Yarmiyaah 43

yaramiyaah kee aagaahee ko nazar’andaaz kiya jaata hai

¹yaramiyaah khaamosh hua. jo kuchh bhee rabb un kay khuda nay yaramiyaah ko unhen sunaanay ko kaha tha usay us nay un sab tak pahunchaaya tha. ²phir azariyaah bin hoosaayaah, yoohanaan bin akheeqaam aur tamaam badatmeez aadmee bol uthay, “tum jhoot bol rahay ho! rabb hamaaray khuda nay tumhen yah sunaanay ko naheen bheja ki misr ko na jaao, na vahaan aabaad ho jaao. ³is kay peechhay baarook bin nairiyaah ka haath hai. vahee tumhen hamaaray khilaaf uksa raha hai, kyoonki vah chaahata hai ki ham baabliyon kay haath men a jaaen taaki vah hamen qatl karen ya jilaavatan karkay mulk-ay-baabal lay jaaen.”

⁴aisee baaten kartay kartay yoohanaan bin qareeh, deegar faujee afsaron aur baaqee tamaam logon nay rabb ka hukm radd kiya. vah mulk-ay-yahoodaah men na rahe ⁵balki sab yoohanaan aur baaqee tamaam faujee afsaron kee raahanumaaee men misr chalay gaay. un men yahoodaah kay vah bachay huay sab log shaamil thay jo pahelay mukhtalif mamaalik men muntashir huay thay, lekin ab yahoodaah men dubaara aabaad honay kay liyay vaapas aaay thay. ⁶vah tamaam mard, aurten aur bachchay baadshaah kee betiyon samet bhee un men shaamil thay jinhen shaahee muhaafizon kay sardaar naboozaraadaan nay jidaliyaah bin akheeqaam kay sapurd kiya tha. yaramiyaah nabee aur baarook bin nairiyaah ko bhee saath jaana pada. ⁷yoon vah rabb kee hidaayat radd karkay ravaana huay aur chaltay chaltay misree sarhadd kay shaher tahfanhees tak pahunchay.

shaah-ay-baabal kay misr men ghus aanay kee peshgoee

⁸tahfanhees men rabb ka kalaam yaramiyaah par naazil hua, ⁹“apnay hamvatanon kee maujoodgee men chand ek baday patthar firaaun kay mahel kay darvaazay kay qareeb lay ja kar farsh kee kachchee eenton kay neechay daba day. ¹⁰phir unhen bata day, ‘rab-ul-afwaaj jo israaeel ka khuda hai farmaata hai ki main apnay khaadim shaah-ay-baabal nabookadnazzar ko bula kar yahaan laaoonga aur us ka takht un pattharon kay oopar khada karoonga jo main nay yaramiyaah kay zareeay dabaaay hain. nabookadnazzar un hee kay oopar apna shaahee tamboo lagaaega. ¹¹kyoonki vah aaega aur misr par hamla karkay har ek kay saath vah kuchh karega jo us kay naseeb men hai. ek mar jaaega, doosra qaid men jaaega aur teesra talvaar kee zad men aaega. ^12-13 nabookadnazzar misree devtaaon kay mandiron ko jala kar raakh kar dega aur un kay buton par qabza karkay unhen apnay saath lay jaaega. jis tarah charvaaha apnay kapday say jooen nikaal nikaal kar usay saaf kar leta hai usee tarah shaah-ay-baabal misr ko maal-o-mata say saaf karega. misr aatay vaqt vah sooraj devta kay mandir men ja kar us kay satoonon ko dha dega aur baaqee misree devtaaon kay mandir bhee nazar-ay-aatish karega. phir shaah-ay-baabal saheeh-salaamat vahaan say vaapas chala jaaega’.”