Yarmiyaah 40
yaramiyaah ko aazaad kiya jaata hai
1aazaad honay kay baad bhee rabb ka kalaam yaramiyaah par naazil hua. shaahee muhaafizon kay afsar naboozaraadaan nay usay raama men riha kiya tha. kyoonki jab yarooshalam aur baaqee yahoodaah kay qaidiyon ko mulk-ay-baabal men lay jaanay kay liyay jama kiya gaya to maaloom hua ki yaramiyaah bhee zanjeeron men jakda hua un men shaamil hai. 2tab naboozaraadaan nay yaramiyaah ko bula kar us say kaha, “rabb aap kay khuda nay elaan kiya tha ki is jagah par aafat aaegee. 3aur ab vah yah aafat usee tarah hee laaya jis tarah us nay farmaaya tha. sab kuchh is liyay hua ki aap kee qaum rabb ka gunaah kartee rahee aur us kee na sunee. 4lekin aaj main vah zanjeeren khol deta hoon jin say aap kay haath jakday huay hain. aap aazaad hain. agar chaahen to meray saath baabal jaaen. tab main hee aap kee nigraanee karoonga. baaqee aap kee marzee. agar yaheen rahena pasand karengay to yaheen rahen. pooray mulk men jahaan bhee jaana chaahen jaaen. koee aap ko naheen rokega.”
5yaramiyaah ab tak jhijak raha tha, is liyay naboozaraadaan nay kaha, “phir jidaliyaah bin akheeqaam bin saafan kay paas chalay jaaen! shaah-ay-baabal nay usay sooba yahoodaah kay shaheron par muqarrar kiya hai. us kay saath rahen. ya phir jahaan bhee rahena pasand karen vaheen rahen.”
naboozaraadaan nay yaramiyaah ko kuchh khuraak aur ek tuhfa day kar usay rukhsat kar diya. 6jidaliyaah misfaah men thahera hua tha. yaramiyaah us kay paas ja kar mulk kay bachay huay logon kay beech men basnay laga.
jidaliyaah ko qatl karnay kee saazishen
7deehaat men ab tak yahoodaah kay kuchh faujee afsar apnay daston samet chhupay rahetay thay. jab unhen khabar milee ki shaah-ay-baabal nay jidaliyaah bin akheeqaam ko yahoodaah ka gavarnar bana kar un ghareeb aadmiyon aur baal-bachchon par muqarrar kiya hai jo jilaavatan naheen huay hain 8to vah misfaah men jidaliyaah kay paas aaay. afsaron kay naam ismaaeel bin nataniyaah, qareeh kay betay yoohanaan aur yoontan, siraayaah bin tanhoomat, eephee natoofaatee kay betay aur yaazaniyaah bin maakaatee thay. un kay faujee bhee saath aaay. 9jidaliyaah bin akheeqaam bin saafan nay qasam kha kar un say vaada kiya, “baabal kay taabay ho jaanay say mat darna! mulk men aabaad ho kar shaah-ay-baabal kee khidmat karen to aap kee salaamatee hogee. 10main khud misfaah men thaher kar aap kee sifaarish karoonga jab baabal kay numaainday aaengay. itnay men angoor, mausam-ay-garma ka phal aur zaitoon kee faslen jama karkay apnay bartanon men mahfooz rakhen. un shaheron men aabaad rahen jin par aap nay qabza kar liya hai.”
11yahoodaah kay mut’addid baashinday moaab, ammon, adom aur deegar padosee mamaalik men hijrat kar gaay thay. ab jab unhen ittila milee ki shaah-ay-baabal nay kuchh bachay huay logon ko yahoodaah men chhod kar jidaliyaah bin akheeqaam bin saafan ko gavarnar bana diya hai 12to vah sab yahoodaah men vaapas aaay. jin mamaalik men bhee vah muntashir huay thay vahaan say vah misfaah aaay taaki jidaliyaah say milen. us mausam-ay-garma men vah angoor aur baaqee phal kee badee fasal jama kar sakay.
13ek din yoohanaan bin qareeh aur vah tamaam faujee afsar jo ab tak deehaat men thaheray huay thay jidaliyaah say milnay aaay. 14misfaah men pahunch kar vah jidaliyaah say kahenay lagay, “kya aap ko naheen maaloom ki ammon kay baadshaah baalees nay ismaaeel bin nataniyaah ko aap ko qatl karnay kay liyay bheja hai?” lekin jidaliyaah bin akheeqaam nay un kee baat ka yaqeen na kiya. 15tab yoohanaan bin qareeh misfaah aaya aur alaahidagee men jidaliyaah say mila. vah bola, “mujhay ismaaeel bin nataniyaah kay paas ja kar usay maar denay kee ijaazat den. kisee ko bhee pata naheen chalega. kya zaroorat hai ki vah aap ko qatl karay? agar vah is men kaamyaab ho jaaay to aap kay paas jamaashuda hamvatan sab kay sab muntashir ho jaaengay aur yahoodaah ka bacha hua hissa halaak ho jaaega.” 16jidaliyaah nay yoohanaan ko daant kar kaha, “aisa mat karna! jo kuchh aap ismaaeel kay baaray men bata rahay hain vah jhoot hai.”