Yarmiyaah 47
filistiyon ko safha-ay-hastee say mitaaya jaaegaa
1firaaun kay ghazza shaher par hamla karnay say pahelay yaramiyaah nabee par filistiyon kay baaray men rabb ka kalaam naazil hua,
2“rabb farmaata hai ki shimaal say paanee a raha hai jo sailaab ban kar pooray mulk ko gharq kar dega. poora mulk shaheron aur baashindon samet us men doob jaaega. log cheekh uthengay, aur mulk kay tamaam baashinday aah-o-zaaree karengay. 3kyoonki sarpat daudtay huay ghodon kee taapen sunaaee dengee, dushman kay rathon ka shor aur pahiyon kee gadagadaahat un kay kaanon tak pahunchegee. baap khaufzada ho kar yoon saakit ho jaaengay ki vah apnay bachchon kee madad karnay kay liyay peechhay bhee dekh naheen sakengay. 4kyoonki vah din aanay vaala hai jab tamaam filistiyon ko nest-o-naabood kiya jaaega taaki soor aur saida kay aakhiree madad karnay vaalay bhee khatm ho jaaen. kyoonki rabb filistiyon ko safha-ay-hastee say mitaanay vaala hai, jazeera-ay-kretay kay un bachay huon ko jo yahaan a kar aabaad huay hain.
5ghazza betee maatam kay aalam men apna sar mundavaaegee, asqaloon shaher mismaar ho jaaega. ai maidaanee ilaaqay kay bachay huay logo, tum kab tak apnee jild ko zakhmee kartay rahogay? 6‘haay, ai rabb kee talvaar, kya too kabhee naheen aaraam karegee? dubaara apnay miyaan men chhup ja! khaamosh ho kar aaraam kar!’ 7lekin vah kis tarah aaraam kar saktee hai jab rabb nay khud usay chalaaya hai, jab usee nay usay asqaloon aur saahilee ilaaqay par dhaava bolnay ka hukm diya hai?”