Yarmiyaah 44

tum butparastee say baaz kyoon naheen aatay?

¹rabb ka kalaam ek baar phir yaramiyaah par naazil hua. us men vah un tamaam hamvatanon say hamkalaam hua jo shimaalee misr kay shaheron mijdaal, tahfanhees aur memfis aur junoobee misr banaam patroos men rahetay thay.

²“rabb-ul-afwaaj jo israaeel ka khuda hai farmaata hai, ‘tum nay khud vah badee aafat dekhee jo main yarooshalam aur yahoodaah kay deegar tamaam shaheron par laaya. aaj vah veeraan-o-sunsaan hain, aur un men koee naheen basta. ³yoon unhen un kee buree harkaton ka ajr mila. kyoonki ajnabee maaboodon kay liyay bakhoor jala kar un kee khidmat karnay say unhon nay mujhay taish dilaaya. aur yah aisay devta thay jin say pahelay na vah, na tum aur na tumhaaray baapdaada vaaqif thay. ⁴baar baar main nabiyon ko un kay paas bhejta raha, aur baar baar meray khaadim kahetay rahay ki aisee ghinaunee harkaten mat karna, kyoonki mujhay in say nafrat hai! ⁵lekin unhon nay na sunee, na dhyaan diya. na vah apnee bedeenee say baaz aaay, na ajnabee maaboodon ko bakhoor jalaanay ka silsila band kiya.

⁶tab mera shadeed ghazab un par naazil hua. meray qaher kee zabardast aag nay yahoodaah kay shaheron aur yarooshalam kee galiyon men phailtay phailtay unhen veeraan-o-sunsaan kar diya. aaj tak un ka yahee haal hai.’

⁷ab rabb-ul-afwaaj jo israaeel ka khuda hai farmaata hai, ‘tum apna satyaanaas kyoon kar rahay ho? aisay qadam uthaanay say tum yahoodaah say aaay huay mardon aur aurton ko bachchon aur sheerakhwaaron samet halaakat kee taraf la rahay ho. is soorat men ek bhee naheen bachega. ⁸mujhay apnay haathon kay kaam say taish kyoon dilaatay ho? yahaan misr men panaah lay kar tum ajnabee maaboodon kay liyay bakhoor kyoon jalaatay ho? is say tum apnay aap ko nest-o-naabood kar rahay ho, tum duniya kee tamaam qaumon kay liyay laanat aur mazaaq ka nishaana banogay. ⁹kya tum apnee qaum kay sangeen gunaahon ko bhool gaay ho? kya tumhen vah kuchh yaad naheen jo tumhaaray baapdaada, yahoodaah kay raajay raaniyon aur tum say tumhaaree beeviyon samet mulk-ay-yahoodaah aur yarooshalam kee galiyon men sarzad hua hai? ¹⁰aaj tak tum nay na inkisaaree ka izhaar kiya, na mera khauf maana, aur na meree shareeat kay mutaabiq zindagee guzaaree. tum un hidaayaat kay taabay na rahay jo main nay tumhen aur tumhaaray baapdaada ko ata kee theen.’

¹¹chunaanchay rabb-ul-afwaaj jo israaeel ka khuda hai farmaata hai, ‘main tum par aafat laanay ka atal iraada rakhta hoon. tamaam yahoodaah khatm ho jaaega. ¹²main yahoodaah kay us bachay huay hissay ko safha-ay-hastee say mita doonga jo misr men ja kar panaah lenay par tula hua tha. sab misr men halaak ho jaaengay, khwaah talvaar say, khwaah kaal say. chhotay say lay kar baday tak sab kay sab talvaar ya kaal kee zad men a kar mar jaaengay. unhen dekh kar logon kay rongtay khaday ho jaaengay, aur vah doosron kee laan-taan aur hiqaarat ka nishaana banengay. laanat karnay vaala apnay dushmanon kay liyay un hee ka sa anjaam chaahega. ¹³jis tarah main nay yarooshalam ko saza dee ain usee tarah main misr men aanay vaalay hamvatanon ko talvaar, kaal aur muhalak beemaariyon say saza doonga. ¹⁴yahoodaah kay jitnay bachay huay log yahaan misr men panaah lenay kay liyay aaay hain vah sab yaheen halaak ho jaaengay. koee bhee bach kar mulk-ay-yahoodaah men naheen lautega, go tum sab vahaan dubaara aabaad honay kee shadeed aarzoo rakhtay ho. sirf chand ek is men kaamyaab ho jaaengay’.”

aasmaanee malika kee pooja par zid

¹⁵us vaqt shimaalee aur junoobee misr men rahenay vaalay yahoodaah kay tamaam mard aur aurten ek baday ijtima kay liyay jama huay thay. mardon ko khoob maaloom tha ki hamaaree beeviyaan ajnabee maaboodon ko bakhoor kee qurbaaniyaan pesh kartee hain. ab unhon nay yaramiyaah say kaha, ¹⁶“jo baat aap nay rabb ka naam lay kar ham say kee hai vah ham naheen maantay. ¹⁷ham un tamaam baaton par zaroor amal karengay jo ham nay kahee hain. ham aasmaanee malika devee kay liyay bakhoor jalaaengay aur usay mai kee nazren pesh karengay. ham vahee kuchh karengay jo ham, hamaaray baapdaada, hamaaray baadshaah aur hamaaray buzurg mulk-ay-yahoodaah aur yarooshalam kee galiyon men kiya kartay thay. kyoonki us vaqt rotee kee kasrat thee aur hamaara achchha haal tha. us vaqt ham kisee bhee museebat say dochaar na huay. ¹⁸lekin jab say ham aasmaanee malika ko bakhoor aur mai kee nazren pesh karnay say baaz aaay hain us vaqt say har lihaaz say haajatmand rahay hain. usee vaqt say ham talvaar aur kaal kee zad men a kar nest ho rahay hain.” ¹⁹aurton nay baat jaaree rakh kar kaha, “kya aap samajhtay hain ki hamaaray shauharon ko is ka ilm naheen tha ki ham aasmaanee malika ko bakhoor aur mai kee nazren pesh kartee hain, ki ham us kee shakl kee tikkiyaan bana kar us kee pooja kartee hain?”

chand ek kay bachnay kee peshgoee

²⁰yaramiyaah etiraaz karnay vaalay tamaam mardon aur aurton say dubaara mukhaatib hua, ²¹“dekho, rabb nay us bakhoor par dhyaan diya jo tum aur tumhaaray baapdaada nay baadshaahon, buzurgon aur avaam samet yahoodaah kay shaheron aur yarooshalam kee galiyon men jalaaya hai. yah baat usay khoob yaad hai. ²²aakhirkaar ek vaqt aaya jab tumhaaree shareer aur ghinaunee harkaten qaabil-ay-bardaasht na raheen, aur rabb ko tumhen saza denee padee. yahee vajah hai ki aaj tumhaara mulk veeraan-o-sunsaan hai, ki usay dekh kar logon kay rongtay khaday ho jaatay hain. laanat karnay vaala apnay dushman kay liyay aisa hee anjaam chaahata hai. ²³aafat isee liyay tum par aaee ki tum nay buton kay liyay bakhoor jala kar rabb kee na sunee. na tum nay us kee shareeat kay mutaabiq zindagee guzaaree, na us kee hidaayaat aur ahkaam par amal kiya. aaj tak mulk ka yahee haal raha hai.”

²⁴phir yaramiyaah nay tamaam logon say aurton samet kaha, “ai misr men rahenay vaalay yahoodaah kay tamaam hamvatno, rabb ka kalaam suno! ²⁵rabb-ul-afwaaj jo israaeel ka khuda hai farmaata hai ki tum aur tumhaaree beeviyon nay israar kiya hai, ‘ham zaroor apnee un mannaton ko poora karengay jo ham nay maanee hain, ham zaroor aasmaanee malika ko bakhoor aur mai kee nazren pesh karengay.’ aur tum nay apnay alfaaz aur apnee harkaton say saabit kar diya hai ki tum sanjeedgee say apnay is elaan par amal karna chaahatay ho. to theek hai, apna vaada aur apnee mannaten pooree karo!

²⁶lekin ai misr men rahenay vaalay tamaam hamvatno, rabb kay kalaam par dhyaan do! rabb farmaata hai ki meray azeem naam kee qasam, aainda misr men tum men say koee mera naam lay kar qasam naheen khaaega, koee naheen kahega, ‘rabb qaadir-ay-mutlaq kee hayaat kee qasam!’ ²⁷kyoonki main tumhaaree nigraanee kar raha hoon, lekin tum par meharbaanee karnay kay liyay naheen balki tumhen nuqsaan pahunchaanay kay liyay. misr men rahenay vaalay yahoodaah kay tamaam log talvaar aur kaal kee zad men a jaaengay aur pistay pistay halaak ho jaaengay. ²⁸sirf chand ek dushman kee talvaar say bach kar mulk-ay-yahoodaah vaapas aaengay. tab yahoodaah kay jitnay bachay huay log misr men panaah lenay kay liyay aaay hain vah sab jaan lengay ki kis kee baat durust niklee hai, meree ya un kee. ²⁹rabb farmaata hai ki main tumhen nishaan bhee deta hoon taaki tumhen yaqeen ho jaaay ki main tumhaaray khilaaf khaalee baaten naheen kar raha balki tumhen yaqeenan misr men saza doonga. ³⁰nishaan yah hoga ki jis tarah main nay yahoodaah kay baadshaah sidaqiyaah ko us kay jaanee dushman nabookadnazzar kay havaalay kar diya usee tarah main hufra firaaun ko bhee us kay jaanee dushmanon kay havaalay kar doonga. yah rabb ka farmaan hai.”