Yarmiyaah 45
baarook kay liyay tasallee ka paighaam
1yahoodaah kay baadshaah yahooyaqeem bin yoosiyaah kee hukoomat kay chauthay saal men yaramiyaah nabee ko baarook bin nairiyaah kay liyay rabb ka paighaam mila. us vaqt yaramiyaah baarook say vah tamaam baaten likhva raha tha jo us par naazil huee theen. yaramiyaah nay kaha, 2“ai baarook, rabb israaeel ka khuda teray baaray men farmaata hai 3ki too kaheta hai, ‘haay, mujh par afsos! rabb nay meray dard men izaafa kar diya hai, ab mujhay ranj-o-alam bhee sahena padta hai. main karaahatay karaahatay thak gaya hoon. kaheen bhee aaraam-o-sukoon naheen milta.’
4ai baarook, rabb javaab men farmaata hai ki jo kuchh main nay khud taameer kiya usay main gira doonga, jo pauda main nay khud lagaaya usay jad say ukhaad doonga. pooray mulk kay saath aisa hee sulook karoonga. 5to phir too apnay liyay kyoon badee kaamyaabee haasil karnay ka aarzoomand hai? aisa khayaal chhod day, kyoonki main tamaam insaanon par aafat la raha hoon. yah rabb ka farmaan hai. lekin jahaan bhee too jaaay vahaan main honay doonga ki teree jaan chhoot jaae [a] lafzee tarjuma : main tujhay teree jaan ghaneemat kay taur par bakhsh doonga. .”