Yoohanna 14

eesa baap kay paas jaanay kee raah hai

¹tumhaara dil na ghabraaay. tum allaah par eemaan rakhtay ho, mujh par bhee eemaan rakho. ²meray baap kay ghar men beshumaar makaan hain. agar aisa na hota to kya main tum ko bataata ki main tumhaaray liyay jagah tayyaar karnay kay liyay vahaan ja raha hoon? ³aur agar main ja kar tumhaaray liyay jagah tayyaar karoon to vaapas a kar tum ko apnay saath lay jaaoonga taaki jahaan main hoon vahaan tum bhee ho. ⁴aur jahaan main ja raha hoon us kee raah tum jaantay ho.”

⁵toma bol utha, “khudaavand, hamen maaloom naheen ki aap kahaan ja rahay hain. to phir ham us kee raah kis tarah jaanen?”

⁶eesa nay javaab diya, “raah aur haq aur zindagee main hoon. koee meray vaseelay kay baghair baap kay paas naheen a sakta. ⁷agar tum nay mujhay jaan liya hai to is ka matlab hai ki tum meray baap ko bhee jaan logay. aur ab say aisa hai bhee. tum usay jaantay ho aur tum nay us ko dekh liya hai.”

⁸filippus nay kaha, “ai khudaavand, baap ko hamen dikhaaen. bas yahee hamaaray liyay kaafee hai.”

⁹eesa nay javaab diya, “filippus, main itnee der say tumhaaray saath hoon, kya is kay baavujood too mujhay naheen jaanta? jis nay mujhay dekha us nay baap ko dekha hai. to phir too kyoonkar kaheta hai, ‘baap ko hamen dikhaaen’? ¹⁰kya too eemaan naheen rakhta ki main baap men hoon aur baap mujh men hai? jo baaten men tum ko bataata hoon vah meree naheen balki mujh men rahenay vaalay baap kee taraf say hain. vahee apna kaam kar raha hai. ¹¹meree baat ka yaqeen karo ki main baap men hoon aur baap mujh men hai. ya kam az kam un kaamon kee bina par yaqeen karo jo main nay kiay hain. ¹²main tum ko sachch bataata hoon ki jo mujh par eemaan rakhay vah vahee kuchh karega jo main karta hoon. na sirf yah balki vah in say bhee baday kaam karega, kyoonki main baap kay paas ja raha hoon. ¹³aur jo kuchh tum meray naam men maango main doonga taaki baap ko farzand men jalaal mil jaaay. ¹⁴jo kuchh tum meray naam men mujh say chaaho vah main karoonga.

rooh-ul-quds denay ka vaadaa

¹⁵agar tum mujhay piyaar kartay ho to meray ahkaam kay mutaabiq zindagee guzaarogay. ¹⁶aur main baap say guzaarish karoonga to vah tum ko ek aur madadgaar dega jo abad tak tumhaaray saath rahegaa ¹⁷yaanee sachchaaee ka rooh, jisay duniya pa naheen saktee, kyoonki vah na to usay dekhtee na jaantee hai. lekin tum usay jaantay ho, kyoonki vah tumhaaray saath raheta hai aur aainda tumhaaray andar rahega.

¹⁸main tum ko yateem chhod kar naheen jaaoonga balki tumhaaray paas vaapas aaoonga. ¹⁹thodee der kay baad duniya mujhay naheen dekhegee, lekin tum mujhay dekhtay rahogay. choonki main zinda hoon is liyay tum bhee zinda rahogay. ²⁰jab vah din aaega to tum jaan logay ki main apnay baap men hoon, tum mujh men ho aur main tum men.

²¹jis kay paas meray ahkaam hain aur jo un kay mutaabiq zindagee guzaarta hai, vahee mujhay piyaar karta hai. aur jo mujhay piyaar karta hai usay mera baap piyaar karega. main bhee usay piyaar karoonga aur apnay aap ko us par zaahir karoonga.”

²²yahoodaah (yahoodaah iskariyotee naheen) nay poochha, “khudaavand, kya vajah hai ki aap apnay aap ko sirf ham par zaahir karengay aur duniya par naheen?”

²³eesa nay javaab diya, “agar koee mujhay piyaar karay to vah meray kalaam kay mutaabiq zindagee guzaarega. mera baap aisay shakhs ko piyaar karega aur ham us kay paas a kar us kay saath sukoonat karengay. ²⁴jo mujh say muhabbat naheen karta vah meree baaton kay mutaabiq zindagee naheen guzaarta. aur jo kalaam tum mujh say suntay ho vah mera apna kalaam naheen hai balki baap ka hai jis nay mujhay bheja hai.

²⁵yah sab kuchh main nay tumhaaray saath rahetay huay tum ko bataaya hai. ²⁶lekin baad men rooh-ul-quds, jisay baap meray naam say bhejega tum ko sab kuchh sikhaaega. yah madadgaar tum ko har baat kee yaad dilaaega jo main nay tum ko bataaee hai.

²⁷main tumhaaray paas salaamatee chhoday jaata hoon, apnee hee salaamatee tum ko day deta hoon. aur main isay yoon naheen deta jis tarah duniya detee hai. tumhaara dil na ghabraaay aur na daray. ²⁸tum nay mujh say sun liya hai ki ‘main ja raha hoon aur tumhaaray paas vaapas aaoonga.’ agar tum mujh say muhabbat rakhtay to tum is baat par khush hotay ki main baap kay paas ja raha hoon, kyoonki baap mujh say bada hai. ²⁹main nay tum ko pahelay say bata diya hai, is say peshtar ki yah ho, taaki jab pesh aaay to tum eemaan laao. ³⁰ab say main tum say ziyaada baaten naheen karoonga, kyoonki is duniya ka hukmaraan a raha hai. usay mujh par koee qaaboo naheen hai, ³¹lekin duniya yah jaan lay ki main baap ko piyaar karta hoon aur vahee kuchh karta hoon jis ka hukm vah mujhay deta hai.

ab utho, ham yahaan say chalen.