Yoohanna 16

¹main nay tum ko yah is liyay bataaya hai taaki tum gumraah na ho jaao. ²vah tum ko yahoodee jamaaaton say nikaal dengay, balki vah vaqt bhee aanay vaala hai ki jo bhee tum ko maar daalega vah samjhega, ‘main nay allaah kee khidmat kee hai.’ ³vah is qism kee harkaten is liyay karengay ki unhon nay na baap ko jaana hai, na mujhay. ⁴main nay tum ko yah baaten is liyay bataaee hain ki jab un ka vaqt a jaaay to tum ko yaad aaay ki main nay tumhen aagaah kar diya tha.

rooh-ul-quds kee khidmat

main nay ab tak tum ko yah naheen bataaya kyoonki main tumhaaray saath tha. ⁵lekin ab main us kay paas ja raha hoon jis nay mujhay bheja hai. to bhee tum men say koee mujh say naheen poochhta, ‘aap kahaan ja rahay hain?’ ⁶is kay bajaay tumhaaray dil ghamzada hain ki main nay tum ko aisee baaten bataaee hain. ⁷lekin main tum ko sachch bataata hoon ki tumhaaray liyay faaidaamand hai ki main ja raha hoon. agar main na jaaoon to madadgaar tumhaaray paas naheen aaega. lekin agar main jaaoon to main usay tumhaaray paas bhej doonga. ⁸aur jab vah aaega to gunaah, raastbaazee aur adaalat kay baaray men duniya kee ghaltee ko beniqaab karkay yah zaahir karega : ⁹gunaah kay baaray men yah ki log mujh par eemaan naheen rakhtay, ¹⁰raastbaazee kay baaray men yah ki main baap kay paas ja raha hoon aur tum mujhay ab say naheen dekhogay, ¹¹aur adaalat kay baaray men yah ki is duniya kay hukmaraan kee adaalat ho chukee hai.

¹²mujhay tum ko mazeed bahut kuchh bataana hai, lekin is vaqt tum usay bardaasht naheen kar saktay. ¹³jab sachchaaee ka rooh aaega to vah pooree sachchaaee kee taraf tumhaaree raahanumaaee karega. vah apnee marzee say baat naheen karega balki sirf vahee kuchh kahega jo vah khud sunega. vahee tum ko mustaqbil kay baaray men bhee bataaega. ¹⁴aur vah is men mujhay jalaal dega ki vah tum ko vahee kuchh sunaaega jo usay mujh say mila hoga. ¹⁵jo kuchh bhee baap ka hai vah mera hai. is liyay main nay kaha, ‘rooh tum ko vahee kuchh sunaaega jo usay mujh say mila hoga.’

ab dukh phir sukh

¹⁶thodee der kay baad tum mujhay naheen dekhogay. phir thodee der kay baad tum mujhay dubaara dekh logay.”

¹⁷us kay kuchh shaagird aapas men baat karnay lagay, “eesa kay yah kahenay say kya muraad hai ki ‘thodee der kay baad tum mujhay naheen dekhogay, phir thodee der kay baad mujhay dubaara dekh logay’? aur is ka kya matlab hai, ‘main baap kay paas ja raha hoon’?” ¹⁸aur vah sochtay rahay, “yah kis qism kee ‘thodee der’ hai jis ka zikr vah kar rahay hain? ham un kee baat naheen samajhtay.”

¹⁹eesa nay jaan liya ki vah mujh say is kay baaray men savaal karna chaahatay hain. is liyay us nay kaha, “kya tum ek doosray say poochh rahay ho ki meree is baat ka kya matlab hai ki ‘thodee der kay baad tum mujhay naheen dekhogay, phir thodee der kay baad mujhay dubaara dekh logay’? ²⁰main tum ko sachch bataata hoon ki tum ro ro kar maatam karogay jabki duniya khush hogee. tum gham karogay, lekin tumhaara gham khushee men badal jaaega. ²¹jab kisee aurat kay bachcha paida honay vaala hota hai to usay gham aur takleef hotee hai kyoonki us ka vaqt a gaya hai. lekin joon hee bachcha paida ho jaata hai to maan khushee kay maaray ki ek insaan duniya men a gaya hai apnee tamaam museebat bhool jaatee hai. ²²yahee tumhaaree haalat hai. kyoonki ab tum ghamzada ho, lekin main tum say dubaara miloonga. us vaqt tum ko khushee hogee, aisee khushee jo tum say koee chheen na lega.

²³us din tum mujh say kuchh naheen poochhogay. main tum ko sachch bataata hoon ki jo kuchh tum meray naam men baap say maangogay vah tum ko dega. ²⁴ab tak tum nay meray naam men kuchh naheen maanga. maango to tum ko milega. phir tumhaaree khushee pooree ho jaaegee.

duniya par fatah

²⁵main nay tum ko yah tamseelon men bataaya hai. lekin ek din aaega jab main aisa naheen karoonga. us vaqt main tamseelon men baat naheen karoonga balki tum ko baap kay baaray men saaf saaf bata doonga. ²⁶us din tum mera naam lay kar maangogay. meray kahenay ka matlab yah naheen ki main hee tumhaaree khaatir baap say darakhwaast karoonga. ²⁷kyoonki baap khud tum ko piyaar karta hai, is liyay ki tum nay mujhay piyaar kiya hai aur eemaan laaay ho ki main allaah men say nikal aaya hoon. ²⁸main baap men say nikal kar duniya men aaya hoon. aur ab main duniya ko chhod kar baap kay paas vaapas jaata hoon.”

²⁹is par us kay shaagirdon nay kaha, “ab aap tamseelon men naheen balki saaf saaf baat kar rahay hain. ³⁰ab hamen samajh aaee hai ki aap sab kuchh jaantay hain aur ki is kee zaroorat naheen ki koee aap kee poochhgichh karay. is liyay ham eemaan rakhtay hain ki aap allaah men say nikal kar aaay hain.”

³¹eesa nay javaab diya, “ab tum eemaan rakhtay ho? ³²dekho, vah vaqt a raha hai balki a chuka hai jab tum tittar-bittar ho jaaogay. mujhay akela chhod kar har ek apnay ghar chala jaaega. to bhee main akela naheen hoonga kyoonki baap meray saath hai. ³³main nay tum ko is liyay yah baat bataaee taaki tum mujh men salaamatee paao. duniya men tum museebat men phansay rahetay ho. lekin hausla rakho, main duniya par ghaalib aaya hoon.”