Yarmiyaah 48

moaab kay anjaam kee peshgoee

¹moaab kay baaray men rabb-ul-afwaaj jo israaeel ka khuda hai farmaata hai,

“naboo shaher par afsos, kyoonki vah tabaah ho gaya hai. dushman nay qiryataaim kee behuramtee karkay us par qabza kar liya hai. chataan kay qilaay kee rusvaaee ho gaee, vah paash paash ho gaya hai. ²ab say koee moaab kee taareef naheen karega. hasbon men aadmee us kee shikast kee saazishen karkay kah rahay hain, aao, ham moaabee qaum ko nest-o-naabood karen. ‘ai madmeen, too bhee tabaah ho jaaega, talvaar teray bhee peechhay pad jaaegee.’

³suno! horonaaim say cheekhen buland ho rahee hain. tabaahee aur badee shikast ka shor mach raha hai. ⁴moaab choor choor ho gaya hai, us kay bachchay zor say chilla rahay hain. ⁵log rotay rotay looheet kee taraf chadh rahay hain. horonaaim kee taraf utartay raastay par shikast kee aah-o-zaaree sunaaee day rahee hai. ⁶bhaag kar apnee jaan bachaao! registaan men jhaadee kee maanind ban jaao.

⁷choonki tum moaabiyon nay apnee kaamyaabiyon aur daulat par bharosa rakha, is liyay tum bhee qaid men jaaogay. tumhaara devta kamos bhee apnay pujaariyon aur buzurgon samet jilaavatan ho jaaega. ⁸tabaah karnay vaala har shaher par hamla karega, ek bhee naheen bachega. jis tarah rabb nay farmaaya hai, vaadee bhee tabaah ho jaaegee aur maidaan-ay-murtafa bhee. ⁹moaab par namak daal do, kyoonki vah mismaar ho jaaega. us kay shaher veeraan-o-sunsaan ho jaaengay, aur un men koee naheen basega.

¹⁰us par laanat jo sustee say rabb ka kaam karay! us par laanat jo apnee talvaar ko khoon bahaanay say rok lay! ¹¹apnee javaanee say lay kar aaj tak moaab aaraam-o-sukoon kee zindagee guzaarta aaya hai, us mai kee maanind jo kabhee naheen chhedee gaee aur kabhee ek bartan say doosray men undelee naheen gaee. is liyay us ka maza qaaim aur zaaiqa behtareen raha hai.” ¹²lekin rabb farmaata hai, “vah din aanay vaala hai jab main aisay aadmiyon ko us kay paas bhejoonga jo mai ko bartanon say nikaal kar zaaay kar dengay, aur bartanon ko khaalee karnay kay baad paash paash kar dengay. ¹³tab moaab ko apnay devta kamos par yoon sharm aaegee jis tarah israaeel ko bait-el kay us but par sharm aaee jis par vah bharosa rakhta tha.

¹⁴haay, tum apnay aap par kitna fakhar kartay ho ki ham soormay aur zabardast jangjoo hain. ¹⁵lekin duniya ka baadshaah jis ka naam rabb-ul-afwaaj hai farmaata hai ki moaab tabaah ho jaaega, aur dushman us kay shaheron men ghus aaega. us kay behtareen javaan qatl-o-ghaarat kee zad men a kar halaak ho jaaengay.

moaab kee taaqat toot gaee hai

¹⁶moaab ka anjaam qareeb hee hai, aafat us par naazil honay vaalee hai. ¹⁷ai pados men basnay vaalo, us par maatam karo! jitnay us kee shuharat jaantay ho aah-o-zaaree karo. bolo, ‘haay, moaab ka zordaar asa-ay-shaahee toot gaya hai, us kee shaan-o-shaukat kee alaamat khaak men milaaee gaee hai.’

¹⁸ai deebon betee, apnay shaandaar takht par say utar kar piyaasee zameen par baith ja. kyoonki moaab ko tabaah karnay vaala teray khilaaf bhee chadh aaega, vah teray qil’aaband shaheron ko bhee mismaar karega. ¹⁹ai aroeer kee rahenay vaalee, sadak kay kinaaray khadee ho kar guzarnay vaalon par ghaur kar! apnee jaan bachaanay vaalon say poochh lay ki kya hua hai. ²⁰tab tujhay javaab milega, ‘moaab rusva hua hai, vah paash paash ho gaya hai. buland aavaaz say vaavaila karo! darya-ay-arnon kay kinaaray elaan karo ki moaab khatm hai.’

²¹maidaan-ay-murtafa par allaah kee adaalat naazil huee hai. hauloon, yahez, mifaat, ²²deebon, naboo, bait-diblaataaim, ²³qiryataaim, bait-jamool, bait-maoon, ²⁴qariyot aur busra, gharaz moaab kay tamaam shaheron kee adaalat huee hai, khwaah vah door hon ya qareeb.”

²⁵rabb farmaata hai, “moaab kee taaqat toot gaee hai, us ka baazoo paash paash ho gaya hai. ²⁶usay mai pila pila kar matwaala karo, vah apnee qai men lot-pot ho kar sab kay liyay mazaaq ka nishaana ban jaaay. kyoonki vah maghroor ho kar rabb kay khilaaf khada ho gaya hai.

²⁷tum moaabiyon nay israaeel ko apnay mazaaq ka nishaana banaaya tha. tum yoon usay gaaliyaan detay rahay jaisay usay choree kartay vaqt pakda gaya ho. ²⁸lekin ab tumhaaree baaree a gaee hai. apnay shaheron ko chhod kar chataanon men ja baso! kabootar ban kar chataanon kee daraadon men apnay ghonslay banaao.

²⁹ham nay moaab kay takabbur kay baaray men suna hai, kyoonki vah hadd say ziyaada mutakabbir, maghroor, ghamandee, khudpasand aur anaaparast hai.”

³⁰rabb farmaata hai, “main us kay takabbur say vaaqif hoon. lekin us kee deengen abas hain, un kay peechhay kuchh naheen hai. ³¹is liyay main moaab par aah-o-zaaree kar raha, tamaam moaab kay sabab say chilla raha hoon. qeer-haraasat kay baashindon ka anjaam dekh kar main aahen bhar raha hoon. ³²ai sibmaah kee angoor kee bel, yaazer kee nisbat main kaheen ziyaada tujh par maatam kar raha hoon. teree komplen yaazer tak phailee huee theen balki samundar ko paar bhee kartee theen. lekin ab tabaah karnay vaala dushman teray pakay huay angooron aur mausam-ay-garma kay phal par toot pada hai. ³³ab khushee-o-shaadmaanee moaab kay baaghon aur kheton say jaatee rahee hai. main nay angoor ka ras nikaalnay ka kaam rok diya hai. koee khushee kay naaray laga laga kar angoor ko paaon talay naheen raundta. shor to mach raha hai, lekin khushee kay naaray buland naheen ho rahay balki jang kay.

³⁴hasbon men log madad kay liyay pukaar rahay hain, un kee aavaaz ileeaalee aur yahez tak sunaaee day rahee hai. isee tarah zughar kee cheekhen horonaaim aur ijlat-shaleeshiyaah tak pahunch gaee hain. kyoonki nimreem ka paanee bhee khushk ho jaaega.” ³⁵rabb farmaata hai, “moaab men jo oonchee jagahon par chadh kar apnay devtaaon ko bakhoor aur baaqee qurbaaniyaan pesh kartay hain un ka main khaatma kar doonga.

³⁶is liyay mera dil baansree kay maatmee sur nikaal kar moaab aur qeer-haraasat kay liyay noha kar raha hai. kyoonki un kee haasilashuda daulat jaatee rahee hai. ³⁷har sar ganja, har daadhee mundavaaee gaee hai. har haath kee jild ko zakhmee kar diya gaya hai, har kamar taat say mulabbas hai. ³⁸moaab kee tamaam chhaton par aur us kay chaukon men aah-o-zaaree buland ho rahee hai.”

kyoonki rabb farmaata hai, “main nay moaab ko bekaar mittee kay bartan kee tarah tod daala hai. ³⁹haay, moaab paash paash ho gaya hai! log zaar-o-qataar ro rahay hain, aur moaab nay sharm kay maaray apna munh dhaamp liya hai. vah mazaaq ka nishaana ban gaya hai, usay dekh kar tamaam padosiyon kay rongtay khaday ho gaay hain.”

moaab rabb kay khilaaf uth khada hua hai

⁴⁰rabb farmaata hai, “vah dekho! dushman uqaab kee tarah moaab par jhapatta maarta hai. apnay paron ko phaila kar vah pooray mulk par saaya daalta hai. ⁴¹qariyot qilaon samet us kay qabzay men a gaya hai. us din moaabee soormaaon ka dil dard-ay-zah men mubtala aurat kee tarah pech-o-taab khaaega. ⁴²kyoonki moaabee qaum safha-ay-hastee say mit jaaegee, is liyay ki vah maghroor ho kar rabb kay khilaaf khadee ho gaee hai.

⁴³ai moaabee qaum, dahshat, gadha aur phanda teray naseeb men hain.” ⁴⁴kyoonki rabb farmaata hai, “jo dahshat say bhaag kar bach jaaay vah gadhay men gir jaaega, aur jo gadhay say nikal jaaay vah phanday men phans jaaega. kyoonki main moaab par us kee adaalat ka saal laaoonga.

⁴⁵panaahaguzeen thakehaaray hasbon kay saay men ruk jaatay hain. lekin afsos, hasbon say aag nikal aaee hai aur seehon baadshaah kay shaher men say shola bhadak utha hai jo moaab kee peshaanee ko aur shor machaanay vaalon kay chaandon ko nazar-ay-aatish karega. ⁴⁶ai moaab, tujh par afsos! kamos devta kay parastaar nest-o-naabood hain, teray betay-betiyaan qaidee ban kar jilaavatan ho gaay hain.

⁴⁷lekin aanay vaalay dinon men main moaab ko bahaal karoonga.” yah rabb ka farmaan hai.

yahaan moaab par adaalat ka faisla ikhtitaam par pahunch gaya hai.