Yarmiyaah 8
1rabb farmaata hai, “us vaqt dushman qabron ko khol kar yahoodaah kay baadshaahon, afsaron, imaamon, nabiyon aur yarooshalam kay aam baashindon kee haddiyon ko nikaalegaa 2aur zameen par bikher dega. vahaan vah un kay saamnay padee rahengee jo unhen piyaaray thay yaanee sooraj, chaand aur sitaaron kay tamaam lashkar kay saamnay. kyoonki vah un hee kee khidmat kartay, un hee kay peechhay chaltay, un hee kay taalib rahetay, aur un hee ko sijda kartay thay. un kee haddiyaan dubaara na ikatthee kee jaaengee, na dafan kee jaaengee balki khet men gobar kee tarah bikhree padee rahengee. 3aur jahaan bhee main is shareer qaum kay bachay huon ko muntashir karoonga vahaan vah sab kahengay ki kaash ham bhee zinda na rahen balki mar jaaen.” yah rabb-ul-afwaaj ka farmaan hai.
qaum tabaahakun raah say hatnay kay liyay tayyaar naheen
4“unhen bata, rabb farmaata hai ki jab koee gir jaata hai to kya dubaara uthnay kee koshish naheen karta? zaroor. aur jab koee saheeh raastay say door ho jaata hai to kya vah dubaara vaapas a jaanay kee koshish naheen karta? beshak. 5to phir yarooshalam kay yah log saheeh raah say baar baar kyoon bhatak jaatay hain? yah fareb kay saath liptay rahetay aur vaapas aanay say inkaar hee kartay hain. 6main nay dhyaan day kar dekha hai ki yah jhoot hee boltay hain. koee bhee pachhta kar naheen kaheta, ‘yah kaisa ghalat kaam hai jo main nay kiya!’ jis tarah jang men ghoday dushman par toot padtay hain usee tarah har ek seedha apnee ghalat raah par daudta raheta hai. 7fiza men udnay vaalay laqlaq par ghaur karo jisay aanay jaanay kay muqarrara auqaat khoob maaloom hotay hain. faakhta, abaabeel aur bulbul par bhee dhyaan do jo sardiyon kay mausam men kaheen aur hotay hain, garmiyon kay mausam men kaheen aur. vah muqarrara auqaat say kabhee naheen hattay. lekin afsos, meree qaum rabb kee shareeat naheen jaantee.
8tum kis tarah kah saktay ho, ‘ham daanishmand hain, kyoonki hamaaray paas rabb kee shareeat hai’? haqeeqat men qaatibon kay farebdih qalam nay isay tod-marod kar bayaan kiya hai. 9suno, daanishmandon kee rusvaaee ho jaaegee, vah dahshatzada ho kar pakday jaaengay. dekho, rabb ka kalaam radd karnay kay baad un kee apnee hikmat kahaan rahee?
10is liyay main un kee beeviyon ko pardesiyon kay havaalay kar doonga aur un kay kheton ko aisay logon kay sapurd jo unhen nikaal dengay. kyoonki chhotay say lay kar baday tak sab kay sab naajaaiz nafa kay peechhay paday hain, nabiyon say lay kar imaamon tak sab dhokebaaz hain. 11vah meree qaum kay zakhm par aarizee marham-pattee laga kar kahetay hain, ‘ab sab kuchh theek ho gaya hai, ab salaamatee ka daur a gaya hai’ haalaanki salaamatee hai hee naheen.
12go aisa ghinauna ravayya un kay liyay sharm ka baais hona chaahiay, lekin vah sharm naheen kartay balki saraasar besharm hain. is liyay jab sab kuchh gir jaaega to yah log bhee gir jaaengay. jab main in par saza naazil karoonga to yah thokar kha kar khaak men mil jaaengay.” yah rabb ka farmaan hai.
13rabb farmaata hai, “main un kee pooree fasal chheen loonga. angoor kee bel par ek daana bhee naheen rahega, anjeer kay tamaam darakht phal say maheroom ho jaaengay balki tamaam pattay bhee jhad jaaengay. jo kuchh bhee main nay unhen ata kiya tha vah un say chheen liya jaaega.
14tab tum kahogay, ‘ham yahaan kyoon baithay rahen? aao, ham qil’aaband shaheron men panaah lay kar vaheen halaak ho jaaen. ham nay rabb apnay khuda ka gunaah kiya hai, aur ab ham is ka nateeja bhugat rahay hain. kyoonki usee nay hamen halaakat kay havaalay karkay hamen zahereela paanee pila diya hai. 15ham salaamatee kay intizaar men rahay, lekin haalaat theek na huay. ham shifa paanay kee ummeed rakhtay thay, lekin is kay bajaay ham par dahshat chha gaee. 16suno! dushman kay ghoday nathnay phula rahay hain. daan say un ka shor ham tak pahunch raha hai. un kay hinahinaanay say poora mulk tharathra raha hai, kyoonki aatay vaqt yah pooray mulk ko us kay shaheron aur baashindon samet hadap kar lengay’.”
apnee qaum par yaramiyaah ka nohaa
17rabb farmaata hai, “main tumhaaray khilaaf afaee bhej doonga, aisay zahereelay saamp jin kay khilaaf har jaadoomantr beasar rahega. yah tumhen kaatengay.” 18laailaaj gham mujh par haavee ho gaya, mera dil nidhaal ho gaya hai. 19suno! meree qaum doordaraaz mulk say cheekh cheekh kar madad kay liyay aavaaz day rahee hai. log poochhtay hain, “kya rabb siyyoon men naheen hai, kya yarooshalam ka baadshaah ab say vahaan sukoonat naheen karta?” “suno, unhon nay apnay mujassamon aur bekaar ajnabee buton kee pooja karkay mujhay kyoon taish dilaaya?”
20log aahen bhar bhar kar kahetay hain, “fasal kat gaee hai, phal chuna gaya hai, lekin ab tak hamen najaat haasil naheen huee.”
21meree qaum kee mukammal tabaahee dekh kar mera dil toot gaya hai. main maatam kar raha hoon, kyoonki us kee haalat itnee buree hai ki meray rongtay khaday ho gaay hain. 22kya jiliaad men marham naheen? kya vahaan daaktar naheen milta? mujhay bataao, meree qaum ka zakhm kyoon naheen bhartaa