Yarmiyaah 42

yaramiyaah misr na jaanay ka mashvra deta hai

¹yoohanaan bin qareeh, yazaniyaah bin hoosaayaah aur deegar faujee afsar baaqee tamaam logon kay saath chhotay say lay kar baday tak ²yaramiyaah nabee kay paas aaay aur kahenay lagay, “hamaaree minnat qabool karen aur rabb apnay khuda say hamaaray liyay dua karen. aap khud dekh saktay hain ki go ham pahelay mut’addid log thay, lekin ab thoday hee rah gaay hain. ³dua karen ki rabb aap ka khuda hamen dikhaaay ki ham kahaan jaaen aur kya kuchh karen.”

⁴yaramiyaah nay javaab diya, “theek hai, main dua men zaroor rabb aap kay khuda ko aap kee guzaarish pesh karoonga. aur jo bhee javaab rabb day vah main lafz-ba-lafz aap ko bata doonga. main aap ko kisee bhee baat say maheroom naheen rakhoonga.” ⁵unhon nay kaha, “rabb hamaara vafaadaar aur qaabil-ay-etimaad gavaah hai. agar ham har baat par amal na karen jo rabb aap ka khuda aap kee maarifat ham par naazil karega to vahee hamaaray khilaaf gavaahee day. ⁶khwaah us kee hidaayat hamen achchhee lagay ya buree, ham rabb apnay khuda kee sunengay. kyoonki ham jaantay hain ki jab ham rabb apnay khuda kee sunen tab hee hamaaree salaamatee hogee. isee liyay ham aap ko us kay paas bhej rahay hain.”

⁷das din guzarnay kay baad rabb ka kalaam yaramiyaah par naazil hua. ⁸us nay yoohanaan, us kay saathee afsaron aur baaqee tamaam logon ko chhotay say lay kar baday tak apnay paas bula kar ⁹kaha, “aap nay mujhay rabb israaeel kay khuda kay paas bheja taaki main aap kee guzaarish us kay saamnay laaoon. ab us ka farmaan sunen! ¹⁰‘agar tum is mulk men raho to main tumhen naheen giraaoonga balki taameer karoonga, tumhen jad say naheen ukhaadoonga balki paneeree kee tarah laga doonga. kyoonki mujhay us museebat par afsos hai jis men main nay tumhen mubtala kiya hai. ¹¹is vaqt tum shaah-ay-baabal say dartay ho, lekin us say khauf mat khaana!’ rabb farmaata hai, ‘us say dahshat na khaao, kyoonki main tumhaaray saath hoon aur tumhaaree madad karkay us kay haath say chhutkaara doonga. ¹²main tum par rahem karoonga, is liyay vah bhee tum par rahem karkay tumhen tumhaaray mulk men vaapas aanay dega.

¹³lekin agar tum rabb apnay khuda kee sunnay kay liyay tayyaar na ho balki kaho ki ham is mulk men naheen rahenge ¹⁴balki misr jaaengay jahaan na jang dekhengay, na jangee narsingay kee aavaaz sunengay aur na bhookay rahenge ¹⁵to rabb ka javaab suno! ai yahoodaah kay bachay huay logo, rabb israaeel ka khuda farmaata hai ki agar tum misr men ja kar vahaan panaah lenay par tulay huay ho ¹⁶to yaqeen jaano ki jis talvaar aur kaal say tum dartay ho vah vaheen misr men tumhaara peechha karta rahega. vahaan ja kar tum yaqeenan marogay. ¹⁷jitnay bhee misr ja kar vahaan rahenay par tulay huay hon vah sab talvaar, kaal aur muhalak beemaariyon kee zad men a kar mar jaaengay. jis museebat men main unhen daal doonga us say koee naheen bachega.’

¹⁸kyoonki rabb-ul-afwaaj jo israaeel ka khuda hai farmaata hai, ‘pahelay mera sakht ghazab yarooshalam kay baashindon par naazil hua. agar tum misr jaao to mera ghazab tum par bhee naazil hoga. tumhen dekh kar logon kay rongtay khaday ho jaaengay, aur tum un kee laan-taan aur hiqaarat ka nishaana banogay. laanat karnay vaala apnay dushmanon kay liyay tumhaaray jaisa anjaam chaahega. jahaan tak tumhaaray vatan ka taalluq hai, tum usay aainda kabhee naheen dekhogay.’

¹⁹ai yahoodaah kay bachay huay logo, ab rabb aap say hamkalaam hua hai. us ka javaab saaf hai. misr ko mat jaana! yah baat khoob jaan len ki aaj main nay aap ko aagaah kar diya hai. ²⁰aap nay khud apnee jaan ko khatray men daal diya jab aap nay mujhay rabb apnay khuda kay paas bhej kar kaha, ‘rabb hamaaray khuda say hamaaray liyay dua karen. us ka poora javaab hamen sunaaen, kyoonki ham us kee tamaam baaton par amal karengay.’ ²¹aaj main nay yah kiya hai, lekin aap rabb apnay khuda kee sunnay kay liyay tayyaar naheen hain. jo kuchh bhee us nay mujhay aap ko sunaanay ko kaha hai us par aap amal naheen karna chaahatay. ²²chunaanchay ab jaan len ki jahaan aap ja kar panaah lena chaahatay hain vahaan aap talvaar, kaal aur muhalak beemaariyon kee zad men a kar halaak ho jaaengay.”