Yoohanna 17

eesa apnay shaagirdon kay liyay dua karta hai

¹yah kah kar eesa nay apnee nazar aasmaan kee taraf uthaaee aur dua kee, “ai baap, vaqt a gaya hai. apnay farzand ko jalaal day taaki farzand tujhay jalaal day. ²kyoonki too nay usay tamaam insaanon par ikhtiyaar diya hai taaki vah un sab ko abdee zindagee day jo too nay usay diay hain. ³aur abdee zindagee yah hai ki vah tujhay jaan len jo vaahid aur sachcha khuda hai aur eesa maseeh ko bhee jaan len jisay too nay bheja hai. ⁴main nay tujhay zameen par jalaal diya aur us kaam kee takmeel kee jis kee zimmaadaaree too nay mujhay dee thee. ⁵aur ab mujhay apnay huzoor jalaal day, ai baap, vahee jalaal jo main duniya kee takhleeq say peshtar teray huzoor rakhta tha.

⁶main nay tera naam un logon par zaahir kiya jinhen too nay duniya say alag karkay mujhay diya hai. vah teray hee thay. too nay unhen mujhay diya aur unhon nay teray kalaam kay mutaabiq zindagee guzaaree hai. ⁷ab unhon nay jaan liya hai ki jo kuchh bhee too nay mujhay diya hai vah teree taraf say hai. ⁸kyoonki jo baaten too nay mujhay deen main nay unhen dee hain. nateejay men unhon nay yah baaten qabool karkay haqeeqee taur par jaan liya ki main tujh men say nikal kar aaya hoon. saath saath vah eemaan bhee laaay ki too nay mujhay bheja hai.

⁹main un kay liyay dua karta hoon, duniya kay liyay naheen balki un kay liyay jinhen too nay mujhay diya hai, kyoonki vah teray hee hain. ¹⁰jo bhee mera hai vah tera hai aur jo tera hai vah mera hai. chunaanchay mujhay un men jalaal mila hai. ¹¹ab say main duniya men naheen hoonga. lekin yah duniya men rah gaay hain jabki main teray paas a raha hoon. quddoos baap, apnay naam men unhen mahfooz rakh, us naam men jo too nay mujhay diya hai, taaki vah ek hon jaisay ham ek hain. ¹²jitnee der main un kay saath raha main nay unhen teray naam men mahfooz rakha, usee naam men jo too nay mujhay diya tha. main nay yoon un kee nigahbaanee kee ki un men say ek bhee halaak naheen hua siva-ay-halaakat kay farzand kay. yoon kalaam kee peshgoee pooree huee. ¹³ab to main teray paas a raha hoon. lekin main duniya men hotay huay yah bayaan kar raha hoon taaki un kay dil meree khushee say bhar kar chhalak uthen. ¹⁴main nay unhen tera kalaam diya hai aur duniya nay un say dushmanee rakhee, kyoonki yah duniya kay naheen hain, jis tarah main bhee duniya ka naheen hoon. ¹⁵meree dua yah naheen hai ki too unhen duniya say utha lay balki yah ki unhen iblees say mahfooz rakhay. ¹⁶vah duniya kay naheen hain jis tarah main bhee duniya ka naheen hoon. ¹⁷unhen sachchaaee kay vaseelay say makhsoos-o-muqaddas kar. tera kalaam hee sachchaaee hai. ¹⁸jis tarah too nay mujhay duniya men bheja hai usee tarah main nay bhee unhen duniya men bheja hai. ¹⁹un kee khaatir main apnay aap ko makhsoos karta hoon, taaki unhen bhee sachchaaee kay vaseelay say makhsoos-o-muqaddas kiya jaaay.

²⁰meree dua na sirf in hee kay liyay hai, balki un sab kay liyay bhee jo in ka paighaam sun kar mujh par eemaan laaenge ²¹taaki sab ek hon. jis tarah too ai baap, mujh men hai aur main tujh men hoon usee tarah vah bhee ham men hon taaki duniya yaqeen karay ki too nay mujhay bheja hai. ²²main nay unhen vah jalaal diya hai jo too nay mujhay diya hai taaki vah ek hon jis tarah ham ek hain, ²³main un men aur too mujh men. vah kaamil taur par ek hon taaki duniya jaan lay ki too nay mujhay bheja aur ki too nay un say muhabbat rakhee hai jis tarah mujh say rakhee hai.

²⁴ai baap, main chaahata hoon ki jo too nay mujhay diay hain vah bhee meray saath hon, vahaan jahaan main hoon, ki vah meray jalaal ko dekhen, vah jalaal jo too nay is liyay mujhay diya hai ki too nay mujhay duniya kee takhleeq say peshtar piyaar kiya hai. ²⁵ai raast baap, duniya tujhay naheen jaantee, lekin main tujhay jaanta hoon. aur yah shaagird jaantay hain ki too nay mujhay bheja hai. ²⁶main nay tera naam un par zaahir kiya aur isay zaahir karta rahoonga taaki teree mujh say muhabbat un men ho aur main un men hoon.”