Yarmiyaah 51
baabal ka zamaana khatm hai
1rabb farmaata hai, “main baabal aur us kay baashindon kay khilaaf muhalak aandhee chalaaoonga. 2main mulk-ay-baabal men ghairmulkee bhejoonga taaki vah usay anaaj kee tarah phatak kar tabaah karen. aafat kay din vah pooray mulk ko gheray rakhengay. 3teer’andaaz ko teer chalaanay say roko! faujee ko ziraabaktar pahen kar ladnay kay liyay khaday honay na do! un kay naujvaanon ko zinda mat chhodna balki fauj ko saraasar nest-o-naabood kar dena!
4tab mulk-ay-baabal men har taraf laashen nazar aaengee, talvaar kay chiray huay us kee galiyon men paday rahengay. 5kyoonki rabb-ul-afwaaj nay israaeel aur yahoodaah ko akelaa [a] lafzee tarjuma : randva. naheen chhoda, un kay khuda nay unhen tark naheen kiya. mulk-ay-baabal ka qusoor nihaayat sangeen hai, us nay israaeel kay quddoos ka gunaah kiya hai. 6baabal say bhaag niklo! daud kar apnee jaan bachaao, varna tumhen bhee baabal kay qusoor ka ajr milega. kyoonki rabb kay intiqaam ka vaqt a pahuncha hai, ab baabal ko munaasib saza milegee.
7baabal rabb kay haath men sonay ka piyaala tha jisay us nay pooree duniya ko pila diya. aqvaam us kee mai pee pee kar matwaalee ho gaeen, is liyay vah deevaanee ho gaee hain. 8lekin ab yah piyaala achaanak gir kar toot gaya hai. chunaanchay baabal par aah-o-zaaree karo! us kay dard aur takleef ko door karnay kay liyay balsaan lay aao, shaayad usay shifa milay. 9lekin log kahengay, ‘ham baabal kee madad karna chaahatay thay, lekin us kay zakhm bhar naheen saktay. is liyay aao, ham usay chhod den aur har ek apnay apnay mulk men ja basay. kyoonki us kee sakht adaalat ho rahee hai, jitna aasmaan aur baadal buland hain utnee hee sakht us kee saza hai.’
10rabb kee qaum bolay, ‘rabb hamaaree raastee raushnee men laaya hai. aao, ham siyyoon men vah kuchh sunaaen jo rabb hamaaray khuda nay kiya hai.’
11teeron ko tez karo! apna tarkash un say bhar lo! rabb maadee baadshaahon ko harkat men laaya hai, kyoonki vah baabal ko tabaah karnay ka iraada rakhta hai. rabb intiqaam lega, apnay ghar kee tabaahee ka badla lega. 12baabal kee faseel kay khilaaf jang ka jhanda gaad do! shaher kay ird-gird paheraadaaree ka band-o-bast mazboot karo, haan mazeed santree khaday karo. kyoonki rabb nay baabal kay baashindon kay khilaaf mansooba baandh kar us ka elaan kiya hai, aur ab vah usay poora karega.
13ai baabal betee, too gaheray paanee kay paas bastee aur nihaayat daulatmand ho gaee hai. lekin khabardaar! tera anjaam qareeb hee hai, teree zindagee ka dhaaga kat gaya hai. 14rabb-ul-afwaaj nay apnay naam kee qasam kha kar farmaaya hai ki main tujhay dushmanon say bhar doonga, aur vah tiddiyon kay ghol kee tarah pooray shaher ko dhaamp lengay. har jagah vah tujh par fatah kay naaray lagaaengay.
15dekho, allaah hee nay apnee qudrat say zameen ko khalaq kiya, usee nay apnee hikmat say duniya kee bunyaad rakhee, aur usee nay apnee samajh kay mutaabiq aasmaan ko khaimay kee tarah taan liya. 16us kay hukm par aasmaan par paanee kay zakheeray garajnay lagtay hain. vah duniya kee intiha say baadal chadhnay deta, baarish kay saath bijlee kadaknay deta aur apnay godaamon say hava nikalnay deta hai.
17tamaam insaan ahemaq aur samajh say khaalee hain. har sunaar apnay buton kay baais sharminda hua hai. us kay but dhoka hee hain, un men dam naheen. 18vah fuzool aur mazhakaakhez hain. adaalat kay vaqt vah nest ho jaaengay. 19allaah jo yaaqoob ka mauroosee hissa hai in kee maanind naheen hai. vah sab ka khaaliq hai, aur israaeelee qaum us ka mauroosee hissa hai. rabb-ul-afwaaj hee us ka naam hai.
ab rabb baabal par hamla karegaa
20ai baabal, too mera hathoda, mera jangee hathiyaar tha. teray hee zareeay main nay qaumon ko paash paash kar diya, saltanaton ko khaak men mila diya. 21teray hee zareeay main nay ghodon ko savaaron samet aur rathon ko rathbaanon samet paash paash kar diya. 22teray hee zareeay main nay mardon aur aurton, buzurgon aur bachchon, naujvaanon aur kunvaariyon ko paara paara kar diya. 23teray hee zareeay main nay gallaabaan aur us kay revad, kisaan aur us kay bailon, gavarnaron aur sarkaaree mulaazimon ko reza reza kar diya.
24lekin ab main baabal aur us kay tamaam baashindon ko un kee siyyoon kay saath badasulookee ka poora ajr doonga. tum apnee aankhon say is kay gavaah hogay.” yah rabb ka farmaan hai.
25rabb farmaata hai, “ai baabal, pahelay too muhalak pahaad tha jis nay tamaam duniya ka satyaanaas kar diya. lekin ab main tujh say nipat leta hoon. main apna haath teray khilaaf badha kar tujhay oonchee oonchee chataanon say patakh doonga. aakhirkaar malbay ka jhulsa hua dher hee baaqee rahega. 26too itna tabaah ho jaaega ki teray patthar na kisee makaan kay konon kay liyay, na kisee bunyaad kay liyay istemaal ho sakengay.” yah rabb ka farmaan hai.
27“aao, mulk men jang ka jhanda gaad do! aqvaam men narsinga phoonk phoonk kar unhen baabal kay khilaaf ladnay kay liyay makhsoos karo! us say ladnay kay liyay araaraat, minnee aur ashkanaaz kee saltanaton ko bulaao! baabal say ladnay kay liyay kamaandar muqarrar karo. ghoday bhej do jo tiddiyon kay haulnaak ghol kee tarah us par toot paden. 28aqvaam ko baabal say ladnay kay liyay makhsoos karo! maadee baadshaah apnay gavarnaron, afsaron aur tamaam mutee mamaalik samet tayyaar ho jaaen. 29zameen laraztee aur thartharaatee hai, kyoonki rabb ka mansooba atal hai, vah mulk-ay-baabal ko yoon tabaah karna chaahata hai ki aainda us men koee na rahay.
30baabal kay jang’aazmooda faujee ladnay say baaz a kar apnay qilaon men chhup gaay hain. un kee taaqat jaatee rahee hai, vah aurton kee maanind ho gaay hain. ab baabal kay gharon ko aag lag gaee hai, faseel kay darvaazon kay kunday toot gaay hain. 31yakay baad deegray qaasid daud kar shaah-ay-baabal ko ittila detay hain, ‘shaher chaaron taraf say dushman kay qabzay men hai! 32darya ko paar karnay kay tamaam raastay us kay haath men hain, sarkanday ka daldlee ilaaqa jal raha hai, aur faujee khauf kay maaray behiss-o-harkat ho gaay hain’.”
33kyoonki rabb-ul-afwaaj jo israaeel ka khuda hai farmaata hai, “fasal kee kataaee say pahelay pahelay gaahanay kee jagah kay farsh ko daba daba kar mazboot kiya jaata hai. yahee baabal betee kee haalat hai. fasal kee kataaee qareeb a gaee hai, aur thodee der kay baad baabal ko paaon talay khoob dabaaya jaaega.
rabb baabal say yarooshalam ka intiqaam legaa
34siyyoon betee rotee hai, ‘shaah-ay-baabal nabookadnazzar nay mujhay hadap kar liya, choos liya, khaalee bartan kee tarah ek taraf rakh diya hai. us nay ajhdahay kee tarah mujhay nigal liya, apnay pet ko meree lazeez cheezon say bhar liya hai. phir us nay mujhay vatan say nikaal diya.’ 35lekin ab siyyoon kee rahenay vaalee kahay, ‘jo ziyaadtee meray saath huee vah baabal kay saath kee jaaay. jo qatl-o-ghaarat mujh men huee vah baabal kay baashindon men mach jaaay’!”
36rabb yarooshalam say farmaata hai, “dekh, main khud teray haq men ladoonga, main khud tera badla loonga. tab us ka samundar khushk ho jaaega, us kay chashmay band ho jaaengay. 37baabal malbay ka dher ban jaaega. geedad hee us men apna ghar bana lengay. usay dekh kar guzarnay vaalon kay rongtay khaday ho jaaengay, aur vah ‘tauba tauba’ kah kar aagay nikalengay. koee bhee vahaan naheen basega.
38is vaqt baabal kay baashinday sherbabar kee tarah dahaad rahay hain, vah sher kay bachchon kee tarah ghurra rahay hain. 39lekin rabb farmaata hai ki vah abhee mast hongay ki main un kay liyay ziyaafat tayyaar karoonga, ek aisee ziyaafat jis men vah matwaalay ho kar khushee kay naaray maarengay, phir abdee neend so jaaengay. us neend say vah kabhee naheen uthengay. 40main unhen bhed kay bachchon, mendhon aur bakron kee tarah qasaaee kay paas lay jaaoonga.
41haay, baabal dushman kay qabzay men a gaya hai! jis kee taareef pooree duniya kartee thee vah chheen liya gaya hai! ab usay dekh kar qaumon kay rongtay khaday ho jaatay hain. 42samundar baabal par chadh aaya hai, us kee garajtee laheron nay usay dhaamp liya hai. 43us kay shaher registaan ban gaay hain, ab chaaron taraf khushk aur veeraan biyaabaan hee nazar aata hai. na koee us men raheta, na us men say guzarta hai.
44main baabal kay devta bel ko saza day kar us kay munh say vah kuchh nikaal doonga jo us nay hadap kar liya tha. ab say deegar aqvaam jauq-dar-jauq us kay paas naheen aaengee, kyoonki baabal kee faseel bhee gir gaee hai.
45ai meree qaum, baabal say nikal a! har ek apnee jaan bachaanay kay liyay vahaan say bhaag jaaay, kyoonki rabb ka shadeed ghazab us par naazil honay ko hai.
46jab afwaahen mulk men phail jaaen to himmat mat haarna, na khauf khaana. kyoonki har saal koee aur afwaah phailegee, zulm par zulm aur hukmaraan par hukmaraan aata rahega. 47kyoonki vah vaqt qareeb hee hai jab main baabal kay buton ko saza doonga. tab pooray mulk kee behuramtee ho jaaegee, aur us kay maqtool us kay beech men gir kar paday rahengay. 48tab aasmaan-o-zameen aur jo kuchh un men hai baabal par shaadiyaana bajaaengay. kyoonki tabaahakun dushman shimaal say us par hamla karnay a raha hai.” yah rabb ka farmaan hai.
49“baabal nay pooree duniya men beshumaar logon ko qatl kiya hai, lekin ab vah khud halaak ho jaaega, is liyay ki us nay itnay israaeeliyon ko qatl kiya hai.
50ai talvaar say bachay huay israaeeliyo, rukay na raho balki ravaana ho jaao! doordaraaz mulk men rabb ko yaad karo, yarooshalam ka bhee khayaal karo! 51beshak tum kahetay ho, ‘ham sharminda hain, hamaaree sakht rusvaaee huee hai, sharm kay maaray ham nay apnay munh ko dhaamp liya hai. kyoonki pardesee rabb kay ghar kee muqaddastareen jagahon men ghus aaay hain.’
52lekin rabb farmaata hai ki vah vaqt aanay vaala hai jab main baabal kay buton ko saza doonga. tab us kay pooray mulk men maut kay ghaat utarnay vaalon kee aahen sunaaee dengee. 53khwaah baabal kee taaqat aasmaan tak oonchee kyoon na ho, khwaah vah apnay buland qilaay ko kitna mazboot kyoon na karay to bhee vah gir jaaega. main tabaah karnay vaalay faujee us par chadha laaoonga.” yah rabb ka farmaan hai.
54“suno! baabal men cheekhen buland ho rahee hain, mulk-ay-baabal dhadaam say gir pada hai. 55kyoonki rabb baabal ko barbaad kar raha, vah us ka shor-sharaaba band kar raha hai. dushman kee laheren mutlaatim samundar kee tarah us par chadh rahee hain, un kee garajtee aavaaz fiza men goonj rahee hai. 56kyoonki tabaahakun dushman baabal par hamla karnay a raha hai. tab us kay soormaaon ko pakda jaaega aur un kee kamaanen toot jaaengee. kyoonki rabb intiqaam ka khuda hai, vah har insaan ko us ka munaasib ajr dega.”
57duniya ka baadshaah jis ka naam rabb-ul-afwaaj hai farmaata hai, “main baabal kay badon ko matwaala karoonga, khwaah vah buzurg, daanishmand, gavarnar, sarkaaree afsar ya faujee kyoon na hon. tab vah abdee neend so jaaengay aur dubaara kabhee naheen uthengay.”
58rabb farmaata hai, “baabal kee motee motee faseel ko khaak men milaaya jaaega, aur us kay oonchay oonchay darvaazay raakh ho jaaengay. tab yah kahaavat baabal par saadiq aaegee, ‘aqvaam kee mehanat-mashaqqat befaaida rahee, jo kuchh unhon nay badee mushkil say banaaya vah nazar-ay-aatish ho gaya hai’.”
yaramiyaah apna paighaam baabal bhejta hai
59yahoodaah kay baadshaah sidaqiyaah kay chauthay saal men yaramiyaah nabee nay yah kalaam siraayaah bin nairiyaah bin mahsiyaah kay sapurd kar diya jo us vaqt baadshaah kay saath baabal kay liyay ravaana hua. safar ka poora band-o-bast siraayaah kay haath men tha.
60yaramiyaah nay toomaar men baabal par naazil honay vaalee aafat kee pooree tafseel likh dee thee. us kay baabal kay baaray men tamaam paighaamaat us men qalamband thay. 61us nay siraayaah say kaha, “baabal pahunch kar dhyaan say toomaar kee tamaam baaton kee tilaavat karen. 62tab dua karen, ‘ai rabb, too nay elaan kiya hai ki main baabal ko yoon tabaah karoonga ki aainda na insaan, na haivaan us men basega. shaher abad tak veeraan-o-sunsaan rahega.’ 63pooree kitaab kee tilaavat kay ikhtitaam par usay patthar kay saath baandh len, phir darya-ay-furaat men phaink kar 64bolen, ‘baabal ka beda is patthar kee tarah gharq ho jaaega. jo aafat main us par naazil karoonga us say usay yoon khaak men milaaya jaaega ki dubaara kabhee naheen uthega. vah saraasar khatm ho jaaega’.”
yaramiyaah kay paighaamaat yahaan ikhtitaam par pahunch gaay hain.