Yarmiyaah 38
yaramiyaah ko saza-ay-maut denay ka iraadaa
1safatiyaah bin mattaan, jidaliyaah bin fashhoor, yookal bin salamiyaah aur fashhoor bin malkiyaah ko maaloom hua ki yaramiyaah tamaam logon ko bata raha hai 2ki rabb farmaata hai,
“agar tum talvaar, kaal ya vaba say marna chaaho to is shaher men raho. lekin agar tum apnee jaan ko bachaana chaaho to shaher say nikal kar apnay aap ko baabal kee fauj kay havaalay karo. jo koee yah karay us kee jaan chhoot jaaegee [a] lafzee tarjuma : vah ghaneemat kay taur par apnee jaan ko bachaaega. . 3kyoonki rabb farmaata hai ki yarooshalam ko zaroor shaah-ay-baabal kee fauj kay havaalay kiya jaaega. vah yaqeenan us par qabza karega.”
4tab mazkoora afsaron nay baadshaah say kaha, “is aadmee ko saza-ay-maut deenee chaahiay, kyoonki yah shaher men bachay huay faujiyon aur baaqee tamaam logon ko aisee baaten bata raha hai jin say vah himmat haar gaay hain. yah aadmee qaum kee baheboodee naheen chaahata balki usay museebat men daalnay par tula raheta hai.”
5sidaqiyaah baadshaah nay javaab diya, “theek hai, vah aap kay haath men hai. main aap ko rok naheen sakta.” 6tab unhon nay yaramiyaah ko pakad kar malkiyaah shaahzaada kay hauz men daal diya. yah hauz shaahee muhaafizon kay sahen men tha. rasson kay zareeay unhon nay yaramiyaah ko utaar diya. hauz men paanee naheen tha balki sirf keechad, aur yaramiyaah keechad men dhans gaya.
7lekin ethopiya kay ek darbaaree banaam abad-malik ko pata chala ki yaramiyaah kay saath kya kuchh kiya ja raha hai. jab baadshaah shaher kay darvaazay banaam binyameen men kachaheree lagaaay baitha thaa 8to abad-malik shaahee mahel say nikal kar us kay paas gaya aur kaha, 9“meray aaqa aur baadshaah, jo sulook in aadmiyon nay yaramiyaah kay saath kiya hai vah nihaayat bura hai. unhon nay usay ek hauz men phaink diya hai jahaan vah bhooka marega. kyoonki shaher men rotee khatm ho gaee hai.”
10yah sun kar baadshaah nay abad-malik ko hukm diya, “is say pahelay ki yaramiyaah mar jaaay yahaan say 30 aadmiyon ko lay kar nabee ko hauz say nikaal den.” 11abad-malik aadmiyon ko apnay saath lay kar shaahee mahel kay godaam kay neechay kay ek kamray men gaya. vahaan say us nay kuchh puraanay cheethday aur ghisay phatay kapday chun kar unhen rasson kay zareeay hauz men yaramiyaah tak utaar diya. 12abad-malik bola, “rassay baandhnay say pahelay yah puraanay cheethday aur ghisay phatay kapday baghal men rakhen.” yaramiyaah nay aisa hee kiya, 13to vah usay rasson say khainch kar hauz say nikaal laaay. is kay baad yaramiyaah shaahee muhaafizon kay sahen men raha.
sidaqiyaah ko aakhiree martaba aagaah kiya jaata hai
14ek din sidaqiyaah baadshaah nay yaramiyaah ko rabb kay ghar kay teesray darvaazay kay paas bula kar us say kaha, “main aap say ek baat darayaaft karna chaahata hoon. mujhay is ka saaf javaab den, koee bhee baat mujh say mat chhupaaen.” 15yaramiyaah nay etiraaz kiya, “agar main aap ko saaf javaab doon to aap mujhay maar daalengay. aur agar main aap ko mashvra doon bhee to aap usay qabool naheen karengay.” 16tab sidaqiyaah baadshaah nay alaahidagee men qasam kha kar yaramiyaah say vaada kiya, “rabb kee hayaat kee qasam jis nay hamen jaan dee hai, na main aap ko maar daaloonga, na aap kay jaanee dushmanon kay havaalay karoonga.”
17tab yaramiyaah bola, “rabb jo lashkaron ka aur israaeel ka khuda hai farmaata hai, ‘apnay aap ko shaah-ay-baabal kay afsaraan kay havaalay kar. phir teree jaan chhoot jaaegee aur yah shaher nazar-ay-aatish naheen ho jaaega. too aur tera khaandaan jeeta rahega. 18doosree soorat men is shaher ko baabal kay havaalay kiya jaaega aur faujee isay nazar-ay-aatish karengay. too bhee un kay haath say naheen bachega’.”
19lekin sidaqiyaah baadshaah nay etiraaz kiya, “mujhay un hamvatanon say dar lagta hai jo ghaddaaree karkay baabal kee fauj kay paas bhaag gaay hain. ho sakta hai ki baabal kay faujee mujhay un kay havaalay karen aur vah meray saath badasulookee karen.” 20yaramiyaah nay javaab diya, “vah aap ko un kay havaalay naheen karengay. rabb kee sun kar vah kuchh karen jo main nay aap ko bataaya hai. phir aap kee salaamatee hogee aur aap kee jaan chhoot jaaegee. 21lekin agar aap shaher say nikal kar hathiyaar daalnay kay liyay tayyaar naheen hain to phir yah paighaam sunen jo rabb nay mujh par zaahir kiya hai! 22shaahee mahel men jitnee khavaateen bach gaee hain un sab ko shaah-ay-baabal kay afsaron kay paas pahunchaaya jaaega. tab yah khavaateen aap kay baaray men kahengee, ‘haay, jin aadmiyon par too poora etimaad rakhta tha vah fareb day kar tujh par ghaalib a gaay hain. teray paaon daldal men dhans gaay hain, lekin yah log ghaaib ho gaay hain.’ 23haan, teray tamaam baal-bachchon ko baahar baabal kee fauj kay paas laaya jaaega. too khud bhee un kay haath say naheen bachega balki shaah-ay-baabal tujhay pakad lega. yah shaher nazar-ay-aatish ho jaaega.”
24phir sidaqiyaah nay yaramiyaah say kaha, “khabardaar! kisee ko bhee yah maaloom na ho ki ham nay kya kya baaten kee hain, varna aap mar jaaengay. 25jab meray afsaron ko pata chalay ki meree aap say guftagu huee hai to vah aap kay paas a kar poochhengay, ‘tum nay baadshaah say kya baat kee, aur baadshaah nay tum say kya kaha? hamen saaf javaab do aur jhoot na bolo, varna ham tumhen maar daalengay.’ 26jab vah is tarah kee baaten karengay to unhen sirf itna sa bataaen, ‘main baadshaah say minnat kar raha tha ki vah mujhay yoontan kay ghar men vaapas na bhejen, varna main mar jaaoonga’.”
27aisa hee hua. tamaam sarkaaree afsar yaramiyaah kay paas aaay aur us say savaal karnay lagay. lekin us nay unhen sirf vah kuchh bataaya jo baadshaah nay usay kahenay ko kaha tha. tab vah khaamosh ho gaay, kyoonki kisee nay bhee us kee baadshaah say guftagu naheen sunee thee.
28is kay baad yaramiyaah yarooshalam kee shikast tak shaahee muhaafizon kay sahen men qaidee raha.