Yarmiyaah 6

yarooshalam dushmanon say ghira hua hai

¹ai binyameen kee aulaad, yarooshalam say nikal kar kaheen aur panaah lo! taqooa men narsinga phoonko! bait-karam men bhaagnay ka aisa ishaara khada kar jo sab ko nazar aaay! kyoonki shimaal say aafat naazil ho rahee hai, sab kuchh dhadaam say gir jaaega.

²siyyoon betee kitnee manamohan aur naazuk hai. lekin main usay halaak kar doonga, ³aur charvaahay apnay revdon ko lay kar us par toot padengay. vah apnay khaimon ko us kay ird-gird laga lengay, aur har ek ka revad char char kar apna hissa kha jaaega.

⁴vah kahengay, ‘aao, ham us say ladnay kay liyay tayyaar ho jaaen. aao, ham dopaher kay vaqt hamla karen! lekin afsos, din dhal raha hai, aur shaam kay saay lambay hotay ja rahay hain. ⁵koee baat naheen, raat kay vaqt hee ham us par chhaapa maarengay, usee vaqt ham us kay burjon ko gira dengay’.”

⁶rabb-ul-afwaaj farmaata hai, “darakhton ko kaato, mittee kay dheron say yarooshalam ka gheraaoo karo! shaher ko saza denee hai, kyoonki us men zulm hee zulm paaya jaata hai. ⁷jis tarah kuen say taaza paanee nikalta raheta hai usee tarah yarooshalam kee badee bhee taaza taaza us say nikaltee rahetee hai. zulm-o-tashaddud kee aavaazen us men goonjtee rahetee hain, us kee beemaar haalat aur zakhm lagaataar meray saamnay rahetay hain.

⁸ai yarooshalam, meree tarbiyat ko qabool kar, varna main tang a kar tujh say apna munh pher loonga, main tujhay tabaah kar doonga aur too ghair’aabaad ho jaaegee.”

⁹rabb-ul-afwaaj farmaata hai, “jis tarah angoor chunnay kay baad ghareeb log tamaam bacha khacha phal tod letay hain usee tarah israaeel ka bacha khacha hissa bhee ehatiyaat say tod liya jaaega. chunnay vaalay kee tarah dubaara apnay haath ko angoor kee shaakhon par say guzarnay day.”

¹⁰ai rabb, main kis say baat karoon, kis ko aagaah karoon? kaun sunega? dekh, un kay kaan naamakhtoon hain, is liyay vah sun hee naheen saktay. rabb ka kalaam unhen mazhakaakhez lagta hai, vah unhen naapsand hai. ¹¹is liyay main rabb kay ghazab say bhara hua hoon, main usay bardaasht kartay kartay itna thak gaya hoon ki usay mazeed naheen rok sakta.

“usay galiyon men khelnay vaalay bachchon aur jamaashuda naujvaanon par naazil kar, kyoonki sab ko giriftaar kiya jaaega, khwaah aadmee ho ya aurat, buzurg ho ya umrraseeda. ¹²un kay gharon ko kheton aur beeviyon samet doosron kay havaalay kiya jaaega, kyoonki main apna haath mulk kay baashindon kay khilaaf badhaaoonga.” yah rabb ka farmaan hai. ¹³“chhotay say lay kar baday tak sab ghalat nafa kay peechhay paday hain, nabee say lay kar imaam tak sab dhokebaaz hain. ¹⁴vah meree qaum kay zakhm par aarizee marham-pattee laga kar kahetay hain, ab sab kuchh theek ho gaya hai, ab salaamatee ka daur a gaya hai haalaanki salaamatee hai hee naheen. ¹⁵aisa ghinauna ravayya un kay liyay sharm ka baais hona chaahiay, lekin vah sharm naheen kartay balki saraasar besharm hain. is liyay jab sab kuchh gir jaaega to yah log bhee gir jaaengay. jab main in par saza naazil karoonga to yah thokar kha kar khaak men mil jaaengay.” yah rabb ka farmaan hai.

saheeh raastay kee talaash men raho

¹⁶rabb farmaata hai, “raaston kay paas khaday ho kar un ka muaaina karo! qadeem raahon kee tafteesh karkay pata karo ki un men say kaun see achchhee hai, phir us par chalo. tab tumhaaree jaan ko sukoon milega. lekin afsos, tum inkaar karkay kahetay ho, naheen, ham yah raah ikhtiyaar naheen karengay! ¹⁷dekho, main nay tum par paheredaar muqarrar kiay aur kaha, ‘jab narsinga phoonka jaaega to dhyaan do!’ lekin tum nay inkaar kiya, ‘naheen, ham tavajjuh naheen dengay.’

¹⁸chunaanchay ai qaumo, suno! ai jamaaat, jaan lay ki un kay saath kya kuchh kiya jaaega. ¹⁹ai zameen, dhyaan day ki main is qaum par kya aafat naazil karoonga. aur yah un kay apnay mansoobon ka phal hoga, kyoonki unhon nay meree baaton par tavajjuh na dee balki meree shareeat ko radd kar diya. ²⁰mujhay saba kay bakhoor ya doordaraaz mamaalik kay qeemtee masaalon kee kya parva! tumhaaree bhasm honay vaalee qurbaaniyaan mujhay pasand naheen, tumhaaree zabah kee qurbaaniyon say main lutf’andoz naheen hota.” ²¹rabb farmaata hai, “main is qaum kay raastay men aisee rukaavaten khadee kar doonga jin say baap aur beta thokar kha kar gir jaaengay. padosee aur dost mil kar halaak ho jaaengay.”

shimaal say dushman ka hamlaa

²²rabb farmaata hai, “shimaalee mulk say fauj a rahee hai, duniya kee intiha say ek azeem qaum ko jagaaya ja raha hai. ²³us kay zaalim aur berahem faujee kamaan aur shamsheer say les hain. suno un ka shor! mutlaatim samundar kee see aavaaz sunaaee day rahee hai. ai siyyoon betee, vah ghodon par saf’aara ho kar tujh par hamla karnay a rahay hain.”

²⁴un kay baaray men ittila pa kar hamaaray haath himmat haar gaay hain. ham par khauf taaree ho gaya hai, hamen dard-ay-zah men mubtala aurat ka sa dard ho raha hai. ²⁵shaher say nikal kar khet men ya sadak par mat chalna, kyoonki vahaan dushman talvaar thaamay khada hai, chaaron taraf dahshat hee dahshat phail gaee hai.

²⁶ai meree qaum, taat ka libaas pahen kar raakh men lot-pot ho ja. yoon maatam kar jis tarah iklauta beta mar gaya ho. zor say vaavaila kar, kyoonki achaanak hee halaakoo ham par chhaapa maarega.

yaramiyaah qaum ko aazmaata hai

²⁷rabb mujh say hamkalaam hua, “main nay tujhay dhaaton ko jaanchnay kee zimmaadaaree dee hai, aur meree qaum vah dhaat hai jis ka chaal-chalan tujhay maaloom karkay parakhna hai.” ²⁸ai rabb, yah tamaam log badtareen qism kay sarkash hain. tuhamat lagaana in kee rozee ban gaya hai. yah peetal aur loha hee hain, sab kay sab tabaahee ka baais hain. ²⁹dhaunknee khoob hava day rahee hai taaki seesa aag men pighal kar chaandee say alag ho jaaay. lekin afsos, saaree mehanat raaygaan hai. seesa yaanee bedeenon ko alag naheen kiya ja sakta, khaalis chaandee baaqee naheen rahetee. ³⁰chunaanchay unhen ‘raddee chaandee’ qaraar diya jaata hai, kyoonki rabb nay unhen radd kar diya hai.