Yarmiyaah 9

¹kaash mera sar paanee ka mamba aur meree aankhen aansooon ka chashma hon taaki main din raat apnee qaum kay maqtoolon par aah-o-zaaree kar sakoon.

dhokebaazon kee qaum

²kaash registaan men kaheen musaafiron kay liyay saraay ho taaki main apnee qaum ko chhod kar vahaan chala jaaoon. kyoonki sab zinaakaar, sab ghaddaaron ka jatha hain.

³rabb farmaata hai, “vah apnee zabaan say jhoot kay teer chalaatay hain, aur mulk men un kee taaqat diyaanatdaaree par mabnee naheen hotee. neez, vah badtar hotay ja rahay hain. mujhay to vah jaantay hee naheen. ⁴har ek apnay padosee say khabardaar rahay, aur apnay kisee bhee bhaaee par bharosa mat rakhna. kyoonki har bhaaee chaalaakee karnay men maahir hai, aur har padosee tuhamat lagaanay par tula raheta hai. ⁵har ek apnay padosee ko dhoka deta hai, koee bhee sachch naheen bolta. unhon nay apnee zabaan ko jhoot bolna sikhaaya hai, aur ab vah ghalat kaam kartay kartay thak gaay hain. ⁶ai yaramiyaah, too fareb say ghira raheta hai, aur yah log fareb kay baais hee mujhay jaannay say inkaar kartay hain.”

⁷is liyay rabb-ul-afwaaj farmaata hai, “dekho, main unhen khaam chaandee kee tarah pighla kar aazmaaoonga, kyoonki main apnee qaum, apnee betee kay saath aur kya kar sakta hoon? ⁸un kee zabaanen muhalak teer hain. un kay munh padosee say sulah-salaamatee kee baaten kartay hain jabki andar hee andar vah us kee taak men baithay hain.” ⁹rabb farmaata hai, “kya mujhay unhen is kee saza naheen denee chaahiay? kya mujhay aisee qaum say badla naheen lena chaahiay?”

noha karo!

¹⁰main pahaadon kay baaray men aah-o-zaaree karoonga, biyaabaan kee charaagaahon par maatam ka geet gaaoonga. kyoonki vah yoon tabaah ho gaay hain ki na koee un men say guzarta, na revdon kee aavaazen un men sunaaee detee hain. parinday aur jaanvar sab bhaag kar chalay gaay hain. ¹¹“yarooshalam ko main malbay ka dher bana doonga, aur aainda geedad us men ja basengay. yahoodaah kay shaheron ko main veeraan-o-sunsaan kar doonga. ek bhee un men naheen basega.”

¹²kaun itna daanishmand hai ki yah samajh sakay? kis ko rabb say itnee hidaayat milee hai ki vah bayaan kar sakay ki mulk kyoon barbaad ho gaya hai? vah kyoon registaan jaisa ban gaya hai, itna veeraan ki us men say koee naheen guzarta?

¹³rabb nay farmaaya, “vajah yah hai ki unhon nay meree shareeat ko tark kiya, vah hidaayat jo main nay khud unhen dee thee. na unhon nay meree sunee, na meree shareeat kee pairvee kee. ¹⁴is kay bajaay vah apnay ziddee dilon kee pairvee karkay baal devtaaon kay peechhay lag gaay hain. unhon nay vahee kuchh kiya jo un kay baapdaada nay unhen sikhaaya tha.”

¹⁵is liyay rabb-ul-afwaaj jo israaeel ka khuda hai farmaata hai, “dekho, main is qaum ko kadva khaana khila kar zahereela paanee pila doonga. ¹⁶main unhen aisee qaumon men muntashir kar doonga jin say na vah aur na un kay baapdaada vaaqif thay. meree talvaar us vaqt tak un kay peechhay padee rahegee jab tak halaak na ho jaaen.” ¹⁷rabb-ul-afwaaj farmaata hai, “dhyaan day kar girya karnay vaalee aurton ko bulaao. jo janaazon par vaavaila kartee hain un men say sab say maahir aurton ko bulaao.

¹⁸vah jald a kar ham par aah-o-zaaree karen taaki hamaaree aankhon say aansoo bah niklen, hamaaree palkon say paanee khoob tapaknay lagay.

¹⁹kyoonki siyyoon say girya kee aavaazen buland ho rahee hain, ‘haay, hamaaray saath kaisee ziyaadtee huee hai, hamaaree kaisee rusvaaee huee hai! ham mulk ko chhodnay par majboor hain, kyoonki dushman nay hamaaray gharon ko dha diya hai’.”

²⁰ai aurto, rabb ka paighaam suno. apnay kaanon ko us kee har baat par dharo! apnee betiyon ko noha karnay kee taaleem do, ek doosree ko maatam ka yah geet sikhaao,

²¹“maut phalaang kar hamaaree khidkiyon men say ghus aaee aur hamaaray qilaon men daakhil huee hai. ab vah bachchon ko galiyon men say aur naujvaanon ko chaukon men say mita daalnay ja rahee hai.”

²²rabb farmaata hai, “naashen kheton men gobar kee tarah idhar udhar bikhree padee rahengee. jis tarah kata hua gandum fasal kaatnay vaalay kay peechhay idhar udhar pada raheta hai usee tarah laashen idhar udhar padee rahengee. lekin unhen ikattha karnay vaala koee naheen hoga.”

²³rabb farmaata hai, “na daanishmand apnee hikmat par fakhar karay, na zoraavar apnay zor par ya ameer apnee daulat par. ²⁴fakhar karnay vaala fakhar karay ki usay samajh haasil hai, ki vah rabb ko jaanta hai aur ki main rabb hoon jo duniya men meharbaanee, insaaf aur raastee ko amal men laata hoon. kyoonki yahee cheezen mujhay pasand hain.”

²⁵rabb farmaata hai, “aisa vaqt a raha hai jab main un sab ko saza doonga jin ka sirf jismaanee khatna hua hai. ²⁶in men misr, yahoodaah, adom, ammon, moaab aur vah shaamil hain jo registaan kay kinaaray kinaaray rahetay hain. kyoonki go yah tamaam aqvaam zaahiree taur par khatna kee rasm ada kartee hain, lekin un ka khatna baatinee taur par naheen hua. dhyaan do ki israaeel kee bhee yahee haalat hai.”