Yarmiyaah 50
baabal kee adaalat
1mulk-ay-baabal aur us kay daar-ul-hakoomat baabal kay baaray men rabb ka kalaam yaramiyaah nabee par naazil hua,
2“aqvaam kay saamnay elaan karo, har jagah ittila do! jhanda gaad kar kuchh na chhupaao balki sab ko saaf bataao, ‘baabal shaher dushman kay qabzay men a gaya hai! bel devta kee behuramtee huee hai, marduk devta paash paash ho gaya hai. baabal kay tamaam devtaaon kee behuramtee huee hai, tamaam but chikna-choor ho gaay hain!’ 3kyoonki shimaal say ek qaum baabal par chadh aaee hai jo pooray mulk ko barbaad kar degee. insaan aur haivaan sab hijrat kar jaaengay, mulk men koee naheen rahega.”
4rabb farmaata hai, “jab yah vaqt aaega to israaeel aur yahoodaah kay log mil kar apnay vatan men vaapas aaengay. tab vah rotay huay rabb apnay khuda ko talaash karnay aaengay. 5vah siyyoon ka raasta poochh poochh kar apna rukh us taraf kar lengay aur kahengay, ‘aao, ham rabb kay saath lipat jaaen, ham us kay saath abdee ahd baandh len jo kabhee na bhulaaya jaaay.’ 6meree qaum kee haalat gumshuda bhed-bakriyon kee maanind thee. kyoonki un kay gallaabaanon nay unhen ghalat raah par la kar farebdih pahaadon par aavaara phirnay diya tha. yoon pahaadon par idhar udhar ghoomtay ghoomtay vah apnee aaraamgaah bhool gaay thay. 7jo bhee un ko paatay vah unhen pakad kar kha jaatay thay. un kay mukhaalif kahetay thay, ‘is men hamaara kya qusoor hai? unhon nay to rabb ka gunaah kiya hai, go vah un kee haqeeqee charaagaah hai aur un kay baapdaada us par ummeed rakhtay thay.’
baabal say hijrat karo!
8ai meree qaum, mulk-ay-baabal aur us kay daar-ul-hakoomat say bhaag niklo! un bakron kee maanind ban jaao jo revad kee raahanumaaee kartay hain. 9kyoonki main shimaalee mulk men badee qaumon kay ittihaad ko baabal par hamla karnay par ubhaaroonga, jo us kay khilaaf saf’aara ho kar us par qabza karega. dushman kay teer’andaaz itnay maahir hongay ki har teer nishaanay par lag jaaega.” 10rabb farmaata hai, “baabal ko yoon loot liya jaaega ki tamaam lootnay vaalay ser ho jaaengay.
11ai meray mauroosee hissay ko lootnay vaalo, beshak tum is vaqt shaadiyaana baja kar khushee manaatay ho. beshak tum gaahatay huay bachhdon kee tarah uchhaltay koodtay aur ghodon kee tarah hinahinaatay ho. 12lekin aainda tumhaaree maan behad sharminda ho jaaegee, jis nay tumhen janm diya vah rusva ho jaaegee. aainda baabal sab say zaleel qaum hogee, vah khushk aur veeraan registaan hee hogee. 13jab rabb ka ghazab un par naazil hoga to vahaan koee aabaad naheen rahega balki mulk saraasar veeraan-o-sunsaan rahega. baabal say guzarnay vaalon kay rongtay khaday ho jaaengay, us kay zakhmon ko dekh kar sab ‘tauba tauba’ kahengay.
14ai teer’andaazo, baabal shaher ko gher kar us par teer barsaao! tamaam teer istemaal karo, ek bhee baaqee na rahay, kyoonki us nay rabb ka gunaah kiya hai. 15chaaron taraf us kay khilaaf jang kay naaray lagaao! dekho, us nay hathiyaar daal diay hain. us kay burj gir gaay, us kee deevaaren mismaar ho gaee hain. rabb intiqaam lay raha hai, chunaanchay baabal say khoob badla lo. jo sulook us nay doosron kay saath kiya, vahee us kay saath karo. 16baabal men jo beej botay aur fasal kay vaqt daraantee chalaatay hain unhen roo-ay-zameen par say mita do. us vaqt shaher kay pardesee muhalak talvaar say bhaag kar apnay apnay vatan men vaapas chalay jaaengay.
17israaeelee qaum sherbabron kay hamlay say bikhray huay revad kee maanind hai. kyoonki pahelay shaah-ay-asoor nay a kar usay hadap kar liya, phir shaah-ay-baabal nabookadnazzar nay us kee haddiyon ko chaba liya.” 18is liyay rabb-ul-afwaaj jo israaeel ka khuda hai farmaata hai, “pahelay main nay shaah-ay-asoor ko saza dee, aur ab main shaah-ay-baabal ko us kay mulk samet vahee saza doonga. 19lekin israaeel ko main us kee apnee charaagaah men vaapas laaoonga, aur vah dubaara karmil aur basan kee dhalaanon par charega, vah dubaara ifraaeem aur jiliaad kay pahaadee ilaaqon men ser ho jaaega.” 20rabb farmaata hai, “un dinon men jo israaeel ka qusoor dhoond nikaalnay kee koshish karay usay kuchh naheen milega. yahee yahoodaah kee haalat bhee hogee. us kay gunaah paaay naheen jaaengay, kyoonki jin logon ko main zinda chhodoonga unhen main muaaf kar doonga.”
allaah apnay ghar ka badla leta hai
21rabb farmaata hai, “mulk-ay-maraataaim aur fiqod kay baashindon par hamla karo! unhen maartay maartay safha-ay-hastee say mita do! jo bhee hukm main nay diya us par amal karo.
22mulk-ay-baabal men jang ka shor-sharaaba suno! baabal kee haulnaak shikast dekho! 23jo pahelay tamaam duniya ka hathoda tha usay tod kar tukday tukday kar diya gaya hai. baabal ko dekh kar logon ko sakht dhachka lagta hai.
24ai baabal, main nay teray liyay phanda laga diya, aur tujhay pata na chala balki too us men phans gaya. choonki too nay rabb ka muqaabla kiya isee liyay tera khoj lagaaya gaya aur tujhay pakda gaya.” 25qaadir-ay-mutlaq jo rabb-ul-afwaaj hai farmaata hai, “main apna aslihaakhaana khol kar apna ghazab naazil karnay kay hathiyaar nikaal laaya hoon, kyoonki mulk-ay-baabal men un kee ashadd zaroorat hai.
26chaaron taraf say baabal par chadh aao! us kay anaaj kay godaamon ko khol kar saaray maal ka dher lagaao! phir sab kuchh nest-o-naabood karo, kuchh bacha na rahay. 27us kay tamaam bailon ko zabah karo! sab qasaaee kee zad men aaen! un par afsos, kyoonki un ka muqarrara din, un kee saza ka vaqt a gaya hai.
28suno! mulk-ay-baabal say bachay huay panaahaguzeen siyyoon men bata rahay hain ki rabb hamaaray khuda nay kis tarah intiqaam liya. kyoonki ab us nay apnay ghar ka badla liya hai!
29tamaam teer’andaazon ko bulaao taaki baabal par hamla karen! usay gher lo taaki koee na bachay. usay us kee harkaton ka munaasib ajr do! jo bura sulook us nay doosron kay saath kiya vahee us kay saath karo. kyoonki us ka ravayya rabb, israaeel kay quddoos kay saath gustaakhaana tha. 30is liyay us kay naujavaan galiyon men gir kar mar jaaengay, us kay tamaam faujee us din halaak ho jaaengay.” yah rabb ka farmaan hai.
31qaadir-ay-mutlaq rabb-ul-afwaaj farmaata hai, “ai gustaakh shaher, main tujh say nipatnay vaala hoon. kyoonki vah din a gaya hai jab tujhay saza milnee hai. 32tab gustaakh shaher thokar kha kar gir jaaega, aur koee usay dubaara khada naheen karega. main us kay tamaam shaheron men aag laga doonga jo gird-o-navaah men sab kuchh raakh kar degee.”
rabb apnee qaum ko riha karvaata hai
33rabb-ul-afwaaj farmaata hai, “israaeel aur yahoodaah kay logon par zulm hua hai. jinhon nay unhen aseer karkay jilaavatan kiya hai vah unhen riha naheen karna chaahatay, unhen jaanay naheen detay. 34lekin un ka chhudaanay vaala qavee hai, us ka naam rabb-ul-afwaaj hai. vah khoob lad kar un ka muaamala durust karega taaki mulk ko aaraam-o-sukoon mil jaaay. lekin baabal kay baashindon ko vah thartharaanay dega.”
35rabb farmaata hai, “talvaar baabal kee qaum par toot paday! vah baabal kay baashindon, us kay buzurgon aur daanishmandon par toot paday! 36talvaar us kay jhootay nabiyon par toot paday taaki bevuqoof saabit hon. talvaar us kay soormaaon par toot paday taaki un par dahshat chha jaaay. 37talvaar baabal kay ghodon, rathon aur pardesee faujiyon par toot paday taaki vah aurton kee maanind ban jaaen. talvaar us kay khazaanon par toot paday taaki vah chheen liyay jaaen. 38talvaar us kay paanee kay zakheeron par toot paday taaki vah khushk ho jaaen. kyoonki mulk-ay-baabal buton say bhara hua hai, aisay buton say jin kay baais log deevaanon kee tarah phirtay hain. 39aakhir men galiyon men sirf registaan kay jaanvar aur janglee kuttay phirengay, vahaan uqaabee ulloo basengay. vah hamesha tak insaan kee bastiyon say maheroom aur nasal-dar-nasal ghair’aabaad rahega.” 40rabb farmaata hai, “us kee haalat sadoom aur amoora kee see hogee jinhen main nay pados kay shaheron samet ulta kar safha-ay-hastee say mita diya. aainda vahaan koee naheen basega, koee naheen aabaad hoga.” yah rabb ka farmaan hai.
shimaal say dushman a raha hai
41“dekho, shimaal say fauj a rahee hai, ek badee qaum aur mut’addid baadshaah duniya kee intiha say ravaana huay hain. 42us kay zaalim aur berahem faujee kamaan aur shamsheer say les hain. jab vah apnay ghodon par savaar ho kar chaltay hain to garajtay samundar ka sa shor barpa hota hai. ai baabal betee, vah sab jang kay liyay tayyaar ho kar tujh say ladnay a rahay hain. 43un kee khabar suntay hee shaah-ay-baabal himmat haar gaya hai. khaufzada ho kar vah dard-ay-zah men mubtala aurat kee tarah tadapnay laga hai.
44jis tarah sherbabar yardan kay jangalon say nikal kar shaadaab charaagaahon men charnay vaalee bhedon par toot padta hai usee tarah main baabal ko ek dam us kay mulk say bhaga doonga. phir main apnay chunay huay aadmee ko baabal par muqarrar karoonga. kyoonki kaun meray baraabar hai? kaun mujh say javaab talab kar sakta hai? vah gallaabaan kahaan hai jo mera muqaabla kar sakay?” 45chunaanchay baabal par rabb ka faisla suno, mulk-ay-baabal kay liyay us kay mansoobay par dhyaan do! “dushman pooray revad ko sab say nanhay bachchon say lay kar badon tak ghaseet kar lay jaaega. us kee charaagaah veeraan-o-sunsaan ho jaaegee.
46joon hee naara buland hoga ki baabal dushman kay qabzay men a gaya hai to zameen laraz uthegee. tab madad kay liyay baabal kee cheekhen deegar mamaalik tak goonjengee.”