Yoohanna 15

eesa angoor kee haqeeqee bel hai

¹main angoor kee haqeeqee bel hoon aur mera baap maalee hai. ²vah meree har shaakh ko jo phal naheen laatee kaat kar phaink deta hai. lekin jo shaakh phal laatee hai us kee vah kaant-chhaant karta hai taaki ziyaada phal laaay. ³us kalaam kay zareeay jo main nay tum ko sunaaya hai tum to paak-saaf ho chukay ho. ⁴mujh men qaaim raho to main bhee tum men qaaim rahoonga. jo shaakh bel say kat gaee hai vah phal naheen la saktee. bilkul isee tarah tum bhee agar tum mujh men qaaim naheen rahetay phal naheen la saktay.

⁵main hee angoor kee bel hoon, aur tum us kee shaakhen ho. jo mujh men qaaim raheta hai aur men us men vah bahut sa phal laata hai, kyoonki mujh say alag ho kar tum kuchh naheen kar saktay. ⁶jo mujh men qaaim naheen raheta aur na main us men usay befaaida shaakh kee tarah baahar phaink diya jaata hai. aisee shaakhen sookh jaatee hain aur log un ka dher laga kar unhen aag men jhonk detay hain jahaan vah jal jaatee hain. ⁷agar tum mujh men qaaim raho aur main tum men to jo jee chaahay maango, vah tum ko diya jaaega. ⁸jab tum bahut sa phal laatay aur yoon meray shaagird saabit hotay ho to is say meray baap ko jalaal milta hai. ⁹jis tarah baap nay mujh say muhabbat rakhee hai usee tarah main nay tum say bhee muhabbat rakhee hai. ab meree muhabbat men qaaim raho. ¹⁰jab tum meray ahkaam kay mutaabiq zindagee guzaartay ho to tum mujh men qaaim rahetay ho. main bhee isee tarah apnay baap kay ahkaam kay mutaabiq chalta hoon aur yoon us kee muhabbat men qaaim raheta hoon.

¹¹main nay tum ko yah is liyay bataaya hai taaki meree khushee tum men ho balki tumhaara dil khushee say bhar kar chhalak uthay. ¹²mera hukm yah hai ki ek doosray ko vaisay piyaar karo jaisay main nay tum ko piyaar kiya hai. ¹³is say badee muhabbat hai naheen ki koee apnay doston kay liyay apnee jaan day day. ¹⁴tum meray dost ho agar tum vah kuchh karo jo main tum ko bataata hoon. ¹⁵ab say main naheen kaheta ki tum ghulaam ho, kyoonki ghulaam naheen jaanta ki us ka maalik kya karta hai. is kay bajaay main nay kaha hai ki tum dost ho, kyoonki main nay tum ko sab kuchh bataaya hai jo main nay apnay baap say suna hai. ¹⁶tum nay mujhay naheen chuna balki main nay tum ko chun liya hai. main nay tum ko muqarrar kiya ki ja kar phal laao, aisa phal jo qaaim rahay. phir baap tum ko vah kuchh dega jo tum meray naam men maangogay. ¹⁷mera hukm yahee hai ki ek doosray say muhabbat rakho.

duniya kee dushmanee

¹⁸agar duniya tum say dushmanee rakhay to yah baat zahen men rakho ki us nay tum say pahelay mujh say dushmanee rakhee hai. ¹⁹agar tum duniya kay hotay to duniya tum ko apna samajh kar piyaar kartee. lekin tum duniya kay naheen ho. main nay tum ko duniya say alag karkay chun liya hai. is liyay duniya tum say dushmanee rakhtee hai. ²⁰vah baat yaad karo jo main nay tum ko bataaee ki ghulaam apnay maalik say bada naheen hota. agar unhon nay mujhay sataaya hai to tumhen bhee sataaengay. aur agar unhon nay meray kalaam kay mutaabiq zindagee guzaaree to vah tumhaaree baaton par bhee amal karengay. ²¹lekin tumhaaray saath jo kuchh bhee karengay, meray naam kee vajah say karengay, kyoonki vah usay naheen jaantay jis nay mujhay bheja hai. ²²agar main aaya na hota aur un say baat na kee hotee to vah qusoorvaar na thahertay. lekin ab un kay gunaah ka koee bhee uzr baaqee naheen raha. ²³jo mujh say dushmanee rakhta hai vah meray baap say bhee dushmanee rakhta hai. ²⁴agar main nay un kay darmiyaan aisa kaam na kiya hota jo kisee aur nay naheen kiya to vah qusoorvaar na thahertay. lekin ab unhon nay sab kuchh dekha hai aur phir bhee mujh say aur meray baap say dushmanee rakhee hai. ²⁵aur aisa hona bhee tha taaki kalaam-ay-muqaddas kee yah peshgoee pooree ho jaaay ki ‘unhon nay bilaavajah mujh say keena rakha hai.’

²⁶jab vah madadgaar aaega jisay main baap kee taraf say tumhaaray paas bhejoonga to vah meray baaray men gavaahee dega. vah sachchaaee ka rooh hai jo baap men say nikalta hai. ²⁷tum ko bhee meray baaray men gavaahee dena hai, kyoonki tum ibtida say meray saath rahay ho.