Yarmiyaah 7
rabb kay ghar kay baaray men paighaam
1rabb yaramiyaah say hamkalaam hua, 2“rabb kay ghar kay sahen kay darvaazay par khada ho kar elaan kar ki ai yahoodaah kay tamaam baashindo, rabb ka kalaam suno! jitnay bhee rabb kee parastish karnay kay liyay in darvaazon men daakhil hotay hain vah sab tavajjuh den! 3rabb-ul-afwaaj jo israaeel ka khuda hai farmaata hai ki apnee zindagee aur chaal-chalan durust karo to main aainda bhee tumhen is maqaam par basnay doonga. 4un kay farebdih alfaaz par etimaad mat karo jo kahetay hain, ‘yahaan ham mahfooz hain kyoonki yah rabb ka ghar, rabb ka ghar, rabb ka ghar hai.’ 5suno, shart to yah hai ki tum apnee zindagee aur chaal-chalan durust karo aur ek doosray kay saath insaaf ka sulook karo, 6ki tum pardesee, yateem aur beva par zulm na karo, is jagah bequsoor ka khoon na bahaao aur ajnabee maaboodon kay peechhay lag kar apnay aap ko nuqsaan na pahunchaao. 7agar tum aisa karo to main aainda bhee tumhen is jagah basnay doonga, us mulk men jo main nay tumhaaray baapdaada ko hamesha kay liyay bakhsh diya tha.
8lekin afsos, tum farebdih alfaaz par bharosa rakhtay ho jo fuzool hee hain. 9tum chor, qaatil aur zinaakaar ho. neez tum jhootee qasam khaatay, baal devta kay huzoor bakhoor jalaatay aur ajnabee maaboodon kay peechhay lag jaatay ho, aisay devtaaon kay peechhay jin say tum pahelay vaaqif naheen thay. 10lekin saath saath tum yahaan meray huzoor bhee aatay ho. jis makaan par meray hee naam ka thappa laga hai usee men tum khaday ho kar kahetay ho, ‘ham mahfooz hain.’ tum rabb kay ghar men ibaadat karnay kay saath saath kis tarah yah tamaam ghinaunee harkaten jaaree rakh saktay ho?”
11rabb farmaata hai, “kya tumhaaray nazdeek yah makaan jis par meray hee naam ka thappa laga hai daakuon ka adda ban gaya hai? khabardaar! yah sab kuchh mujhay bhee nazar aata hai. 12saila shaher ka chakkar lagaao jahaan main nay pahelay apna naam basaaya tha. maaloom karo ki main nay apnee qaum israaeel kee bedeenee kay sabab say us shaher kay saath kya kiya.” 13rabb farmaata hai, “tum yah shareer harkaten kartay rahay, aur main baar baar tum say hamkalaam hota raha, lekin tum nay meree na sunee. main tumhen bulaata raha, lekin tum javaab denay kay liyay tayyaar na huay. 14is liyay ab main is ghar kay saath vah kuchh karoonga jo main nay saila kay saath kiya tha, go is par meray hee naam ka thappa laga hai, yah vah makaan hai jis par tum etimaad rakhtay ho aur jisay main nay tumhen aur tumhaaray baapdaada ko ata kiya tha. 15main tumhen apnay huzoor say nikaal doonga, bilkul usee tarah jis tarah main nay tumhaaray tamaam bhaaiyon yaanee israaeel [a] lafzee tarjuma : ifraaeem. kee aulaad ko nikaal diya tha.
logon kee naafarmaanee
16ai yaramiyaah, is qaum kay liyay dua mat kar. is kay liyay na iltija kar, na minnat. in logon kee khaatir mujhay tang na kar, kyoonki main teree naheen sunoonga. 17kya tujhay vah kuchh nazar naheen a raha jo yah yahoodaah kay shaheron aur yarooshalam kee galiyon men kar rahay hain? 18aur sab is men mulavvas hain. bachchay lakdee chun kar dher banaatay hain, phir baap usay aag lagaatay hain jabki aurten aata goondh goondh kar aag par aasmaan kee malika naamee devee kay liyay tikkiyaan pakaatee hain. mujhay tang karnay kay liyay vah ajnabee maaboodon ko mai kee nazren bhee pesh kartay hain.
19lekin haqeeqat men yah mujhay utna tang naheen kar rahay jitna apnay aap ko. aisee harkaton say vah apnee hee rusvaaee kar rahay hain.” 20rabb qaadir-ay-mutlaq farmaata hai, “mera qaher aur ghazab is maqaam par, insaan-o-haivaan par, khulay maidaan kay darakhton par aur zameen kee paidaavaar par naazil hoga. sab kuchh nazar-ay-aatish ho jaaega, aur koee usay bujha naheen sakega.”
21rabb-ul-afwaaj jo israaeel ka khuda hai farmaata hai, “bhasm honay vaalee qurbaaniyon ko mujhay pesh na karo, balki un ka gosht deegar qurbaaniyon samet khud kha lo. 22kyoonki jis din main tumhaaray baapdaada ko misr say nikaal laaya us din main nay unhen bhasm honay vaalee qurbaaniyaan aur deegar qurbaaniyaan chadhaanay ka hukm na diya. 23main nay unhen sirf yah hukm diya ki meree suno! tab hee main tumhaara khuda hoonga aur tum meree qaum hogay. pooray taur par us raah par chaltay raho jo main tumhen dikhaata hoon. tab hee tumhaaree khair hogee. 24lekin unhon nay meree na sunee, na dhyaan diya balki apnay shareer dil kee zid kay mutaabiq zindagee guzaarnay lagay. unhon nay meree taraf rujoo na kiya balki apna munh mujh say pher liya. 25jab say tumhaaray baapdaada misr say nikal aaay aaj tak main roz-ba-roz subah-saveray uth kar apnay khaadimon yaanee nabiyon ko tumhaaray paas bhejta raha. 26to bhee unhon nay na meree sunee, na tavajjuh dee. vah bazid rahay balki apnay baapdaada kee nisbat ziyaada buray thay.
27ai yaramiyaah, too unhen yah tamaam baaten bataaega, lekin vah teree naheen sunengay. too unhen bulaaega, lekin vah javaab naheen dengay. 28tab too unhen bataaega, ‘is qaum nay na rabb apnay khuda kee aavaaz sunee, na us kee tarbiyat qabool kee. diyaanatdaaree khatm ho kar un kay munh say mit gaee hai.’
vaadee-ay-bin-hinnoom men qaabil-ay-ghin rusoom
29apnay baalon ko kaat kar phaink day! ja, banjar teelon par maatam ka geet ga, kyoonki yah nasal rabb kay ghazab ka nishaana ban gaee hai, aur us nay isay radd karkay chhod diya hai.”
30kyoonki rabb farmaata hai, “jo kuchh yahoodaah kay baashindon nay kiya vah mujhay bahut bura lagta hai. unhon nay apnay ghinaunay buton ko meray naam kay liyay makhsoos ghar men rakh kar us kee behuramtee kee hai. 31saath saath unhon nay vaadee-ay-bin-hinnoom men vaaqay toofat kee oonchee jagahen taameer keen taaki apnay betay-betiyon ko jala kar qurbaan karen. main nay kabhee bhee aisee rasm ada karnay ka hukm naheen diya balki yah khayaal meray zahen men aaya tak naheen.
32chunaanchay rabb ka kalaam suno! vah din aanay vaalay hain jab yah maqaam ‘toofat’ ya ‘vaadee-ay-bin-hinnoom’ naheen kahelaaega balki ‘qatl-o-ghaarat kee vaadee.’ us vaqt log toofat men itnee laashen dafanaaengay ki aakhirkaar khaalee jagah naheen rahegee. 33tab is qaum kee laashen parindon aur janglee jaanvaron kee khuraak ban jaaengee, aur koee naheen hoga jo unhen bhaga day. 34main yahoodaah kay shaheron aur yarooshalam kee galiyon men khushee-o-shaadmaanee kee aavaazen khatm kar doonga, doolha dulhan kee aavaazen band ho jaaengee. kyoonki mulk veeraan-o-sunsaan ho jaaega.”