Yarmiyaah 39
yarooshalam kee shikast
1yarooshalam yoon dushman kay haath men aaya : yahoodaah kay baadshaah kay navven saal aur 10ven maheene [a] disambar ta janvree. men shaah-ay-baabal nabookadnazzar apnee tamaam fauj lay kar yarooshalam pahuncha aur shaher ka muhaasara karnay laga. 2sidaqiyaah kay 11ven saal kay chauthay maheenay aur navven din [b] 18 julaaee. dushman nay faseel men rakhna daal diya. 3tab nabookadnazzar kay tamaam aala afsar shaher men a kar us kay darmiyaanee darvaazay men baith gaay. un men nairgal-saraazar jo rab-maag tha, samgar-naboo, sar-sakeem jo rab-saarees tha aur shaah-ay-baabal kay baaqee buzurg shaamil thay.
4unhen dekh kar yahoodaah ka baadshaah sidaqiyaah aur us kay tamaam faujee bhaag gaay. raat kay vaqt vah faseel kay us darvaazay say niklay jo shaahee baagh kay saath mulhiq do deevaaron kay beech men tha. vah vaadee-ay-yardan kee taraf daudnay lagay, 5lekin baabal kay faujiyon nay un ka taaqqub karkay sidaqiyaah ko yareehoo kay maidaanee ilaaqay men pakad liya. phir usay mulk-ay-hamaat kay shaher ribla men shaah-ay-baabal nabookadnazzar kay paas laaya gaya, aur vaheen us nay sidaqiyaah par faisla saadir kiya. 6sidaqiyaah kay dekhtay dekhtay shaah-ay-baabal nay ribla men us kay beton ko qatl kiya. saath saath us nay yahoodaah kay tamaam buzurgon ko bhee maut kay ghaat utaar diya. 7phir us nay sidaqiyaah kee aankhen nikalva kar usay peetal kee zanjeeron men jakad liya aur baabal ko lay jaanay kay liyay mahfooz rakha.
8baabal kay faujiyon nay shaahee mahel aur deegar logon kay gharon ko jala kar yarooshalam kee faseel ko gira diya. 9shaahee muhaafizon kay afsar naboozaraadaan nay sab ko jilaavatan kar diya jo yarooshalam aur yahoodaah men peechhay rah gaay thay. vah bhee un men shaamil thay jo jang kay dauraan ghaddaaree karkay shaah-ay-baabal kay peechhay lag gaay thay. 10lekin naboozaraadaan nay sab say nichlay tabqay kay baaz logon ko mulk-ay-yahoodaah men chhod diya, aisay log jin kay paas kuchh naheen tha. unhen us nay us vaqt angoor kay baagh aur khet diay.
11-12 nabookadnazzar baadshaah nay shaahee muhaafizon kay afsar naboozaraadaan ko hukm diya, “yaramiyaah ko apnay paas rakhen. us ka khayaal rakhen. usay nuqsaan na pahunchaaen balki jo bhee darakhwaast vah karay usay poora karen.”
13chunaanchay shaahee muhaafizon kay afsar naboozaraadaan nay kisee ko yaramiyaah kay paas bheja. us vaqt nabooshazbaan jo rab-saarees tha, nairgal-saraazar jo rab-maag tha aur shaah-ay-baabal kay baaqee afsar naboozaraadaan kay paas thay. 14yaramiyaah ab tak shaahee muhaafizon kay sahen men giriftaar tha. unhon nay hukm diya ki usay vahaan say nikaal kar jidaliyaah bin akheeqaam bin saafan kay havaalay kar diya jaaay taaki vah usay us kay apnay ghar pahuncha day. yoon yaramiyaah apnay logon kay darmiyaan basnay laga.
abad-malik kay liyay khushkhabaree
15jab yaramiyaah abhee shaahee muhaafizon kay sahen men giriftaar tha to rabb us say hamkalaam hua,
16“ja kar ethopiya kay abad-malik ko bata, ‘rab-ul-afwaaj jo israaeel ka khuda hai farmaata hai ki dekh, main is shaher kay saath vah sab kuchh karnay ko hoon jis ka elaan main nay kiya tha. main us par meharbaanee naheen karoonga balki usay nuqsaan pahunchaaoonga. too apnee aankhon say yah dekhega. 17lekin rabb farmaata hai ki tujhay main us din chhutkaara doonga, tujhay un kay havaalay naheen kiya jaaega jin say too darta hai. 18main khud tujhay bachaaoonga. choonki too nay mujh par bharosa kiya is liyay too talvaar kee zad men naheen aaega balki teree jaan chhoot jaaegee [c] lafzee tarjuma : too ghaneemat kay taur par apnee jaan ko bachaaega. . yah rabb ka farmaan hai’.”