Yarmiyaah 46

misr kee shikast kee peshgoee

¹yaramiyaah par mukhtalif qaumon kay baaray men bhee paighaamaat naazil huay. yah zail men darj hain.

²pahela paighaam misr kay baaray men hai. yahoodaah kay baadshaah yahooyaqeem bin yoosiyaah kay chauthay saal men shaah-ay-baabal nabookadnazzar nay darya-ay-furaat par vaaqay shaher karkimees kay paas misree fauj ko shikast dee thee. un dinon men misree baadshaah nikoh firaaun kee fauj kay baaray men rabb ka kalaam naazil hua,

³“apnee badee aur chhotee dhaalen tayyaar karkay jang kay liyay niklo! ⁴ghodon ko rathon men jooto! deegar ghodon par savaar ho jaao! khod pahen kar khaday ho jaao! apnay nezon ko raughan say chamka kar ziraabaktar pahen lo! ⁵lekin mujhay kya nazar a raha hai? misree faujiyon par dahshat taaree huee hai. vah peechhay hat rahay hain, un kay soormaaon nay hathiyaar daal diay hain. vah bhaag bhaag kar faraar ho rahay hain aur peechhay bhee naheen dekhtay. rabb farmaata hai ki chaaron taraf dahshat hee dahshat phail gaee hai. ⁶kisee ko bhee bachnay na do, khwaah vah kitnee tezee say kyoon na bhaag raha ho ya kitna zabardast faujee kyoon na ho. shimaal men darya-ay-furaat kay kinaaray hee vah thokar kha kar gir gaay hain.

⁷yah kya hai jo darya-ay-neel kee tarah chadh raha hai, jo sailaab ban kar sab kuchh gharq kar raha hai? ⁸misr darya-ay-neel kee tarah chadh raha hai, vahee sailaab ban kar sab kuchh gharq kar raha hai. vah kaheta hai, ‘main chadh kar pooree zameen ko gharq kar doonga. main shaheron ko un kay baashindon samet tabaah karoonga.’ ⁹ai ghodo, dushman par toot pado! ai ratho, deevaanon kee tarah daudo! ai faujiyo, ladnay kay liyay niklo! ai ethopiya aur libiya kay sipaahiyo, apnee dhaalen pakad kar chalo, ai ludiya kay teer chalaanay vaalo, apnay kamaan taan kar aagay badho!

¹⁰lekin aaj qaadir-ay-mutlaq, rabb-ul-afwaaj ka hee din hai. intiqaam kay is din vah apnay dushmanon say badla lega. us kee talvaar unhen kha kha kar ser ho jaaegee, aur un ka khoon pee pee kar us kee piyaas bujhegee. kyoonki shimaal men darya-ay-furaat kay kinaaray unhen qaadir-ay-mutlaq, rabb-ul-afwaaj ko qurbaan kiya jaaega.

¹¹ai kunvaaree misr betee, mulk-ay-jiliaad men ja kar apnay zakhmon kay liyay balsaan khareed lay. lekin kya faaida? khwaah too kitnee davaaee kyoon na istemaal karay teree choten bhar hee naheen sakteen! ¹²teree sharmindagee kee khabar deegar aqvaam men phail gaee hai, teree cheekhen pooree duniya men goonj rahee hain. kyoonki teray soormay ek doosray say thokar kha kar gir gaay hain.”

shaah-ay-baabal kay misr men ghus aanay kee peshgoee

¹³jab shaah-ay-baabal nabookadnazzar misr par hamla karnay aaya to rabb is kay baaray men yaramiyaah say hamkalaam hua,

¹⁴“misree shaheron mijdaal, memfis aur tahfanhees men elaan karo, ‘jang kee tayyaariyaan karkay ladnay kay liyay khaday ho jaao! kyoonki talvaar tumhaaray aas-paas sab kuchh kha rahee hai.’

¹⁵ai misr, teray soormaaon ko khaak men kyoon milaaya gaya hai? vah khaday naheen rah saktay, kyoonki rabb nay unhen daba diya hai. ¹⁶us nay mut’addid afraad ko thokar khaanay diya, aur vah ek doosray par gir gaay. unhon nay kaha, ‘aao, ham apnee hee qaum aur apnay vatan men vaapas chalay jaaen jahaan zaalim kee talvaar ham tak naheen pahunch saktee.’ ¹⁷vahaan vah pukaar uthay, ‘misr ka baadshaah shor to bahut machaata hai lekin is kay peechhay kuchh bhee naheen. jo sunahera mauqa usay mila vah jaata raha hai’.”

¹⁸duniya ka baadshaah jis ka naam rabb-ul-afwaaj hai farmaata hai, “meree hayaat kee qasam, jo tum par hamla karnay a raha hai vah doosron say utna bada hai jitna taboor deegar pahaadon say aur karmil samundar say ooncha hai. ¹⁹ai misr kay baashindo, apna maal-o-asbaab baandh kar jilaavatan honay kee tayyaariyaan karo. kyoonki memfis mismaar ho kar nazar-ay-aatish ho jaaega. us men koee naheen rahega.

²⁰misr khoobsoorat see javaan gaay hai, lekin shimaal say muhalak makkhee a kar us par dhaava bol rahee hai. haan, vah a rahee hai. ²¹misree fauj kay bhaaday kay faujee motay-taazay bachhday hain, lekin vah bhee mud kar faraar ho jaaengay. ek bhee qaaim naheen rahega. kyoonki aafat ka din un par aanay vaala hai, vah vaqt jab unhen pooree saza milegee. ²²misr saamp kee tarah phunkaaratay huay peechhay hat jaaega jab dushman kay faujee pooray zor say us par hamla karengay, jab vah lakkadahaaron kee tarah apnee kulhaadiyaan pakday huay us par toot padengay.” ²³rabb farmaata hai, “tab vah misr ka jangal kaat daalengay, go vah kitna ghana kyoon na ho. kyoonki un kee taadaad tiddiyon say ziyaada hogee balki vah anaginat hongay. ²⁴misr betee kee beizzatee kee jaaegee, usay shimaalee qaum kay havaalay kiya jaaega.”

²⁵rabb-ul-afwaaj jo israaeel ka khuda hai farmaata hai, “main theebas shaher kay devta aamoon, firaaun aur tamaam misr ko us kay devtaaon aur baadshaahon samet saza doonga. haan, main firaaun aur us par etimaad rakhnay vaalay tamaam logon kee adaalat karoonga.” ²⁶rabb farmaata hai, “main unhen un kay jaanee dushmanon kay havaalay kar doonga, aur vah shaah-ay-baabal nabookadnazzar aur us kay afsaron kay qaaboo men a jaaengay. lekin baad men misr pahelay kee tarah dubaara aabaad ho jaaega.

²⁷jahaan tak tera taalluq hai, ai yaaqoob meray khaadim, khauf mat kha! ai israaeel, hausla mat haar! dekh, main tujhay doordaraaz mulk say chhutkaara doonga. teree aulaad ko main us mulk say najaat doonga jahaan usay jilaavatan kiya gaya hai. phir yaaqoob vaapas a kar aaraam-o-sukoon kee zindagee guzaarega. koee naheen hoga jo usay haibatzada karay.” ²⁸rabb farmaata hai, “ai yaaqoob meray khaadim, khauf na kha, kyoonki main teray saath hoon. main un tamaam qaumon ko nest-o-naabood kar doonga jin men main nay tujhay muntashir kar diya hai, lekin tujhay main is tarah safha-ay-hastee say naheen mitaaoonga. alabatta main munaasib hadd tak teree tambeeh karoonga, kyoonki main tujhay saza diay baghair naheen chhod sakta.”