Yarmiyaah 4

tauba karo

¹rabb farmaata hai, “ai israaeel, agar too vaapas aana chaahay to meray paas vaapas a! agar too apnay ghinaunay buton ko meray huzoor say door karkay aavaara na phire ²aur rabb kee hayaat kee qasam khaatay vaqt diyaanatdaaree, insaaf aur sadaaqat say apna vaada poora karay to ghair’aqvaam mujh say barkat pa kar mujh par fakhar karengee.”

³rabb yahoodaah aur yarooshalam kay baashindon say farmaata hai, “apnay dilon kee ghairmustaamal zameen par hal chala kar usay qaabil-ay-kaasht banaao! apnay beej kaantedaar jhaadiyon men bo kar zaaay mat karna. ⁴ai yahoodaah aur yarooshalam kay baashindo, apnay aap ko rabb kay liyay makhsoos karkay apna khatna karaao yaanee apnay dilon ka khatna karaao, varna mera qaher tumhaaray ghalat kaamon kay baais kabhee na bujhnay vaalee aag kee tarah tujh par naazil hoga.

shimaal say aafat ka elaan

⁵yahoodaah men elaan karo aur yarooshalam ko ittila do, ‘mulk bhar men narsinga bajaao!’ gala phaad kar chillaao, ‘ikatthay ho jaao! aao, ham qil’aaband shaheron men panaah len!’ ⁶jhanda gaad do taaki log usay dekh kar siyyoon men panaah len. mahfooz maqaam men bhaag jaao aur kaheen na ruko, kyoonki main shimaal kee taraf say aafat la raha hoon, sab kuchh dhadaam say gir jaaega.

⁷sherbabar jangal men apnee chhupnay kee jagah say nikal aaya, qaumon ko halaak karnay vaala apnay maqaam say ravaana ho chuka hai taaki teray mulk ko tabaah karay. teray shaher barbaad ho jaaengay, aur un men koee naheen rahega.

⁸chunaanchay taat ka libaas pahen kar aah-o-zaaree karo, kyoonki rabb ka sakht ghazab ab tak ham par naazil ho raha hai.”

⁹rabb farmaata hai, “us din baadshaah aur us kay afsar himmat haarengay, imaamon kay rongtay khaday ho jaaengay aur nabee khauf say sun ho kar rah jaaengay.”

¹⁰tab main bol utha, “haay, haay! ai rabb qaadir-ay-mutlaq, too nay is qaum aur yarooshalam ko kitna sakht fareb diya jab too nay farmaaya, tumhen amn-o-amaan haasil hoga haalaanki hamaaray galon par talvaar phirnay ko hai.” ¹¹us vaqt is qaum aur yarooshalam ko ittila dee jaaegee, “registaan kay banjar teelon say sab kuchh jhulsaanay vaalee loo meree qaum kay paas a rahee hai. aur yah gandum ko phatak kar bhoosay say alag karnay vaalee mufeed hava naheen hogee ¹²balki aandhee jaisee tez hava meree taraf say aaegee. kyoonki ab main un par apnay faislay saadir karoonga.”

¹³dekho, dushman toofaanee baadlon kee tarah aagay badh raha hai! us kay rath aandhee jaisay, aur us kay ghoday uqaab say tez hain. haay, ham par afsos! hamaara anjaam a gaya hai.

¹⁴ai yarooshalam, apnay dil ko dho kar buraaee say saaf kar taaki tujhay chhutkaara milay. too andar hee andar kab tak apnay shareer mansoobay baandhtee rahegee?

¹⁵suno! daan say buree khabren a rahee hain, ifraaeem kay pahaadee ilaaqay say aafat ka paighaam pahunch raha hai. ¹⁶ghair’aqvaam ko ittila do aur yarooshalam kay baaray men elaan karo, “muhaasara karnay vaalay faujee doordaraaz mulk say a rahay hain! vah jang kay naaray laga laga kar yahoodaah kay shaheron par toot padengay. ¹⁷tab vah kheton kee chaukeedaaree karnay vaalon kee tarah yarooshalam ko gher lengay. kyoonki yah shaher mujh say sarkash ho gaya hai.” yah rabb ka farmaan hai. ¹⁸“yah teray apnay hee chaal-chalan aur harkaton ka nateeja hai. haay, teree bedeenee ka anjaam kitna talkh aur dilkharaash hai!”

yaramiyaah ka apnee qaum kay liyay dukh

¹⁹haay, meree tadaptee jaan, meree tadaptee jaan! main dard kay maaray pech-o-taab kha raha hoon. haay, mera dil! vah bekaaboo ho kar dhadak raha hai. main khaamosh naheen rah sakta, kyoonki narsingay kee aavaaz aur jang kay naaray meray kaan tak pahunch gaay hain. ²⁰yakay baad deegray shikaston kee khabren mil rahee hain, chaaron taraf mulk kee tabaahee huee hai. achaanak hee meray tamboo barbaad hain, ek hee lamhay men meray khaimay khatm ho gaay hain. ²¹mujhay kab tak jang ka jhanda dekhna padega, kab tak narsingay kee aavaaz sunnee padegee?

²²“meree qaum ahemaq hai aur mujhay naheen jaantee. vah bevuqoof aur naasamajh bachchay hain. go vah ghalat kaam karnay men bahut tez hain, lekin bhalaaee karna un kee samajh say baahar hai.”

²³main nay mulk par nazar daalee to veeraan-o-sunsaan tha. jab aasmaan kee taraf dekha to andhera tha. ²⁴meree nigaah pahaadon par padee to tharathra rahay thay, tamaam pahaadiyaan hichkolay kha rahee theen. ²⁵kaheen koee shakhs nazar na aaya, tamaam parinday bhee ud kar ja chukay thay. ²⁶main nay mulk par nazar daudaaee to kya dekhta hoon ki zarkhez zameen registaan ban gaee hai. rabb aur us kay shadeed ghazab kay saamnay us kay tamaam shaher nest-o-naabood ho gaay hain. ²⁷kyoonki rabb farmaata hai, “poora mulk barbaad ho jaaega, agarchi main usay pooray taur par khatm naheen karoonga. ²⁸zameen maatam karegee aur aasmaan taareek ho jaaega, kyoonki main yah farma chuka hoon, aur mera iraada atal hai. na main yah karnay say pachhataaoonga, na is say baaz aaoonga.”

²⁹ghudasavaaron aur teer chalaanay vaalon ka shor-sharaaba sun kar log tamaam shaheron say nikal kar jangalon aur chataanon men khisak jaaengay. tamaam shaher veeraan-o-sunsaan hongay, kisee men bhee log naheen basengay.

³⁰to phir too kya kar rahee hai, too jisay khaak men mila diya gaya hai? ab qirmizee libaas aur sonay kay zevraat pahennay kee kya zaroorat hai? is vaqt apnee aankhon ko surmay say sajaanay aur apnay aap ko aaraasta karnay ka koee faaida naheen. teray aashiq to tujhay haqeer jaantay balki tujhay jaan say maarnay kay darpai hain. ³¹kyoonki mujhay dard-ay-zah men mubtala aurat kee aavaaz, pahelee baar janm denay vaalee kee aah-o-zaaree sunaaee day rahee hai. siyyoon betee karaah rahee hai, vah apnay haath phailaaay huay kah rahee hai, “haay, mujh par afsos! meree jaan qaatilon kay haath men a kar nikal rahee hai.”