Yoohanna 19

¹phir peelaatus nay eesa ko koday lagvaaay. ²faujiyon nay kaantedaar taheniyon ka ek taaj bana kar us kay sar par rakh diya. unhon nay usay arghvaanee rang ka libaas bhee pahenaaya. ³phir us kay saamnay a kar vah kahetay, “ai yahoodiyon kay baadshaah, aadaab!” aur usay thappad maartay thay.

⁴ek baar phir peelaatus nikal aaya aur yahoodiyon say baat karnay laga, “dekho, main isay tumhaaray paas baahar la raha hoon taaki tum jaan lo ki mujhay isay mujrim thaheraanay kee koee vajah naheen milee.” ⁵phir eesa kaantedaar taaj aur arghvaanee rang ka libaas pahenay baahar aaya. peelaatus nay un say kaha, “lo yah hai vah aadmee.”

⁶usay dekhtay hee raahanuma imaam aur un kay mulaazim cheekhnay lagay, “isay masloob karen, isay masloob karen!”

peelaatus nay un say kaha, “tum hee isay lay ja kar masloob karo. kyoonki mujhay isay mujrim thaheraanay kee koee vajah naheen milee.”

⁷yahoodiyon nay israar kiya, “hamaaray paas shareeat hai aur is shareeat kay mutaabiq laazim hai ki vah maara jaaay. kyoonki is nay apnay aap ko allaah ka farzand qaraar diya hai.”

⁸yah sun kar peelaatus mazeed dar gaya. ⁹dubaara mahel men ja kar eesa say poochha, “tum kahaan say aaay ho?”

lekin eesa khaamosh raha. ¹⁰peelaatus nay us say kaha, “achchha, tum meray saath baat naheen kartay? kya tumhen maaloom naheen ki mujhay tumhen riha karnay aur masloob karnay ka ikhtiyaar hai?”

¹¹eesa nay javaab diya, “aap ko mujh par ikhtiyaar na hota agar vah aap ko oopar say na diya gaya hota. is vajah say us shakhs say ziyaada sangeen gunaah hua hai jis nay mujhay dushman kay havaalay kar diya hai.”

¹²is kay baad peelaatus nay usay aazaad karnay kee koshish kee. lekin yahoodee cheekh cheekh kar kahenay lagay, “agar aap isay riha karen to aap romee shahenshaah qaisar kay dost saabit naheen hongay. jo bhee baadshaah honay ka daava karay vah shahenshaah kee mukhaalafat karta hai.”

¹³is tarah kee baaten sun kar peelaatus eesa ko baahar lay aaya. phir vah jaj kee kursee par baith gaya. us jagah ka naam “pachcheekaaree” tha. (araamee zabaan men vah gabbta kahelaatee thee.) ¹⁴ab dopaher kay taqreeban baarah baj gaay thay. us din eed kay liyay tayyaariyaan kee jaatee theen, kyoonki aglay din eed ka aaghaaz tha. peelaatus bol utha, “lo, tumhaara baadshaah!”

¹⁵lekin vah chillaatay rahay, “lay jaaen isay, lay jaaen! isay masloob karen!”

peelaatus nay savaal kiya, “kya main tumhaaray baadshaah ko saleeb par chadhaaoon?”

raahanuma imaamon nay javaab diya, “siva-ay-shahenshaah kay hamaara koee baadshaah naheen hai.”

¹⁶phir peelaatus nay eesa ko un kay havaalay kar diya taaki usay masloob kiya jaaay.

eesa ko masloob kiya jaata hai

chunaanchay vah eesa ko lay kar chalay gaay. ¹⁷vah apnee saleeb uthaaay shaher say nikla aur us jagah pahuncha jis ka naam khopdee (araamee zabaan men gulguta) tha. ¹⁸vahaan unhon nay usay saleeb par chadha diya. saath saath unhon nay us kay baaen aur daaen haath do aur aadmiyon ko masloob kiya. ¹⁹peelaatus nay ek takhtee banva kar usay eesa kee saleeb par lagva diya. takhtee par likha tha, ‘eesa naasree, yahoodiyon ka baadshaah.’ ²⁰bahut say yahoodiyon nay yah padh liya, kyoonki masloobiyat ka maqaam shaher kay qareeb tha aur yah jumla araamee, laateenee aur yoonaanee zabaanon men likha tha. ²¹yah dekh kar yahoodiyon kay raahanuma imaamon nay etiraaz kiya, “‘yahoodiyon ka baadshaah’ na likhen balki yah ki ‘is aadmee nay yahoodiyon ka baadshaah honay ka daava kiya’.”

²²peelaatus nay javaab diya, “jo kuchh main nay likh diya so likh diya.”

²³eesa ko saleeb par chadhaanay kay baad faujiyon nay us kay kapday lay kar chaar hisson men baant liyay, har faujee kay liyay ek hissa. lekin chogha bejod tha. vah oopar say lay kar neechay tak buna hua ek hee tukday ka tha. ²⁴is liyay faujiyon nay kaha, “aao, isay phaad kar taqseem na karen balki is par qur’a daalen.” yoon kalaam-ay-muqaddas kee yah peshgoee pooree huee, “unhon nay aapas men meray kapday baant liyay aur meray libaas par qur’a daala.” faujiyon nay yahee kuchh kiya.

²⁵kuchh khavaateen bhee eesa kee saleeb kay qareeb khadee theen : us kee maan, us kee khaala, klopaas kee beevee mariyam aur mariyam magdaleenee. ²⁶jab eesa nay apnee maan ko us shaagird kay saath khaday dekha jo usay piyaara tha to us nay kaha, “ai khaatoon, dekhen aap ka beta yah hai.”

²⁷aur us shaagird say us nay kaha, “dekh, teree maan yah hai.” us vaqt say us shaagird nay eesa kee maan ko apnay ghar rakha.

eesa kee maut

²⁸is kay baad jab eesa nay jaan liya ki mera mishan takmeel tak pahunch chuka hai to us nay kaha, “mujhay piyaas lagee hai.” (is say bhee kalaam-ay-muqaddas kee ek peshgoee pooree huee.)

²⁹qareeb mai kay sirkay say bhara bartan pada tha. unhon nay ek ispanj sirkay men dubo kar usay zoofay kee shaakh par laga diya aur utha kar eesa kay munh tak pahunchaaya. ³⁰yah sirka peenay kay baad eesa bol utha, “kaam mukammal ho gaya hai.” aur sar jhuka kar us nay apnee jaan allaah kay sapurd kar dee.

eesa ka paheloo chheda jaata hai

³¹fasah kee tayyaaree ka din tha aur aglay din eed ka aaghaaz aur ek khaas sabat tha. is liyay yahoodee naheen chaahatay thay ki masloob huee laashen aglay din tak saleebon par latkee rahen. chunaanchay unhon nay peelaatus say guzaarish kee ki vah un kee taangen tudva kar unhen saleebon say utaarnay day. ³²tab faujiyon nay a kar eesa kay saath masloob kiay jaanay vaalay aadmiyon kee taangen tod deen, pahelay ek kee phir doosray kee. ³³jab vah eesa kay paas aaay to unhon nay dekha ki vah faut ho chuka hai, is liyay unhon nay us kee taangen na todeen. ³⁴is kay bajaay ek nay nezay say eesa ka paheloo chhed diya. zakhm say fauran khoon aur paanee bah nikla. ³⁵(jis nay yah dekha hai us nay gavaahee dee hai aur us kee gavaahee sachchee hai. vah jaanta hai ki vah haqeeqat bayaan kar raha hai aur us kee gavaahee ka maqsad yah hai ki aap bhee eemaan laaen.) ³⁶yah yoon hua taaki kalaam-ay-muqaddas kee yah peshgoee pooree ho jaaay, “us kee ek haddee bhee todee naheen jaaegee.” ³⁷kalaam-ay-muqaddas men yah bhee likha hai, “vah us par nazar daalengay jisay unhon nay chheda hai.”

eesa ko dafnaaya jaata hai

³⁸baad men arimatiyaah kay rahenay vaalay yoosuf nay peelaatus say eesa kee laash utaarnay kee ijaazat maangee. (yoosuf eesa ka khufiya shaagird tha, kyoonki vah yahoodiyon say darta tha.) is kee ijaazat milnay par vah aaya aur laash ko utaar liya. ³⁹neekudemus bhee saath tha, vah aadmee jo guzray dinon men raat kay vaqt eesa say milnay aaya tha. neekudemus apnay saath mur aur ood kee taqreeban 34 kilograam khushboo lay kar aaya tha. ⁴⁰yahoodee janaazay kee rusoomaat kay mutaabiq unhon nay laash par khushboo laga kar usay pattiyon say lapet diya. ⁴¹saleebon kay qareeb ek baagh tha aur baagh men ek naee qabr thee jo ab tak istemaal naheen kee gaee thee. ⁴²us kay qareeb honay kay sabab say unhon nay eesa ko us men rakh diya, kyoonki fasah kee tayyaaree ka din tha aur aglay din eed ka aaghaaz tha.