Yarmiyaah 41
ismaaeel jidaliyaah gavarnar ko qatl karta hai
1ismaaeel bin nataniyaah bin ileesma shaahee nasal ka tha aur pahelay shaah-ay-yahoodaah ka aala afsar tha. saatven maheene [a] sitambar ta aktoobar. men vah das aadmiyon ko apnay saath lay kar misfaah men jidaliyaah say milnay aaya. jab vah mil kar khaana kha rahay the 2to ismaaeel aur us kay das aadmee achaanak uthay aur apnee talvaaron ko khainch kar jidaliyaah ko maar daala. yoon ismaaeel nay us aadmee ko qatl kiya jisay baabal kay baadshaah nay sooba yahoodaah par muqarrar kiya tha. 3us nay misfaah men jidaliyaah kay saath rahenay vaalay tamaam hamvatanon ko bhee qatl kiya aur vahaan thahernay vaalay baabal kay faujiyon ko bhee.
4aglay din jab kisee ko maaloom naheen tha ki jidaliyaah ko qatl kiya gaya hai 5to 80 aadmee vahaan pahunchay jo sikam, saila aur saamriya say a kar rabb kay tabaahashuda ghar men us kee parastish karnay ja rahay thay. un kay paas ghalla aur bakhoor kee qurbaaniyaan theen, aur unhon nay gham kay maaray apnee daadhiyaan mundva kar apnay kapday phaad liyay aur apnee jild ko zakhmee kar diya tha. 6ismaaeel rotay rotay misfaah say nikal kar un say milnay aaya. jab vah un kay paas pahuncha to kahenay laga, “jidaliyaah bin akheeqaam kay paas aao aur dekho ki kya hua hai!”
7joon hee vah shaher men daakhil huay to ismaaeel aur us kay saathiyon nay unhen qatl karkay ek hauz men phaink diya. 8sirf das aadmee bach gaay jab unhon nay ismaaeel say kaha, “hamen mat qatl karna, kyoonki hamaaray paas gandum, jau aur shahed kay zakheeray hain jo ham nay khulay maidaan men kaheen chhupa rakhay hain.” yah sun kar us nay unhen doosron kee tarah na maara balki zinda chhoda.
9jis hauz men ismaaeel nay mazkoora aadmiyon kee laashen phaink deen vah bahut bada tha. yahoodaah kay baadshaah aasa nay usay us vaqt banvaaya tha jab israaeelee baadshaah baasha say jang thee aur vah misfaah ko mazboot bana raha tha. ismaaeel nay isee hauz ko maqtoolon say bhar diya tha. 10misfaah kay baaqee logon ko us nay qaidee bana liya. un men yahoodaah kay baadshaah kee betiyaan aur baaqee vah tamaam log shaamil thay jin par shaahee muhaafizon kay sardaar naboozaraadaan nay jidaliyaah bin akheeqaam ko muqarrar kiya tha. phir ismaaeel un sab ko apnay saath lay kar mulk-ay-ammon kay liyay ravaana hua.
11lekin yoohanaan bin qareeh aur us kay saathee afsaron ko ittila dee gaee ki ismaaeel say kya jurm hua hai. 12tab vah apnay tamaam faujiyon ko jama karkay ismaaeel say ladnay kay liyay niklay aur us ka taaqqub kartay kartay usay jibaoon kay johad kay paas ja liya. 13joon hee ismaaeel kay qaidiyon nay yoohanaan aur us kay afsaron ko dekha to vah khush huay. 14sab nay ismaaeel ko chhod diya aur mud kar yoohanaan kay paas bhaag aaay. 15ismaaeel aath saathiyon samet faraar hua aur yoohanaan kay haath say bach kar mulk-ay-ammon men chala gaya.
16yoon misfaah kay bachay huay tamaam log jibaoon men yoohanaan aur us kay saathee afsaron kay zer-ay-nigraanee aaay. un men vah tamaam faujee, khavaateen, bachchay aur darbaaree shaamil thay jinhen ismaaeel nay jidaliyaah ko qatl karnay kay baad qaidee banaaya tha. 17lekin vah misfaah vaapas na gaay balki aagay chaltay chaltay bait-lahem kay qareeb kay gaaon banaam saraay-kimhaam men ruk gaay. vahaan vah misr kay liyay ravaana honay kee tayyaariyaan karnay lagay, 18kyoonki vah baabal kay intiqaam say dartay thay, is liyay ki jidaliyaah bin akheeqaam ko qatl karnay say ismaaeel bin nataniyaah nay us aadmee ko maut kay ghaat utaara tha jisay shaah-ay-baabal nay yahoodaah ka gavarnar muqarrar kiya tha.