Yarmiyaah 49
ammoniyon kee adaalat
1ammoniyon kay baaray men rabb farmaata hai,
“kya israaeel kee koee aulaad naheen, koee vaaris naheen jo jad kay qabaailee ilaaqay men rah sakay? malik devta kay parastaaron nay us par kyoon qabza kiya hai? kya vajah hai ki yah log jad kay shaheron men aabaad ho gaay hain?” 2chunaanchay rabb farmaata hai, “vah vaqt aanay vaala hai ki meray hukm par ammonee daar-ul-hakoomat rabba kay khilaaf jang kay naaray lagaaay jaaengay. tab vah malbay ka dher ban jaaega, aur gird-o-navaah kee aabaadiyaan nazar-ay-aatish ho jaaengee. tab israaeel unhen mulk-ba-dar karega jinhon nay usay mulk-ba-dar kiya tha.” yah rabb ka farmaan hai.
3“ai hasbon, vaavaila kar, kyoonki aee shaher barbaad hua hai. ai rabba kee betiyo, madad kay liyay chillaao! taat odh kar maatam karo! faseel kay andar bechainee say idhar udhar phiro! kyoonki malik devta apnay pujaariyon aur buzurgon samet jilaavatan ho jaaega. 4ai bevafa betee, too apnee zarkhez vaadiyon par itna fakhar kyoon kartee hai? too apnay maal-o-daulat par bharosa karkay shekhee maartee hai ki ab mujh par koee hamla naheen karega.” 5qaadir-ay-mutlaq rabb-ul-afwaaj farmaata hai, “main tamaam padosiyon kee taraf say tujh par dahshat chha jaanay doonga. tum sab ko chaaron taraf muntashir kar diya jaaega, aur teray panaahaguzeenon ko koee jama naheen karega.
6lekin baad men main ammoniyon ko bahaal karoonga.” yah rabb ka farmaan hai.
adom kee adaalat
7rabb-ul-afwaaj adom kay baaray men farmaata hai, “kya temaan men hikmat ka naam-o-nishaan naheen raha? kya daanishmand saheeh mashvra naheen day saktay? kya un kee daanaaee bekaar ho gaee hai?
8ai dadaan kay baashindo, bhaag kar hijrat karo, zameen kay andar chhup jaao. kyoonki main esau kee aulaad par aafat naazil karta hoon, meree saza ka din qareeb a gaya hai. 9ai adom, agar too angoor ka baagh hota aur mazdoor fasal chunnay kay liyay aatay to thoda bahut un kay peechhay rah jaata. agar daakoo raat kay vaqt tujhay loot letay to vah sirf utna hee chheen letay jitna utha kar lay ja saktay hain. lekin tera anjaam is say kaheen ziyaada bura hoga. 10kyoonki main nay esau ko nanga karkay us kee tamaam chhupnay kee jagahen dhoond nikaalee hain. vah kaheen bhee chhup naheen sakega. us kee aulaad, bhaaee aur hamsaay halaak ho jaaengay, ek bhee baaqee naheen rahega. 11apnay yateemon ko peechhay chhod day, kyoonki main un kee jaan ko bachaaay rakhoonga. tumhaaree bevaaen bhee mujh par bharosa rakhen.”
12rabb farmaata hai, “jinhen meray ghazab ka piyaala peenay ka faisla naheen sunaaya gaya tha unhen bhee peena pada. to phir teree jaan kis tarah bachegee? naheen, too yaqeenan saza ka piyaala pee lega.” 13rabb farmaata hai, “meray naam kee qasam, busra shaher gird-o-navaah kay tamaam shaheron samet abdee khandaraat ban jaaega. usay dekh kar logon kay rongtay khaday ho jaaengay, aur vah usay laan-taan karengay. laanat karnay vaala apnay dushman kay liyay busra hee ka sa anjaam chaahega.”
14main nay rabb kee taraf say paighaam suna hai, “ek qaasid ko aqvaam kay paas bheja gaya hai jo unhen hukm day, ‘jama ho kar adom par hamla karnay kay liyay niklo! us say ladnay kay liyay utho!’
15ab main tujhay chhota bana doonga, ek aisee qaum jisay deegar log haqeer jaanengay. 16maazee men doosray tujh say dahshat khaatay thay, lekin is baat nay aur teray gharoor nay tujhay fareb diya hai. beshak too chataanon kee daraadon men basera karta hai, aur pahaadee bulandiyaan teray qabzay men hain. lekin khwaah too apna ghonsla uqaab kee see oonchee jagahon par kyoon na banaaay to bhee main tujhay vahaan say utaar kar khaak men mila doonga.” yah rabb ka farmaan hai.
17“mulk-ay-adom yoon barbaad ho jaaega ki vahaan say guzarnay vaalon kay rongtay khaday ho jaaengay. us kay zakhmon ko dekh kar vah ‘tauba tauba’ kahengay.” 18rabb farmaata hai, “us ka anjaam sadoom, amoora aur un kay padosee shaheron kee maanind hoga jinhen allaah nay ulta kar nest-o-naabood kar diya. vahaan koee naheen basega. 19jis tarah sherbabar yardan kay jangal say nikal kar shaadaab charaagaahon men charnay vaalee bhed-bakriyon par toot padta hai usee tarah main achaanak adom par hamla karkay usay us kay apnay mulk say bhaga doonga. tab vah jisay main nay muqarrar kiya hai adom par hukoomat karega. kyoonki kaun meree maanind hai? kaun mujh say javaab talab kar sakta hai? kaun sa gallaabaan mera muqaabla kar sakta hai?”
20chunaanchay adom par rabb ka faisla suno! temaan kay baashindon kay liyay us kay mansoobay par dhyaan do! dushman pooray revad ko sab say nanhay bachchon say lay kar badon tak ghaseet kar lay jaaega. us kee charaagaah veeraan-o-sunsaan ho jaaegee. 21adom itnay dhadaam say gir jaaega ki zameen tharathra uthegee. logon kee cheekhen baher-ay-qulzum tak sunaaee dengee. 22vah dekho! dushman uqaab kee tarah ud kar adom par jhapatta maarta hai. vah apnay paron ko phaila kar busra par saaya daalta hai. us din adomee soormaaon ka dil dard-ay-zah men mubtala aurat kee tarah pech-o-taab khaaega.
damishq kee adaalat
23rabb damishq kay baaray men farmaata hai, “hamaat aur arfaad sharminda ho gaay hain. buree khabren sun kar vah himmat haar gaay hain. pareshaanee nay unhen us mutlaatim samundar jaisa bechain kar diya hai jo tham naheen sakta. 24damishq himmat haar kar bhaagnay kay liyay mud gaya hai. dahshat us par chha gaee hai, aur vah dard-ay-zah men mubtala aurat kee tarah tadap raha hai.
25haay, damishq ko tark kiya gaya hai! jis mashhoor shaher say mera dil lutf’andoz hota tha vah veeraan-o-sunsaan hai.” 26rabb-ul-afwaaj farmaata hai, “us din us kay javaan aadmee galiyon men gir kar rah jaaengay, us kay tamaam faujee halaak ho jaaengay. 27main damishq kee faseel ko aag laga doonga jo phailtay phailtay bin-hadad baadshaah kay mahelon ko bhee apnee lapet men lay legee.”
badoo qabeelon kee adaalat
28zail men qeedaar aur hasoor kay badoo qabeelon kay baaray men kalaam darj hai. baad men shaah-ay-baabal nabookadnazzar nay unhen shikast dee. rabb farmaata hai,
“utho! qeedaar par hamla karo! mashriq men basnay vaalay badoo qabeelon ko tabaah karo! 29tum un kay khaimon, bhed-bakriyon aur oonton ko chheen logay, un kay khaimon kay pardon aur baaqee saamaan ko loot logay. cheekhen sunaaee dengee, ‘haay, chaaron taraf dahshat hee dahshat’!”
30rabb farmaata hai, “ai hasoor men basnay vaalay qabeelo, jaldee say bhaag jaao, zameen kee daraadon men chhup jaao! kyoonki shaah-ay-baabal nay tum par hamla karnay ka faisla karkay tumhaaray khilaaf mansooba baandh liya hai.” 31rabb farmaata hai, “ai baabal kay faujiyo, uth kar us qaum par hamla karo jo alaahidagee men pursukoon aur mahfooz zindagee guzaartee hai, jis kay na darvaazay, na kunday hain. 32un kay oont aur baday baday revad loot ka maal ban jaaengay. kyoonki main registaan kay kinaaray par rahenay vaalay in qabeelon ko chaaron taraf muntashir kar doonga. un par chaaron taraf say aafat aaegee.” yah rabb ka farmaan hai. 33“hasoor hamesha tak veeraan-o-sunsaan rahega, us men koee naheen basega. geedad hee us men apnay ghar bana lengay.”
mulk-ay-ailaam kee adaalat
34shaah-ay-yahoodaah sidaqiyaah kee hukoomat kay ibatidaaee dinon men rabb yaramiyaah nabee say hamkalaam hua. paighaam ailaam kay mutaalliq tha.
35“rabb-ul-afwaaj farmaata hai, ‘main ailaam kee kamaan ko tod daalta hoon, us hathiyaar ko jis par ailaam kee taaqat mabnee hai. 36aasmaan kee chaaron simton say main ailaamiyon kay khilaaf tez havaaen chalaaoonga jo unhen uda kar chaaron taraf muntashir kar dengee. koee aisa mulk naheen hoga jis tak ailaamee jilaavatan naheen pahunchengay.’ 37rabb farmaata hai, ‘main ailaam ko us kay jaanee dushmanon kay saamnay paash paash kar doonga. main un par aafat laaoonga, mera sakht qaher un par naazil hoga. jab tak vah nest na hon main talvaar ko un kay peechhay chalaata rahoonga. 38tab main ailaam men apna takht khada karkay us kay baadshaah aur buzurgon ko tabaah kar doonga.’ yah rabb ka farmaan hai.
39lekin rabb yah bhee farmaata hai, ‘aanay vaalay dinon men main ailaam ko bahaal karoonga’.”