bataata hoon ki jab too javaan tha to too khud apnee kamar baandh kar jahaan jee chaahata ghoomta phirta tha. lekin jab too boodha hoga to too apnay haathon ko aagay badhaaega aur koee aur teree kamar baandh kar tujhay lay jaaega jahaan tera dil naheen karega.” 19(eesa kee yah baat is taraf ishaara tha ki patras kis qism kee maut say allaah ko jalaal dega.) phir us nay usay bataaya, “meray peechhay chal.”
eesa aur doosra shaagird
20patras nay mud kar dekha ki jo shaagird eesa ko piyaara tha vah un kay peechhay chal raha hai. yah vahee shaagird tha jis nay shaam kay khaanay kay dauraan eesa kee taraf sar jhuka kar poochha tha, “khudaavand, kaun aap ko dushman kay havaalay karega?” 21ab usay dekh kar patras nay savaal kiya, “khudaavand, is kay saath kya hoga?”
22eesa nay javaab diya, “agar main chaahoon ki yah meray vaapas aanay tak zinda rahay to tujhay kya? bas too meray peechhay chalta rah.”
23nateejay men bhaaiyon men yah khayaal phail gaya ki yah shaagird naheen marega. lekin eesa nay yah baat naheen kee thee. us nay sirf yah kaha tha, “agar main chaahoon ki yah meray vaapas aanay tak zinda rahay to tujhay kya?”
24yah vah shaagird hai jis nay in baaton kee gavaahee day kar inhen qalamband kar diya hai. aur ham jaantay hain ki us kee gavaahee sachchee hai.
khulaasaa
25eesa nay is kay ilaava bhee bahut kuchh kiya. agar us ka har kaam qalamband kiya jaata to meray khayaal men pooree duniya men yah kitaaben rakhnay kee gunjaaish na hotee.