Yarmiyaah 5

ab muaafee naamumkin hai

¹“yarooshalam kee galiyon men ghoomo phiro! har jagah ka mulaahaza karkay pata karo ki kya ho raha hai. us kay chaukon kee tafteesh bhee karo. agar tumhen ek bhee shakhs mil jaaay jo insaaf karay aur diyaanatdaaree ka taalib rahay to main shaher ko muaaf kar doonga. ²vah rabb kee hayaat kee qasam khaatay vaqt bhee jhoot boltay hain.”

³ai rabb, teree aankhen diyaanatdaaree dekhna chaahatee hain. too nay unhen maara, lekin unhen dukh na hua. too nay unhen kuchal daala, lekin vah tarbiyat paanay kay liyay tayyaar naheen. unhon nay apnay chiharay ko patthar say kaheen ziyaada sakht bana kar tauba karnay say inkaar kiya hai. ⁴main nay socha, “sirf ghareeb log aisay hain. yah is liyay ahemaqaana harkaten kar rahay hain ki rabb kee raah aur apnay khuda kee shareeat say vaaqif naheen hain. ⁵aao, main buzurgon kay paas ja kar un say baat karta hoon. vah to zaroor rabb kee raah aur allaah kee shareeat ko jaantay hongay.” lekin afsos, sab kay sab nay apnay jooay aur rassay tod daalay hain.

⁶is liyay sherbabar jangal say nikal kar un par hamla karega, bhediya biyaabaan say a kar unhen barbaad karega, cheeta un kay shaheron kay qareeb taak men baith kar har nikalnay vaalay ko phaad daalega. kyoonki vah baar baar sarkash huay hain, mut’addid dafa unhon nay apnee bevafaaee ka izhaar kiya hai.

⁷“main tujhay kaisay muaaf karoon? teree aulaad nay mujhay tark karkay un kee qasam khaaee hai jo khuda naheen hain. go main nay un kee har zaroorat pooree kee to bhee unhon nay zina kiya, chaklay kay saamnay un kee lambee qataaren lagee raheen. ⁸yah log motay-taazay ghoday hain jo mastee men a gaay hain. har ek hinahinaata hua apnay padosee kee beevee ko aankh maarta hai.” ⁹rabb farmaata hai, “kya main javaab men unhen saza na doon? kya main aisee qaum say intiqaam na loon? ¹⁰jaao, us kay angoor kay baaghon par toot pado aur sab kuchh barbaad kar do. lekin unhen mukammal taur par khatm mat karna. belon kee shaakhon ko door karo, kyoonki vah rabb kay log naheen hain.”

rabb apnee qaum say javaab talab karegaa

¹¹kyoonki rabb farmaata hai, “israaeel aur yahoodaah kay baashinday har tarah say mujh say bevafa rahay hain. ¹²unhon nay rabb ka inkaar karkay kaha hai, vah kuchh naheen karega. ham par museebat naheen aaegee. hamen na talvaar, na kaal say nuqsaan pahunchega. ¹³nabiyon kee kya haisiyat hai? vah to bakvaas hee kartay hain, aur rabb ka kalaam un men naheen hai. balki un hee kay saath aisa kiya jaaega.”

¹⁴is liyay rabb lashkaron ka khuda farmaata hai, “ai yaramiyaah, choonki log aisee baaten kar rahay hain is liyay teray munh men meray alfaaz aag ban kar is qaum ko lakdee kee tarah bhasm kar dengay.” ¹⁵rabb farmaata hai, “ai israaeel, main door kee qaum ko teray khilaaf bhejoonga, aisee pukhta aur qadeem qaum jis kee zabaan too naheen jaanta aur jis kee baaten too naheen samajhta. ¹⁶un kay tarkash khulee qabren hain, sab kay sab zabardast soormay hain. ¹⁷vah sab kuchh hadap kar lengay : teree faslen, teree khuraak, teray betay-betiyaan, teree bhed-bakriyaan, teray gaay-bail, teree angoor kee belen aur teray anjeer kay darakht. jin qil’aaband shaheron par tum bharosa rakhtay ho unhen vah talvaar say khaak men mila dengay.

¹⁸phir bhee main us vaqt tumhen mukammal taur par barbaad naheen karoonga.” yah rabb ka farmaan hai. ¹⁹“ai yaramiyaah, agar log tujh say poochhen, rabb hamaaray khuda nay yah sab kuchh hamaaray saath kyoon kiya? to unhen bata, tum mujhay tark karkay apnay vatan men ajnabee maaboodon kee khidmat kartay rahay ho, is liyay tum vatan say door mulk men ajnabiyon kee khidmat karogay.

²⁰israaeel men elaan karo aur yahoodaah ko ittila do ²¹ki ai bevuqoof aur naasamajh qaum, suno! lekin afsos, un kee aankhen to hain lekin vah dekh naheen saktay, un kay kaan to hain lekin vah sun naheen saktay.” ²²rabb farmaata hai, “kya tumhen mera khauf naheen maanna chaahiay, meray huzoor naheen kaampna chaahiay? soch lo! main hee nay ret say samundar kee sarhadd muqarrar kee, ek aisee baad banaaee jis par say vah kabhee naheen guzar sakta. go vah zor say laheren maaray to bhee naakaam raheta hai, go us kee maujen khoob garjen to bhee muqarrara hadd say aagay naheen badh sakteen.

²³lekin afsos, is qaum ka dil ziddee aur sarkash hai. yah log saheeh raah say hat kar apnee hee raahon par chal paday hain. ²⁴vah dil men kabhee naheen kahetay, aao, ham rabb apnay khuda ka khauf maanen. kyoonki vahee hamen vaqt par khizaan aur bahaar kay mausam men baarish muhayya karta hai, vahee is kee zamaanat deta hai ki hamaaree faslen baaqaaidagee say pak jaaen. ²⁵ab tumhaaray ghalat kaamon nay tumhen in nemton say maheroom kar diya, tumhaaray gunaahon nay tumhen in achchhee cheezon say rok rakha hai.

²⁶kyoonki meree qaum men aisay bedeen afraad paaay jaatay hain jo doosron kee taak lagaaay rahetay hain. jis tarah shikaaree parinday pakadnay kay liyay jhuk kar chhup jaata hai, usee tarah vah doosron kee ghaat men baith jaatay hain. vah phanday laga kar logon ko un men phansaatay hain. ²⁷aur jis tarah shikaaree apnay pinjray ko chidiyon say bhar deta hai usee tarah in shareer logon kay ghar fareb say bharay rahetay hain. apnee chaalon say vah ameer, taaqatvar ²⁸aur motay-taazay ho gaay hain. un kay ghalat kaamon kee hadd naheen rahetee. vah insaaf kartay hee naheen. na vah yateemon kee madad kartay hain taaki unhen vah kuchh mil jaaay jo un ka haq hai, na ghareebon kay huqooq qaaim rakhtay hain.” ²⁹rabb farmaata hai, “ab mujhay bataao, kya mujhay unhen is kee saza naheen denee chaahiay? kya mujhay is qism kee harkaten karnay vaalee qaum say badla naheen lena chaahiay?

³⁰jo kuchh mulk men hua hai vah haulnaak aur qaabil-ay-ghin hai. ³¹kyoonki nabee jhootee peshgoiyaan sunaatay aur imaam apnee hee marzee say hukoomat kartay hain. aur meree qaum un ka yah ravayya azeez rakhtee hai. lekin mujhay bataao, jab yah sab kuchh khatm ho jaaega to phir tum kya karoge