Yarmiyaah 37
misr sidaqiyaah kee madad naheen kar saktaa
1yahoodaah kay baadshaah yahooyaakeen [a] ibraanee men yahooyaakeen ka mutraadif kooniyaah mustaamal hai. bin yahooyaqeem ko takht say utaarnay kay baad shaah-ay-baabal nabookadnazzar nay sidaqiyaah bin yoosiyaah ko takht par bitha diya. 2lekin na sidaqiyaah, na us kay afsaron ya avaam nay un paighaamaat par dhyaan diya jo rabb nay yaramiyaah nabee kee maarifat farmaaay thay.
3ek din sidaqiyaah baadshaah nay yahookal bin salamiyaah aur imaam safaniyaah bin maasiyaah ko yaramiyaah kay paas bheja taaki vah guzaarish karen, “meharbaanee karkay rabb hamaaray khuda say hamaaree shafaaat karen.”
4yaramiyaah ko ab tak qaid men daala naheen gaya tha, is liyay vah aazaadee say logon men chal phir sakta tha. 5us vaqt firaaun kee fauj misr say nikal kar israaeel kee taraf badh rahee thee. jab yarooshalam ka muhaasara karnay vaalee baabal kee fauj ko yah khabar milee to vah vahaan say peechhay hat gaee. 6tab rabb yaramiyaah nabee say hamkalaam hua,
7“rabb israaeel ka khuda farmaata hai ki shaah-ay-yahoodaah nay tumhen meree marzee darayaaft karnay bheja hai. usay javaab do ki firaaun kee jo fauj tumhaaree madad karnay kay liyay nikal aaee hai vah apnay mulk vaapas lautnay ko hai. 8phir baabal kay faujee vaapas a kar yarooshalam par hamla karengay. vah isay apnay qabzay men lay kar nazar-ay-aatish kar dengay. 9kyoonki rabb farmaata hai ki yah soch kar dhoka mat khaao ki baabal kee fauj zaroor hamen chhod kar chalee jaaegee. aisa kabhee naheen hoga! 10khwaah tum hamlaaaavar pooree baablee fauj ko shikast kyoon na detay aur sirf zakhmee aadmee bachay rahetay to bhee tum naakaam rahetay, to bhee yah baaz ek aadmee apnay khaimon men say nikal kar yarooshalam ko nazar-ay-aatish kartay.”
yaramiyaah ko qaid men daala jaata hai
11jab firaaun kee fauj israaeel kee taraf badhnay lagee to baabal kay faujee yarooshalam ko chhod kar peechhay hat gaay. 12un dinon men yaramiyaah binyameen kay qabaailee ilaaqay kay liyay ravaana hua, kyoonki vah apnay rishtedaaron kay saath koee mauroosee milkiyat taqseem karna chaahata tha. lekin jab vah shaher say nikaltay hue 13binyameen kay darvaazay tak pahunch gaya to paheredaaron ka ek afsar usay pakad kar kahenay laga, “tum bhagoday ho! tum baabal kee fauj kay paas jaana chaahatay ho!” afsar ka naam iriyaah bin salamiyaah bin hananiyaah tha. 14yaramiyaah nay etiraaz kiya, “yah jhoot hai, main bhagoda naheen hoon! main baabal kee fauj kay paas naheen ja raha.” lekin iriyaah na maana balki usay giriftaar karkay sarkaaree afsaron kay paas lay gaya. 15usay dekh kar unhen yaramiyaah par ghussa aaya, aur vah us kee pitaaee kara kar usay shaahee muharrir yoontan kay ghar men laaay jisay unhon nay qaidkhaana banaaya tha. 16vahaan usay ek zameenadoz kamray men daal diya gaya jo pahelay hauz tha aur jis kee chhat meharaabdaar thee. vah mut’addid din us men band raha.
17ek din sidaqiyaah nay usay mahel men bulaaya. vahaan alaahidagee men us say poochha, “kya rabb kee taraf say meray liyay koee paighaam hai?” yaramiyaah nay javaab diya, “jee haan. aap ko shaah-ay-baabal kay havaalay kiya jaaega.” 18tab yaramiyaah nay sidaqiyaah baadshaah say apnee baat jaaree rakh kar kaha, “mujh say kya jurm hua hai? main nay aap kay afsaron aur avaam kay khilaaf kya qusoor kiya hai ki mujhay jel men dalva diya? 19aap kay vah nabee kahaan hain jinhon nay aap ko peshgoee sunaaee ki shaah-ay-baabal na aap par, na is mulk par hamla karega? 20ai meray maalik aur baadshaah, meharbaanee karkay meree baat sunen, meree guzaarish pooree karen! mujhay yoontan muharrir kay ghar men vaapas na bhejen, varna main mar jaaoonga.”
21tab sidaqiyaah baadshaah nay hukm diya ki yaramiyaah ko shaahee muhaafizon kay sahen men rakha jaaay. us nay yah hidaayat bhee dee ki jab tak shaher men rotee dastayaab ho yaramiyaah ko naanbaaee-galee say har roz ek rotee miltee rahay. chunaanchay yaramiyaah muhaafizon kay sahen men rahenay laga.