Yoohanna 20
khaalee qabr
1haftay ka din guzar gaya to itwaar ko mariyam magdaleenee subah-saveray qabr kay paas aaee. abhee andhera tha. vahaan pahunch kar us nay dekha ki qabr kay munh par ka patthar ek taraf hataaya gaya hai. 2mariyam daud kar shamaaoon patras aur eesa ko piyaaray shaagird kay paas aaee. us nay ittila dee, “vah khudaavand ko qabr say lay gaay hain, aur hamen maaloom naheen ki unhon nay usay kahaan rakh diya hai.”
3tab patras doosray shaagird samet qabr kee taraf chal pada. 4donon daud rahay thay, lekin doosra shaagird ziyaada tezraftaar tha. vah pahelay qabr par pahunch gaya. 5us nay jhuk kar andar jhaanka to kafan kee pattiyaan vahaan padee nazar aaeen. lekin vah andar na gaya. 6phir shamaaoon patras us kay peechhay pahunch kar qabr men daakhil hua. us nay bhee dekha ki kafan kee pattiyaan vahaan padee hain 7aur saath vah kapda bhee jis men eesa ka sar lipta hua tha. yah kapda tah kiya gaya tha aur pattiyon say alag pada tha. 8phir doosra shaagird jo pahelay pahunch gaya tha, vah bhee daakhil hua. jab us nay yah dekha to vah eemaan laaya. 9(lekin ab bhee vah kalaam-ay-muqaddas kee yah peshgoee naheen samajhtay thay ki usay murdon men say jee uthna hai.) 10phir donon shaagird ghar vaapas chalay gaay.
eesa mariyam magdaleenee par zaahir hota hai
11lekin mariyam ro ro kar qabr kay saamnay khadee rahee. aur rotay huay us nay jhuk kar qabr men jhaankaa 12to kya dekhtee hai ki do farishtay safed libaas pahenay huay vahaan baithay hain jahaan pahelay eesa kee laash padee thee, ek us kay sirahaanay aur doosra vahaan jahaan pahelay us kay paaon thay. 13unhon nay mariyam say poochha, “ai khaatoon, too kyoon ro rahee hai?”
us nay kaha, “vah meray khudaavand ko lay gaay hain, aur maaloom naheen ki unhon nay usay kahaan rakh diya hai.”
14phir us nay peechhay mud kar eesa ko vahaan khaday dekha, lekin us nay usay na pahechaana. 15eesa nay poochha, “ai khaatoon, too kyoon ro rahee hai, kis ko dhoond rahee hai?”
yah soch kar ki vah maalee hai us nay kaha, “janaab, agar aap usay lay gaay hain to mujhay bata den ki usay kahaan rakh diya hai taaki usay lay jaaoon.”
16eesa nay us say kaha, “mariyam!”
vah us kee taraf mudee aur bol uthee, “rabbboonee!” (is ka matlab araamee zabaan men ustaad hai.)
17eesa nay kaha, “meray saath chimtee na rah, kyoonki abhee main oopar, baap kay paas naheen gaya. lekin bhaaiyon kay paas ja aur unhen bata, ‘men apnay baap aur tumhaaray baap kay paas vaapas ja raha hoon, apnay khuda aur tumhaaray khuda kay paas’.”
18chunaanchay mariyam magdaleenee shaagirdon kay paas gaee aur unhen ittila dee, “main nay khudaavand ko dekha hai aur us nay mujh say yah baaten kaheen.”
eesa apnay shaagirdon par zaahir hota hai
19us itwaar kee shaam ko shaagird jama thay. unhon nay darvaazon par taalay laga diay thay kyoonki vah yahoodiyon say dartay thay. achaanak eesa un kay darmiyaan a khada hua aur kaha, “tumhaaree salaamatee ho,” 20aur unhen apnay haathon aur paheloo ko dikhaaya. khudaavand ko dekh kar vah nihaayat khush huay. 21eesa nay dubaara kaha, “tumhaaree salaamatee ho! jis tarah baap nay mujhay bheja usee tarah main tum ko bhej raha hoon.” 22phir un par phoonk kar us nay farmaaya, “rooh-ul-quds ko pa lo. 23agar tum kisee kay gunaahon ko muaaf karo to vah muaaf kiay jaaengay. aur agar tum unhen muaaf na karo to vah muaaf naheen kiay jaaengay.”
toma shak karta hai
24baarah shaagirdon men say toma jis ka laqab judvaan tha eesa kay aanay par maujood na tha. 25chunaanchay doosray shaagirdon nay usay bataaya, “ham nay khudaavand ko dekha hai!” lekin toma nay kaha, “mujhay yaqeen naheen aata. pahelay mujhay us kay haathon men keelon kay nishaan nazar aaen aur main un men apnee unglee daaloon, pahelay main apnay haath ko us kay paheloo kay zakhm men daaloon. phir hee mujhay yaqeen aaega.”
26ek hafta guzar gaya. shaagird dubaara makaan men jama thay. is martaba toma bhee saath tha. agarchi darvaazon par taalay lagay thay phir bhee eesa un kay darmiyaan a kar khada hua. us nay kaha, “tumhaaree salaamatee ho!” 27phir vah toma say mukhaatib hua, “apnee unglee ko meray haathon aur apnay haath ko meray paheloo kay zakhm men daal aur bay-etiqaad na ho balki eemaan rakh.”
28toma nay javaab men us say kaha, “ai meray khudaavand! ai meray khuda!”
29phir eesa nay usay bataaya, “kya too is liyay eemaan laaya hai ki too nay mujhay dekha hai? mubaarak hain vah jo mujhay dekhay baghair mujh par eemaan laatay hain.”
is kitaab ka maqsad
30eesa nay apnay shaagirdon kee maujoodgee men mazeed bahut say aisay ilaahee nishaan dikhaaay jo is kitaab men darj naheen hain. 31lekin jitnay darj hain un ka maqsad yah hai ki aap eemaan laaen ki eesa hee maseeh yaanee allaah ka farzand hai aur aap ko is eemaan kay vaseelay say us kay naam say zindagee haasil ho.